Azərbaycan Avtomobil Yolları Dövlət Agentliyinə

İyulun 23-də Turan İnformasiya Agentliyində "İki dirək arasındakı yeni yoldan necə keçmək olar?" başlıqlı məqalə dərc edilib. Məqalədə Azərbaycanda yol-tikinti işlərinin təşkilindəki nöqsanlardan danışılır. Məqaləyə Facebook-un Azərbaycan seqmentindən götürülmüş fotolar əlavə edilib. Fotolarda guya Şəki rayonunun Üzümçülük kəndindəki yol təsvir edilib. Həmin avtomobil yolunda duran iki dirəyin arasından keçmək mümkün deyil.

Məqalənin ikinci hissəsi 2019-cu ilin yayında Azərbaycan Avtomobil Yolları Dövlət Agentliyinin Qax rayonunun İlisu kəndində apardığı yol işlərinə həsr olunub. Kənd sakinləri məqalənin müəllifi Kamal Əliyə bildiriblər ki, yeni asfalt örtüyün altında köhnə, deşilmiş su boruları qalıb, ona görə də yola su sızır.

Məqalənin həmin hissəsində asfalt zavodunun adının çəkilməsini istəməyən naməlum rəhbəri müxbirə asfalt zavodlarında və yol-tikinti müəssisələrində pul vəsaitlərinin qanunsuz mənimsənilməsi metodlarını açıqlayıb. Asfalt dövlət standartarına uyğun olaraq hazırlanmır, yola isə normada nəzərdə tutulan qalınlıqdan az asfalt döşənir, o deyib.

Məqalənin üçüncü hissəsində bundan öncə digər KİV-də dərc edilmiş ölkə yollarında keyfiyyətsiz asfalt örtükləri ilə bağlı yazılardan faktlar gətirilib.

Məqalə Turan agentliyində dərc edildikdən sonra Azərbaycan Avtomobil Yolları Dövlət Agentliyi Facebook səhifəsində rəsmi cavab yerləşdirib. Cavabda haqlı olaraq bildirilib ki, Azərbaycanda iki dirəyin arasından çəkilmiş yol yoxdur, məqalədə istifadə olunan foto isə Şəki rayonunda yox, Braziliyada çəkilib. Dövlət Agentliyi düzgün olaraq onu da qeyd edib ki, jurnalist bu fotonu dərc etməzdən öncə onun mənşəyini araşdırmalıdır.

Məqalənin müəllifi Kamal Əli fotoya və Azərbaycan Avtomobil Yollari Dövlət Agentliyinin işgüzar reputasiyasına dəyən ziyana görə öz üzrxahlığını dərc edib.

Lakin Turan-ın İlisuda apardığı əlavə jurnalist araşdırması göstərib ki, bu kənddə iki yerdə bu ilin yayında asfaltlanmış yolun hərəkət hissəsində beton elektrik dirəkləri durur ki, bunlar nəqliyyatın hərəkətinə birbaşa təhlükə yaradır. İşıq dirəkləri səkilərdə piyadaların hərəkətinə mane olur. İlisuda yeni asfalt yolu Azərbaycan Avtomobil Yollari çəkib. Bu, qurumun saytındakı məumatlardan və fotolardan http://www.aayda.gov.az/az/, həmçinin Turan-ın fotolarından görünür.

Araşdırma onu da göstərib ki, İlisuda asfalt yol köhnə deşilmiş su borularının üstündən salınıb. Onlar su ilə dolanda, bəzi yerlərdə yeni asfaltın altından yolun səthinə su sızır ki, bu da asfalt örtüyün dağılmasına səbəb olur.

Dövlət Agentliyi Facebook-da yerləşdirdiyi mətndə bildirib ki, onlar işə başlamazdan öncə digər müvafiq qurumlara müraciət edirlər ki, su borularında və digər yeraltı kommunikasiyalardakı nöqsanları aradan qaldırsınlar. Yol işləri həmin kommunikasiyaların təmirindən sonra başlayır. Lakin İlisu kəndində yeni asfalt sızan su borularının üzərindən döşənib.

Bu faktı təsdiq edən fotolar və videoqeydlər əlavə edilir. https://youtu.be/6-zpcoBVwJY

Dünyada yolun təyinatından asılı olaraq asfalt örtüyün çəkilməsilə bağlı standartlar qəbul edilib. Avtomobillərin intensiv hərəkət etdiyi yolda yeni asfalt örtüyün qalınlığı iki əsas qat daxil olmaqla 9 sm. olmalıdır. Aşağı bərabərləşdirici qatın ölçüsü 5 sm., yuxarı 4 sm. olur. (https://rovnayadoroga.ru/dorogi/vidy-asfalta.html).

Turan-ın müxbiri İlisuda asfalt örtüyün kənarlarından ölçü götürərək yeni asfaltın qalınlığını ölçüb. Təqdim olunan fotolardan görünür ki, İlisu kəndində yolun müxtəlif hissələrində yeni asfaltın qalınlığı eyni deyil. Üst qatın qalınlığı bir santimetrdən dörd santimetrədək dəyişir.

Yolun bəzi yerlərində kənardan cəmi üç santimetrədək bir qat qalınlıq görmək mümkündür. Bəzi yerlərdə yeni asfalt köhnənin üstündən çəkilib, kənardan ancaq yeni asfaltın bir santimetr yarım qalınlığında bir qatı görünür. Üstəlik, standartlara əməl olunmayıb. Bu standartlar haqda məlumatı İnternetdən tapmaq olar.

Turan İnformasiya Agentliyi Azərbaycan Avtomobil Yolları Dövlət Agentliyindən aşağıdakı sualları cavablandırmağı xahiş edir:

1. Uzunluğu 35,5 km. olan Qax-İlisu yolunun tikintisinin maliyyə smetası necədir və yolun dəyərinə nə daxildir? (ətraflı)

2. Yol tikintisi zamanı hansı normativlər və standartlar tətbiq olunmalıdır? (ətraflı)

3. Niyə İlisuda asfalt çəkilişi zamanı dirəklər yoldan götürülməyib və su boruları dəyişdirilməyib?

4. Hansı səbəbdən AzerAvtoYol-un rəsmi saytında tikilən yolun maliyyə dəyəri, standartlar və normativlər haqda informasiya yoxdur?

Bu məktuba 13 foto və 2 videoçarx (bir videoçarxın ünvanı mətndə yer alır), həmçinin asfalt çəkilişinin standartlarına dair fotolar əlavə edilir.

Hörmətlə,

Mehman Əliyev

Turan İnformasiya Agentliyinin direktoru

Asfalt çəkilişinin standartlarına dair fotolar