AzTV-də dəyişiklik Almaniyanı sevindirəcək � yeni Azərbaycansayağı zarafat

Prezident İlham Əliyevin işdən azad etdiyi səkkiz dövlət qurumu rəhbərindən (yeddi dövlət müəssiəsi qeyri-effektivliyinə görə bağlanıb) ən çox müzakirə olunanı Azərbaycan Televiziya və Radio Verilişləri Qapalı Səhmdar Cəmiyyətinin keçmiş sədri Arif Alışanov oldu. A.Alışanovun işdən çıxarılması xəbərindən dərhal sonra sosial şəbəkələr şən replikalarla dolmağa başladı. Ən çox yayılan fraza odur ki, "Almaniya rahat nəfəs ala bilər, onu "məhv edən" AzTV rəhbəri öz işini sonadək çatdıra bilmədi" (Çox ağırdır..İmkan vermədilər ki, kişi Merkel Almaniyasını tamamilə dağıtsın. O, buna çox yaxın idi..", jurnalist Qafqaz Ömərov).

Mühasibatlıq ixtisası üzrə ali təhsil alan A.Alışanov 2001-ci il mayın 17-dən Azərbaycan Televiziya və Radio Yayım Şirkəti sədrinin texnika üzrə müavini olub. 2005-ci il martın 28-də prezidentin fərmanı ilə sədr müavini, 2006 -cı il avqustun 26-da isə "Azərbaycan Dövlət Televiziya və Radio Verilişləri" QSC-nin sədri təyin edilib. Onun idarəçiliyi dövründə AzTV ali icra hakimiyyətinin təbliğatçısı reputasiyasını təsdiqləyib. Bu kanalın telestudiyasıda ancaq prezidentin fəaliyyəti ilə bağlı təriflər, ölkə rəhbərliyini dəstəkləməyən hər kəsin ünvanına mənfi fikirlər səslənib. AzTV ilə bağlı alternativ rəy prinsipcə mümkün deyil, həm də təkcə teleradio efirində yox, eləcə də korporativdaxili müzakirələrdə.

A.Alışanov tabeliyində olan işçilərlə görüşmürdü, onları qəbul etmirdi, narazı əməkdaşları dinləmirdi. Onun qəbuluna düşmək demək olar ki, mümkün deyildi. O, öz fkirləri ilə üst-üstə düşməyən istənilən fikrin qarşısını alırdı, həm də təkcə tabeliyində olanlar arasında yox. Ekspertlərin A.Alışanovun fəaliyyətilə bağlı yadda saxladıqları yeganə şey telejurnalistika sahəsində mütəxəssis, professor Qulu Məhərrəmliyə qarşı məhkəmə prosesidir. 2016-cı ilin fevralında Q.Məhərrəmli Azərbaycan televiziyasının 60 illik yubileyi ilə bağlı müsahibəsində AzTV-ni tənqid etmişdi. Həmin il A.Alışanovun iddiası üzrə məhkəmə başlamışdı.

QSC sədri reputasiyasına dəyən zərərə görə professorun 100 min manat kompensasiya ödəməsini tələb edirdi. 2017-ci il fevralın 13-də Yasamal Rayon Məhkəməsi Q.Məhərrəmliyə qarşı cinayət işi qaldırmaqdan imtina edərək məhkəmə icraatını dayandırmışdı.

QSC sədrinin səlahiyyətlərinin müvəqqəti icrası AzTV-də siyasət proqramının aparıcısı Rövşən Rafiqoğluna (Məmmədov) həvalə edilib. O, verilişə dəvət olunan qonaqların rəsmi mövqeyini dəstəkləyərək hakimiyyətin istənilən siyasətini təqdir etməsi, əl hərəkətləri, fərqli fikirlərin qarşısını alması, tamaşaçılara qaşlarını çataraq baxması ilə yadda qalır.

R.Rafiqoğlunun efir davranışı həmkarları tərəfindən yüksək qiymətləndirilir. Sosial şəbəkələrdə onun yüksək təyinatı ilə bağlı təbriklər yer alıb: "Rövşən Rafiqoğlunu dəyərli televiziya kadrı hesab edirəm. Onun verilişlərinə bir neçə dəfə baxmışam, nitqi, məntiqi, efir mədəniyyətini çox bəyənirəm. Uğurlar arzu edirəm", - teleaparıcı İlhamiyyə Rza yazıb.

R.Məmmədov 1979-cu ildə anadan olub. Bakı Dövlət Universitetinin jurnalistika fakültəsində təhsil alıb. Jurnalist karyerasına 2000-ci ildə başlayıb. Ən mürtəce siyasi məzmunu ilə tanınan "Lider" telekanalında idman verilişləri aparıb. Televiziya jurnalistikasının nəzəriyyəsi haqda "Lider jurnalist" kitabını yazıb. 2009-ci ildə İdman Departamentinin rəhbəri olub. Sonra ANS və İdman Azərbaycan kanallarında çalışıb. 2014-cü ildə AzTV-yə qəbul edilib, "Günün nəbzi" və "Həftə" siyasi verilişlərini aparıb. Bakı Slavyan Universitetində dərs deyib.

A.Alışanovun R.Rafiqoğlu ilə əvəzlənməsi AzTV-nin fəaliyyətinin yaxşılaşacağı, bu kanalda ölkə daxilində və dünyada siyasi, iqtisadi hadisələrə dair obyektiv informasiyanın olacağı ilə bağlı ictimai gözlənti doğurmadı. Müstəqil müşahidəçilərdən yalnız Əvəz Həsənov bildirib ki, əgər AzTV-nin rəhbərliyi dəyişirsə digər telekanalların da rəhbərləri dəyişməlidir ki, ölkədə televiziya məkanı yenilənsin və indiyə kimi mövcud olan neqativdən azad olsun.

İctimai diskussiyaların digər iştirakçılarını A.Alışanovun korrupsiya faktlarının araşdırılması maraqlandırır. Qulu Məhərrəmli deyib ki, A.Alışanovu 12 il öncə işdən çıxarmaq lazım idi. Onun kimiləri öz ənənələri olan televiziya kanalına rəhbərlik etməməliydi. O, keçmiş sədrin vurduğu zərərin müzakirəsini aktual hesab edir və sadalayır: AzTV-nin peşə səviyyəsinin aşağı olması, ixtisaslı kadrların işdən kənarlaşdırılması, dövlətin ayırdığı illik 50-55 mln. manatın taleyinin məlum olmaması.

Media hüququ sahəsində ekspert Rəşid Hacılı bəzi rəhbərlərin işdən kənarlaşdırılmasını islahatların aparılmasının göstəricisi hesab etmir.

"İslahat o vaxt olur ki, müstəqil parlament seçkisi keçirəsən. Parlamentə hesabat verən, dinamik hökumət qurasan.

Televiziyaları, mətbuatı zəncirdən azad edəsən. Qoy, hökuməti gündəlik nəzarətdə saxlasınlar. Korrupsiya, fəaliyyətsizlik hallarını müzakirəyə çıxarsınlar.

Məhkəmə sistemini korrupsiya bataqlığından çıxarasan. Peşəkar, əxlaqlı hakim korpusu yaranmasına təkan verəsən. Məhkəmələri siyasi həbslərin icraçısına çeirməkdən imtina edəsən. İstintaqı, polisi siyasi fəaliyyətin, həm də qanunsuz, tərəfinə çevirməyəsən....", - R.Hacılı yazıb.

A.Alışanovun çıxarılması və R.Rafiqoğlunun təyinatı AzTV-ni yaxşılaşdıra bilməz, çünki beynəlxalq institutlar tərəfindən dəfələrlə pislənilən söz azadlığı və mətbuat hüquqlarının məhdudlaşdırılması Azərbaycanda qalmaqdadır. Televiziya kanalları arasında rəqabət yoxdur, onların maliyyə mənbələri şəffaf deyil, hakimiyyətin istəyilə onlar qapadıla bilər. QSC sədrinin vəzifəsinin icraçısı A.Alışanovun iradəsinin icraçısı olub, AzTV-nin islahat səylərində rolu nəzərə çarpmayıb.

"Ola bilsin ki, R.Rafiqoğlunun təyinatı ilə AzTV "Almaniyanı dağıtmağa, Fransanı ifşa etməyə" son qoyacaq", - azərbaycanlılar R.Rafiqoğlunun verilişlərində fransalı "sarı jiletlilər"in etiraz nümayişini yada salaraq zarafat edirlər. Bircə bu, qocaman Azərbaycan kanalında yeganə "yaxşılaşma" ola bilər.