Ermənistandakı Rusiya bazasının komandiri Azərbaycanı hədələyir

Görünür, Orxan Zeynalovun taleyindən narahat olan Azərbaycan hökuməti səmtini tamamilə itirib, onun milli maraqların müdafiəsi haqqında bəyanatları isə boş görünür.

Son həftələrdə ölkə XİN-i, parlament, baş prokuror, Azərbaycanın Moskvadakı səfirliyi və bir çox başqa şəxslər Rusiyada Azərbaycanlıların milli ləyaqətini qorumaqla məşğuldur. Görünür, bütün bu və digər dövlət orqanları üçün Orxan Zeynalovun işi o qədər böyük əhəmiyyət kəsb edir ki, onlar başqa nə isə görmək və eşitmək imkanından məhrum olublar.

Belə olmasaydı, bizim diplomatlar, siyasətçilər və dövət xadimləri Ermənistanda Rusiyanın 102-ci hərbi bazasının komandiri Andrey Ruzinskinin qalmaqallı çıxışını gözdən qaçıra bilməzdi.

Hələ oktyabrın 10-da “Krasnaya Zvezda” qəzetinə müsahibəsində bu polkovnik deyib:

“Hərbi bazanın cavabdehlik zonasında hərbi-siyasi vəziyyət həyəcanlı olaraq qalır və Ermənistan-Azərbaycan münaqişəsi regionunda qarşıdurmanın gərginləşməsi ehtimalı ilə bağlı sabitliyi pozan bir sıra amillərin mövcudluğu ilə səciyyələnir. Azərbaycan rəhbərliyi Dağlıq Qarabağ üzərində yurisdiksiyanı güc yolu ilə bərpa etməyi qərara alarsa, hərbi baza KTMT çərçivəsində Rusiya Federasiyasının müqavilə öhdəliklərinə uyğun olaraq, silahlı münaqişəyə başlaya bilər”.

Bəs rəsmi Bakı buna nə reaksiya verdi? Moskvadakı səfirlik Rusiya XİN-ə nota verdi?

Bəli, reaksiya oldu - Orxan Zeynalovun hüquqlarının müdafiəsi tələbi ilə iki nota verildi.

Təcrübə göstərir ki, Azərbaycan XİN və digər orqanlar insan hüquqlarının, demokratiyanın pozulması haqqında mənfi nəşrlərə, hakim ailənin və ölkədəki korrupsiyanın tənqidinə ciddi reaksiya verir.

Bu, hökumətin prioritetləridir. Və belə çıxır ki, xarici dövlətin Azərbaycana qarşı hərbi güc tətbiq etmək hədələri o qədər də mühüm təzahür deyil ki, ona reaksiya verilsin – yəni bu məsələ prioritet deyil.

Çox maraqlıdır ki, polkovnik Ruzinskinin bəyanatı Rusiya hərbi idarəsi tərəfindən rədd edilməyib, baxmayaraq ki, KTMT rəhbəri Nikolay Bordyuja dəfələrlə deyib ki, Dağlıq Qarabağ KTMT-nin cavabdehlik zonası deyil, belə ki, de-yure bu, Azərbaycanın ərazisidir.

Ermənistanda 102-ci hərbi bazaya gəlincə, bu, 13 əsas döyüş hissəsi və hərtərəfli təmin edilmiş 17 hissədir. Onun tərkibinə “S-300V” ZRK, BUK-M1-2 ZRK divizionu, “Smerç” reaktiv batareyası və MiQ-29 təyyarələri eskadrilyası olan aviasiya bazası daxildir.

Bəzi məlumatlara görə, hərbi qulluqçuların sayı təxminən 3 min nəfər təşkil edir və artmaqda davam edir.

Bu il Ermənistan SQ bölmələri ilə birgə təlimlər zamanı döyüş əməliyyatlarının idarə olunması, hücumun geri çevrilməsi, geri çəkilən düşmənə əks hücum və s. işlənilib.

Elə həmin Ruzinskinin bəyanatına əsasən, Erebuni aerodromunda aviabazanı gücləndirmək – MiQ-29 qırıcılarının yanına döyüş və hərbi-nəqliyyat vertolyotları yerləşdirmək planlaşdırılır. Zəruri ikitərəfli sənədlər paketi artıq imzalanıb, deyə polkovnik bildirib. -02D-