�Haarets� qəzetindəki saxta məlumatın arxasında nə dururdu?

Bakı /22.08.17/Turan: Bir neçə gün öncə İnternetdə guya İsrailin "Haarets" qəzetində dərc edilən məqalə yayılıb. Məqalədə Azərbaycan prezidentinin İsraildəki investisiyalarından danışılırdı.

Ancaq tezliklə məlum oldu ki, müəllif araşdırması kimi təqdim olunan bu məlumat saxta və yalandır.

Belə ki, qəzetin saytında və müəllifin məqalələrinin siyahısında belə material olmayıb.

Bununla belə, Azərbaycan Prezident Administrasiyasının nümayəndəsi mövcud olmayan yazı ilə bağlı təkziblə çıxış etdi, onu Azərbaycan-İsrail münasibətlərinə zərbə kimi qiymətləndirdi və İsraildən rəsmi təkzib tələb etdi.

Demək olar ki, saxta məqalənin müəllifləri qismən öz məqsədlərinə çatdılar. Görünür, bunda əsas hədəf Azərbaycan-İsrail münasibətləri olub.

Hazırda iki ölkə arasında əməkdaşlıq təhlükəsizlik və silah kimi strateji sahələrdə inkişaf edir. Bu, böyük bazardır, hesab milyardlarla dollar ilə ölçülür.

Əgər kimsə İsraili Azərbaycan bazarından sıxışdırıb çıxara bilərsə və onun yerini tuta bilərsə bu milyardlar başqa istiqamətə axacaq.

Və bu məqamda ən vacib və intriqa doğuran sual ortaya çıxır: bu, kimə sərfəlidir?

Hazırda Azərbaycana əsas silah tədarükçüsü Rusiyadır. Yəqin ki, Moskva üçün İsralin ondan bir neçə milyardı necə "qopardığını" görmək o qədər də xoş deyil.

Sözügedən saxta məlumatın yayılması yaxşı düşünülüb və hazırlanıb. Əgər bu yazının harada dərc olunduğunu görsək, müəllifliklə bağlı şübhələr artır. Çünki material "Reqnum" rus-erməni saytında yayılıb ki, bu da sensasiya kimi təqdim edilib.

İsraillilər özləri dərhal materialı saxta adlandırıblar və Bakının bu cür təlaşlı reaksiyasına təəccübləndiklərini gizlətməyiblər. Belə ki, İsrailin Bakıdakı səfiri açıq şəkildə bildirib ki, "Haarets"də belə yazı dərc olunmayıb. Təkzib ediləcək bir şey yoxdur. İsrail tərəfini başa düşmək olar. Çünki saxta məlumat sürətlə yayıldı və Turan agentliyinə də daxil oldu. Və ilk görülən iş materialın səhihliyinin yoxlanması oldu. Təbii ki, heç bir ciddi və qərəzsiz KİV bu cür saxta məlumatı dərc etməz.

Bu hadisə materialların KİV tərəfindən təhlili və qiymətləndirilməsi, mənbə ilə işləmək, əks-təbliğat məsələsində bir neçə zəif nöqtənin olduğunu göstərdi.

Ölkənin müvafiq dövlət strukturları bundan nəticə çıxarmalıdır. Çünki kompromat müharibəsi və elektron təhlükəsizlik məsələsi böyük siyasətin bir hissəsidir.

Belə ki, kiberhücumlar və kibermüharibələr hərbi qarşıdurmanın elementləridir. Bir çox ölkələrin kibertəhlükəsizlik sahəsində xüsusi bölmələri var və bu, daim modernləşdirilir. Yeri gəlmişkən, məhz İsrail bu sahədə böyük təcrübəyə malikdir. -02D-