![Maraq üçün bu əcaib sənədə siz də baxın...](https://turan.az/resized/750/500/resize/media/2012/main/072700006260.jpg)
- Söz istəyirəm
- 27 İyul 2012, 13:04
- 58
Maraq üçün bu əcaib sənədə siz də baxın...
Milli mətbuatımızın yaranmasının növbəti ildönümündən bir həftə ötməyib. Həmin gün həmkarlarıma söylədim ki, bizdə milli mətbuatın yaranması hələ də başa çatmayıb. Mətbuat söz olaraq da toplu bir məfhumdur, mahiyyətinə görə də. Bir-iki müstəqil qəzetlə milli mətbuat mövcud ola bilməz. Bunun radio, TV, qəzetlər, jurnallar, internet portalları kimi müxtəlif seqmentləri var, həm də bir infrastruktur kimi də özünü yaşadan azad iqtisadi sektor olmalıdır. Nəhayət, o, ölkəni doğru informasiyalarla təmin etməli, plüralist rəy və müzakirə mühiti yaratmağı bacarmalıdır.
Bunun hansı var Azərbaycanda? Varsa, niyə “Azərbaycan saatı” televiziya verilişi xaricdən yayımlanır? Yalnız peykdən məhdud yayımı olan bu verilişin vaxtı çatanda bir çox rayonlarda işıqlar sönür. Milli mətbuat varsa, dövlət niyə insanların gözlərini, qulaqlarını bağlamaq istəyir?
Milli mətbuat varsa, niyə Azərbaycanın bircə kəndində də qəzet köşkü yoxdur. Ilk qəzetimiz olan “Əkinçi”nin getdiyi kəndlərə qəzet-jurnal getmir. Əhalinin 47 faizinin kəndlərdə yaşadığı bir ölkədə bu ilginc faktı 100 dəfə səsləndirmişik, amma hər gün inkişafdan danışan hökumətin nümayəndələri bircə dəfə bu haqda danışmaq istəmirlər.
Milli mətbuat varsa, hökumət niyə qəzetlərə pul paylayır, onların özlərinin pulu niyə yoxdur? Milli mətbuat varsa, hanı bizim medianın reklamı? Reklam etməyə bir şeymi tapılmır?
Müstəmləkə dövründə ilk qəzeti yaradan Zərdabini dirildib desən ki, bu gün Azərbaycan müstəqildir və məhz müstəqil dövlətimiz milli mətbuatımızın məhvinə çalışır və onun yaranmaması üçün əlindən gələni edir, Həsən bəy dirilməyinə peşman olardı.
Nəhayət, bizdə milli mətbuat olsaydı, fotosunu təqdim etdiyim bu məktub yazılardımı?
Internet istifadəçilərinin yolladığı həmin məktubu Suraxanı rayon icra hakimiyyətinin müavini adını anonim saxlayan müəssisəsinin rəhbərinə yollayıb (məktubu olduğu kimi təqdim edirəm):
- Nəzərinizə çatdırırıq ki, 2012-ci ilin 1-ci yarımilliyi üçün abunə kampaniyası başlamışdır. Xahiş edirəm rəhbərlik etdiyiniz müəssisədə adları aşağıda qeyd olunan qəzetlərə göstərilən sayda abunəni təşkil edəsiniz:
Azərbaycan - 1 nüsxə;
Xalq - 1 nüsxə;
Yeni Azərbaycan - 1 nüsxə;
Səs - 1 nüsxə;
Iki Sahil - 1 nüsxə;
Bakinskiy Raboçiy - 1 nüsxə;
Politra _____ nüsxə;
Poritet _____ nüsxə;
Kaspi _____ nüsxə;
Həftə Içi _____ nüsxə;
Mövqe _____ nüsxə;
Iqtisadiyyat _____ nüsxə.
Icra hakimiyyəti başçısının 1-ci müavininin 1 noyabr 2011-ci ildə imzaladığı məktubunun sonunda daha bir göstəriş var:
- Abunənin “Kaspi” Mətbuat Yayımı vasitəsi ilə həyata keçirilməsi tövsiyə edilir.
“Kaspi” Mətbuat Yayımının ünvan, əlaqə telefonları və bank hesabı ilə bitən bu məktubun əsl mahiyyətini yəqin hər kəs anladı. Hakimiyyət özünün təsirindən olan, əslində heç kimin oxumadığı qəzetlərə məcburi abunə kampaniyası aparır. Eyni məzmunlu məktub tək Suraxanıda deyil, bütün rayonlarda göndərilir və hər müəssisəyə də gücünə görə müxtəlif abunə öhdəliyi qoyulur. Göstəriş də daha yuxarıdan gəlib.
Bununla da Azərbaycanın bir çox qanunları kobud şəkildə pozulur. Bununla milli mətbuat məhv edilir. Axı bundan sonra hansı mətbuat azadlığından, hansı iqtisadi azadlıqdan, hansı azadlıqdan danışmaq olar?
-
- Siyasət
- 27 İyul 2012 13:15
Söz istəyirəm
-
Gəncə şəhərində ünvanlı sosial yardımın təyinatı ilə bağlı yubanmalar yarandığı deyilir. Gəncə şəhərində yaşayan Hacıyev Vüqar Turana bildirib ki, artıq bir aydan çoxdur ki, ünvanlı dövət sosial yardım üçün Dövlət Sosial Müdafiə Fondunun Gəncə vahid əlaqələndirmə mərkəzinə müraciət etsə də, ona nə müsbət cavab, nə də imtina cavabı verilmir: "Əlaqəndirmə mərkəzinə zəng vurub soruşanda deyirlər ki, VEMTAS sistemi işləmir deyə, müraciətlərə baxılması və cavabların verilməsi mümkün deyil. Bir aydan çoxdur ki, Gəncədən müraciət edən adamlar konkret cavab ala bilmir".
-
Çin hökümətinin başlatdığı Bir yol, bir kəmər layihəsi Çinin müasir tarixinin əsas uğuruna çevrilib. Çin Xalq Respublikasının təşəbbüskarı olan layihəyə tərəfdaş ölkələrdəki fəaliyyəti yalnız ikitərəfli iqtisadi yüksəlişlə məhdudlaşmır, həmçinin Bir yol, bir kəmər-ə üzv olan dövlətlərdə Çinin xarici siyaəstinə dəstəkdir. Əlavə olaraq layihədə üzvlüyü olan ölkələr Çin üçün mühüm təbii resurs mənbəyidir. Azərbaycan da Çinin rəhbərlik etdiyi Bir yol, bir kəmər layihəsinin iştirakçılarından biri olaraq ikitərəfli münasibətlərin tərəqqisində mühüm rol oynayır. Belə ki, Rusiya-Ukrayna müharibəsinin başlanması ilə Rusiya ərazisinin Qərbə çıxışının bağlanmasından sonra Trans-Xəzər Beynəlxalq Nəqliyyat yolu Azərbaycanı əsas ticarət marşurut xətti edib. Həmçinin yaranan şərait qeyri-neft sektorun artırmaq və İkinci Qarabağ Müharibəsindən sonra xarici investisiyanın ölkəyə axınını planlaşdıran Azərbaycan üçün xeyirli nəticələnə bilər. Lakin, Çinlə münasibətlərdəki yalnış siyasət bir çox mənfi təsirlər də vəd edir.
-
İki il əvvəl Biləsuvar Rayon İcra Hakimiyyətinin və Əmək və Əhalinin Sosial Müdafiəsi Nazirliyinin nümayəndələri Birinci Qarabağ müharibəsinin qəhrəmanı, şəhid Şaiq Kəlbiyevin evinə gəliblər və hakimiyyətin bu ailə üçün yeni ev tikmək niyyətində olduğunu bildiriblər.
-
Dəyərli media mənsublarını, peşəkar və vicdanlı jurnalistləri məhbəsdən salamlayıram.
Rəy yaz