Morninqstar, yoxsa Ramiz Mehdiyev?

Bu gün “Haqqın.az” saytında Eynulla Fətullayevin “Morniqstar əliboş qayıdır” yazısını oxudum. Məqalənin sıradan bir yazı olmaması, hakimiyyətin fikirlərini peşəkarcasına oxuculara catdırması şəksizdir. Məqalədəki bəzi həqiqətlərlə razılaşmamaq olmaz. Məhz böyük iqtisadi lahiyələrin reallaşması ərəfəsində ABŞ-ın və Qərb dövlətlərinin insan haqlarına xüsusi münasibətlərini, bəzi səfirlərin bəzi şəxslərə olan münasibətinin beynəlxalq qanunlardan üstün olmasını görməmək mümkün deyil. ABŞ-ın və Qərbin Azərbaycana olan maraqlarının ancaq burada yaşayanların rifahı üçün çalışmalarını düşünənlər yanılırlar. Onların hər ikisini birinci növbədə öz mənfəətləri maraqlandırır. 1995-ci ildən ABŞ və Qərb dövlətlərinin dövlət və ictimai sektoru təmsil edənləri ilə əməkdaşlıq etdiyimdən, ən səlahiyyətliləri ilə səmimi münasibətlərim olduğundan onların maraq və istəkləri mənə çox aydındır. Bu müddət ərzində bir şeyi dəqiq anladım: ancaq öz dövlətinin, millətinin maraqlarını güdənlər onlar üçün o qədər də maraqlı, qrant almayanlar isə etibarlı deyillər. Belələri ilə olan münasibət ancaq ölkədə olan real səhnəni daha yaxşı bilmək üçündür. Bütün qrant verən təşkilatlar hakimiyyətlər tərəfindən idarə olunur və ayrılan qrantlar da məhz həmin hakimiyyətlərin maraqlarına uyğundur.

Bütövlükdə məqalənin mahiyyətini isə çox ziyanlı sayıram. Məqaləni oxuduqca belə təəssürat yaranır ki, gecə-gündüz xalqının rifahı naminə çalışan Azərbaycan hakimiyyətini ABŞ və Qərb nəyin bahasına olursa olsun devirmək istəyir. Az qala Quba, İsmayıllı hadisələrinin də təşkilatçısı Morninqstardır. Həmin hadisələrdə küçələrə çıxanlar da NED-dən və Sorosdan qrant alanlardır. Məqaləni oxuduqca az qalırsan düşünəsən ki, ölkədə tüğyan edən qanunsuzluğun, ədalətsizliyin, məmur özbaşnalığının da arxasında Morninqstar durur. Doğrudanmı məqalənin müəllifi bilmir ki, rayonlardakı məmurlar sakinlərlə kölə kimi davranırlar? Yoxsa Füzuli Ələkbərovların, Bəylər Əyyubovların, Ramiz Mehdiyevlərin, Vasif Talıbovların, Ziya Məmmədovların qohum əqrabalarının yerlərdə törətdikləri özbaşnalıqlardan xəbəri yoxdur. Vasif Talıbovun balalarından birinin “Dədəmin yurdunda oturub, hələ tənqid də edir” kəlamını yəqin ki, eşitməyən olmayıb. Yoxsa Ramiz Mehdiyevin kürəkəni İlham Əliyevin Quba, Qusar ərazisinin az qala yarısını dədə malı kimi özəlləşdirməsini yerli sakinlər sevinclə qarşılayıb?!

Yoxsa milyonlar alıb mandat alveri edən Gülər Əhmədovaya 3 il, azad cəmiyyətdə yaşamaq istəyən gənclərə 8-9 il həbs cəzası verilməsi tapşırığını da məhkəmələrə elə adını çəkdiyim saytda ABŞ-a meydan oxuyan Ramiz Mehdiyev yox, Morninqstar verib?

Bəlkə mən də DİN-in Baş Mütəşəkkil Cinəyatkarlığa Qarşı Mübarizə İdarəsində təhqir olunmağımın, döyülməyimin, ölümlə təhdid olunmağımın da cavabını Qərbdən tələb edim?

Bu suallar bir deyil, on deyil. Bunların cavabını kim verməlidir?

Bir yazıya bu cür münasibət bəsləməyimin səbəbi Dövlətimin üz-üzə dayandığı təhlükələrlə bağlıdır. Ölkəmdə iqtidar - müxalifət qarşıdurmasının artıq qatı düşmənçilik həddində olmasını görməmək mümkün deyil. Bəzilərinin ancaq öz şəxsi ambisiyalarına nəinki Qarabağı, bütün Azərbaycanı qurban verməyə hazır olduğunu, sevincək halda “Putin gəlir, SSRİ bərpa olur” demələrini gördükcə faciənin miqyası daha da böyüyür. Yeni Dünya düzəninin qurulmasında ölkəmin qurban olmasını istəmirəm!

Bu gün Azərbaycana olan həmlələrində bir tərəfdən Rusiya, İranın digər tərəfdə isə ABŞ və Qərb dövlətlərinin öz iqtisadi, siyasi maraqları var. Hər ikisi də öz çıxarları üçün çalışırlar. Sadəcə fərq ondadır ki, Rusiya və İran bu maraqları ancaq hakimiyyətə verdikləri dəstək hesabına təmin etmək istəyirlər. ABŞ və Qərb isə hakimiyyətlə birlikdə cəmiyyətə də dəstək verirlər ki, stabillik olsun. Çünki, ABŞ və Avropa qanunun aliliyi, azad iqtisadiyyət, müstəqil məhkəmə hakimiyyəti olan ölkədə elmi, texniki, intellektual üstünlükləri hesabına öz iqtisadi maraqlarını təmin edəcəklərinə əmindirlər.

P.S. Dövlətimizin inkişafının ABŞ və Qərbə inteqrasiyada görməyənlərin dəlilləri çox maraqlı olardı.