MSŞT ilə bağlı nə baş verir?

Və ya Şəffaflıq Təşəbbüsündə qeyri- şəffaf iştirakçılıq barədə qeydlər...

1. ci yazı)

Son günlər Mədən Sənayesində Şəffaflıq Təşəbbüsü (MSŞT) ilə bağlı ölkəmizdə və dünyada bir sıra hadisələr cərəyan etməkdədir. Heç şübhəsiz bu hadisələrin kulminasiya nöqtəsi qurumun İdarə Heyətinin 25- 26 oktyabrda Astanada keçirilən növbəti toplantısı və həmin toplantıda ölkəmizlə bağlı qəbul edilən qərarlar oldu. Hazırda həm bu qərarlar, həm təşəbbüsün ölkəmizdə indiki və gələcək durumu, həm də vətəndaş cəmiyyətinin bu prosesdə iştirakı müzakirə mövzusudur.

Öncədən qeyd edim ki, bəzi qərəzli yanaşmaları və sui- istifadə hallarını çıxmaq şərti ilə bu müzakirələri faydalı və gərəkli hesab edirəm. Hökümət və hasilat şirkətləri ilə yanaşı mədən sənayesində şəffaflığın artırılması prosesində iştirak edən qurumların, şəxslərin özlərinə ictimai nəzarətin olması normal haldır. Mədən Sənayesində Şəffaflığın Artırılması Koalisiyasının Şura üzvi kimi şəxsən mən bu müzakirələri Şəffaflıq Təşəbbüsünə və təmsil etdiyim Koalisiyaya həm də ictimai maraq və dəstək hesab edirəm. Amma bəzi suallar, məqamlar var ki, onların aydınlaşmasına, cəmiyyətə düzgün çatdırılmasına, həm də nəhayət ki, nəyin niyə baş verdiyini söyləməyə ehtiyac var.

Aparılan müzakirələri və Təşəbbüsün tətbiqi ilə bağlı həyata keçirilən fəaliyyətləri 3 mərhələyə bölmək olar; MSŞT Beynəlxalq İdarə Heyətinin Astana toplantısına qədər olan son 6 aylıq dövr, Toplantı mərhələsi və ondan sonrakı müddətdə gözləntilər....

Astana toplantısına qədər nələr baş verib?

2015-ci ilin aprel ayında MSŞT-nin tətbiqində vətəndaş cəmiyyətinin azad və efektiv fəaliyyətinə şərait yaratmadığına görə Azərbaycan bu qurumda tam hüquqlu üzvlük statusundan namizədlik statusuna endirildi. Bunu şərtləndirən başlıca səbəb ölkədə vətəndaş cəmiyyətinin fəaliyyətinin kəskin surətdə pisləşməsi oldu. Hakimiyyət son illər QHT- lər haqqında olan qanunvericilik aktlarına bir sıra məhdudlaşdırıcı əlavə və düzəlişlər etmiş, QHT- lərlə bağlı cinayət işi açaraq onların bank hesablarına həbs qoymuş, vergi cəriməsi tətbiq etmiş, əksər donorları ölkədən çıxarmış, vətəndaş cəmiyyəti fəallarının bir çoxunu həbsə atmış, bəzilərinin ölkədən çıxışına qadağa qoymuşdu. Baş verən bütün bu proseslər ölkəmizdə Şəffaflıq Təşəbbüsünün həyata keçirilməsi ilə bağlı ixtisaslaşmış yeganə qurum- Mədən Sənayesində Şəffaflığın Artırılması Koalisiyasının fəaliyyət imkanları məhdudlaşmış, Koalisiyanın və Koalisiya üzvü olan bir çox təşkilatların maliyyə mənbəyi yalnız bir donor təşkilatdan- QHT- lərə Dövlət Dəstək Şurasından asılı vəziyyətə düşmüşdü (oxu həm də gətirilmişdi- red.). Təkcə bu ilin əvvəlində Koalisiyaya üzv olan 40- a yaxın təşkilata QHT Şurasından 400 min manata yaxın vəsait ayrılmışdı. Keçən il isə Koalisiyaya adı çəkilən dövlət qurumundan 2 dəfə institusional layihə dəstəyi  verilmişdi. Bu həm də o demək idi ki, hakimiyyətin Koalisiyaya təsir imkanları artmışdı. Məhz həm də onun nəticəsi idi ki, Koalisiya tam müstəqil, normal və ciddi fəaliyyət göstərə bilmir, dişli bəyanat və mövqe sərgiləməkdə çətinlik çəkirdi. Belə bir vəziyyətdə Əsasnaməyə uyğun olaraq vaxt intervalı keciksə də Koalisiya 2016- ci il aprelin 30- da özünün növbəti hesabat seçki yığıncağını keçirdi. Uzun müddət mətbuatın müzakirəsində olan 30 aprel Ümumi Yığıncağı hakimiyyətdən asılı olmayan müstəqil mövqeli vətəndaş cəmiyyəti fəallarının Koalisiya Şurasına üzv seçilməsi ilə sonuclandı. Hakimiyyətin siyasi kursunu müdafiə edən və onların dəstəklədiyi bir çox namizədlər seçkilərdə ugur qazana bilmədi.

Narazılar yeni Şuranın siyasiləşdiyini, Milli Şuranın dəstəyi ilə formalaşdığını (150 üzvü olan Koalisiyada Milli Şuranın cəmi 5 üzvü var ki, onun 1- i qanunsuz həbs həyatı yaşayır- red.) iddia edərək növbədənkənar Ümumi Yığıncağın keçirilməsi təşəbbüsü ilə çıxış etdilər (http://www.xural.com/msst-koalisiyasinda-n%C9%99-bas-verir/). Heç bir pozuntunun qeydə alınmadığı, kifayət qədər demokratik, şəffaf və ciddi rəqabət əsasında keçən seçkilərin nəticələri kimsədə şübhə doğurmadı. Nəticələri hamı tanıdı və qəbul etdi. Amma ciddi rəqabət əsasında seçilən yeni müstəqil Şura üzvlərini nə qədər qəribə olsa da hakimiyyət və hakimiyyət mətbuatı ilə yanaşı özünü müxalifət hesab edən bəzi təşkilatlar və onlara yaxın mətbuat orqanları da hədəfə aldı. Yeri gəlmişkən qeyd edək ki, bu təhlükəli tendensiya bu gün də davam edir. Bilmək olmur ki, bunlar kimin əmisi oğludur. Bu barədə bir az sonra qeyd edəcəm. İşin qəribə və maraqlı tərəfi odur ki, hakimiyyətin Koalisiyadakı təmsilçilərini dəstəkləyən və onların dəstəyi ilə Şuraya seçilmək istəyən şəxslərin bir çoxu məhz həmin “müxalif” qurumların təbliğatçıları və silahdaşlarıdır.

Hakimiyyət yarıdan çoxu müstəqil vətəndaş cəmiyyəti fəallarından ibarət olan yeni Şuranı təkcə öz adamları vasitəsi ilə hədəfə alıb onları təhdid və şantajla, həbs hədəsi ilə ram etmək istəmədi. Eyni zamanda özünün və müxalif media görüntüsü olan bir sıra mətbuat orqanlarının gücüylə onları ləkələməyə, nüfuzdan salmağa çalışdı. Yeni Şuranın fəaliyyətini məhdudlaşdırmaq, onu  iqtisadi baxımdan sıxmaq üçün QHT- lərə Dövlət Dəstək Şurasından Koalisiyanın institusional fəaliyyətinin təşkili üçün ayrılmış 15 min manatlıq layihə məhz həmin Şura üzvlərinə görə heç bir səbəb göstərilmədən, izahat verilmədən maliyyələşdirilməkdən imtina edildi.

Ümumi Yığıncaqdan bir müddət sonra, iyun ayının əvvəlində MSŞT Beynəlxalq Katibliyin regional direktoru Dyveke Roganın rəhbərliyi ilə məlumat toplama və məsləhətləşmə missiyası İslahedici Planın yerinə yetirilməsi vəziyyətini  öyrənmək üçün Bakıya səfər etdi. Yeni seçilmiş Şura üzvləri ilə görüşdü. Ölkədəki ictimai- siyasi durum, vətəndaş cəmiyyətinin problemləri ilə bağlı açıq və geniş fikir mübadiləsi oldu. Qonaqlara izahlı məlumatlar verildi. Səfərdən bir müddət sonra Missiya Azərbaycanla bağlı geniş, əhatəli, obyektivliyə yaxın hesabat hazırlayıb həmin sənədi maraqlı tərəflərə və o cümlədən Azərbaycan hakimiyyətinə təqdim etdi. Məhz həmin hesabatda görülən işlərlə yanaşı ölkəmizdə İslahedici Planın tam yerinə yetirilmədiyi, vətəndaş cəmiyyətinin problemlərinin ağır olaraq qaldığı qeyd olundu. Bu bilgilər məhz missiya üzvlərinə vətəndaş cəmiyyətini təmsil edən Koalisiya Şurasının 6 nəfər üzvünün və bu mövqeyi paylaşan Koalisiya üzvlərinin verdiyi real, obyektiv məlumatlar əsasında qeydə alınmışdı. Hakimiyyəti Koalisiyada və Şurada təmsil edən, eyni zamanda onun müxalifətdə və “ziyalı təbəqəsi”-ndə olan təmsilçiləri isə missiya üzvlərinə bizim mövqeyimizlə daban- daban zidd məlumatlar verir, ölkədə vətəndaş cəmiyyətinin problemlərinin həll olunduğunu, bizlərin siyasiləşdiyini və qərəzli danışdığını iddia edirdilər (!?)

Missiyanın hazırladığı MSŞT Qiymətləndirmə Hesabatı barədə

Yuxarıda qeyd olunduğu kimi İslahedici Planın yerinə yetirilmə vəziyyətini öyrənmək üçün ölkəmizə səfər edən MSŞT Katibliyinin Qiymətləndirici missiyası ölkədə vətəndaş cəmiyyətinin problemlərinin əks olunduğu reallığa yaxın hesabat hazırladı. Hesabatdan bəzi qeydləri təqdim edirik;

• Koalisiyanın üç üzvü həbs olunma qorxusundan ölkədən kənarda yaşayır.
• MHŞT tədbirlərinin əksəriyyəti “müəyyən formada hökumətin nəzarəti altında qalmaqdadır və hökumət tərəfindən təsdiqlənməlidir.”
• Vətəndaş cəmiyyətin vəziyyəti, həmçinin, təbii ehtiyatların idarə olunması məsələləri ilə əlaqədar fikir bildirdikdə vətəndaş cəmiyyətin nümayəndələri “müəyyən qisas və ya təhdid qorxusu” ilə üzləşir;
• Bəzi nümunələrdə vətəndaş cəmiyyətinin MHŞT prosesində əhəmiyyətli dərəcədə cəlb edilən nümayəndələri MHŞT prosesi ilə əlaqədar fikirlərini bildirdiklərinə görə hədə-qorxu ilə üzləşmişdir;
• Vəsait çatışmazlığı və məhdudlaşdırıcı mühit QHT-lərin düşündüklərinə görə MHŞT-in səbəb olduğu vətəndaş cəmiyyətinin fəaliyyət sahəsində Koalisiyanın fəaliyyətinə təsir göstərən maneə yaratmışdır;
• Daxili gərginlik “Koalisiyanın parçalanması dərəcəsinə qədər yüksəlmişdir” və s.

Hesabatda QHT- lər haqqında qanunvericilik aktlarına edilən məhdudlaşdırıcı əlavə və düzəlişlərin ictimai birliklərin fəaliyyətini çətinləşdirdiyini, xüsusən onların vəsait əldə etmə imkanlarını xeyli azaltdığını, QHT- lərin qeydiyyat problemindən əziyyət çəkdikləri, bank hesbalarına həbs qoyulması, vergi cəriməsi tətbiq olunması və digər problemlər sadalanıb. Bax Qiymətləndirmə Hesabatı, 3- cü bölüm; file:///C:/Users/help/Downloads/AZ_Validation-Report_SDSG_AZR%20(1).pdf

Yeri gəlmişkən Qiymətləndiricinin hesabatında da hakimiyyətin Koalisiyaya təsir imkanlarını artırdığını, Koalisiyada hakimiyyət və müxalifət yönlü olmaqla 2 tərəfin olduğu bildirilir;  “Yığıncaqdan  sonra  siyasi müxalifətdən hesab edilən şəxslərlə hökumətdən hesab edilən  şəxslərin  arasında  gərginlik  artmışdır. Qısaca  desək, birincilər  əksəriyyət tərəfindən  əsasən  gündəlikdə müxalifət  ilə  əlaqədar  siyasi  məsələlərə  xidmət  göstərən  tərəflər  kimi  qəbul edildiyi  halda sonuncular  hökumətin  iqtidaryönlü şəxslərin vasitəsilə Koalisiyaya nüfuz etmək və onu zəiflətmək cəhdi kimi qəbul edilmişdir.  Qiymətləndirmə üçün məlumatlar toplandığı zaman bu ixtilaf Koalisiyanın dağılması səviyyəsinədək  gərginləşmişdir” (file:///C:/Users/help/Downloads/AZ-Azerbaijan-draft-report-on-initial-data-collection-and-stakeholder-consultations%20(1).pdf). 

Sənəddə qeyd olunduğu kimi Koalisiya daxilində gərginlik qurumun parçalanmasına qədər artıb. Çox maraqlıdır ki, növbədənkənar Ümumi Yığıncağın keçirilməsi, bununla da Koalisiyanın parçalanmasını stimullaşdıranlar daha çox hakimiyyətin Koalisiyadakı təmsilçiləri və onları müdafiə edən “müstəqil” və “müxalif yönlü”  şəxslərdir. Təsadüfi olmasa da “parçalanma” çağırışlarını səsləndirən təşəbbüskarlar arasında bir ayağı hakimiyyət dəhlizində, bir ayağı demokratik camiyədə olan, “milli birlik” şüarı səsləndirən bir çox simalar yer alıb.

Koalisiya Şurası dövlət başçısına niyə müraciət etdi?

Missiyanın hazırladığı hesabatı beynəlxalq Qiymətləndirici dəyərləndirərək daha da sərtləşdirib  MSŞT İdarə heyətinə təqdim etdi. Təbii ki, bütün bunlar Koalisiyanın müstəqil kəsiminin  mövqeyində haqlı olması və beynəlxalq səviyyədə dəstəklənməsi demək idi. Bu gedişat Azərbaycanın MSŞT prosesindən fəaliyyətinin dayandırılmasına gətirib çıxara bilərdi. Bu “dayandırma”-nın Azərbaycana və vətəndaş cəmiyyətinə xeyrindən çox zərər verəcəyinə əmin olduğumuzdan bəzi addımlar atmağı qərara aldıq. Bu addımlardan biri məhz Koalisiya üzvlərinin təklifi ilə dövlət başçsına müraciət edib 25 oktyabrda Astanada keçiriləcək MSŞT İdarə Heyəti öncəsi Azərbaycanda vətəndaş cəmiyyətinin problemlərinin həlli ilə bağlı addımlar atmasının vacibliyini bir daha onun diqqətinə çatdırmaq idi. Uzun sürən müzakirələrdən sonra Koalisiya Şurasının 06 oktyabr tarixli iclasında bu müraciət qəbul olundu. Müraciətdə QHT- lər haqqında qanunveiciliyə edilmiş məhdudlaşdırıcı düzəlişlərin vətəndaş cəmiyyətinin fəaliyyətinə ciddi manelər yaratdığı qeyd olunur, Koalisiya üzvlərinin üzləşdiyi problemlər vurgulanırdı. Sənəddə deyilir; “MSŞA QHT Koalisiyasının iki üzvü (Asif Yusifli və Fuad Qəhrəmanlı- red.) müxtəlif səbəbdən hələ də həbsdədir. Ən pisi də odur ki, QHT-lərin fəaliyyətini tənzimləyən qanun və normativ sənədlərdə son illər ərzində edilən məhdudlaşdırıcı xarakterli əlavə və dəyişikliklərdən sonra hüquqi mühit daha da pisləşmişdir. Azərbaycan hakimiyyətinə təqdim olunan islahedici planın icraya başlamasından 1 il 6 ay ötməsinə baxmayaraq, orda nəzərdə tutulan bəzi fəaliyyətlər indiyədək yerinə yetirilməyib. Bu isə Azərbaycanın MSŞT-də tam hüquqlu üzv statusunun geri alınmasında ciddi çətinliklər yaradır”. (http://www.xural.com/m%C9%99d%C9%99n-s%C9%99nayesind%C9%99-s%C9%99ffafligin-artirilmasi-qht-koalisiyasi-prezident%C9%99-muraci%C9%99t-edib/)

Haşiyə. Bəzi şəxslərin bir ay öncə qəbul olunmuş bu müraciəti oxuyub tanış olmadan indi cəmiyyətə az qala vətənə xəyanət kimi təqdim etmək cəhdi başdan- ayağa qərəz olmaqla yanaşı həm də siyasi korluqdur. Bu sənəd Koalisiya Şurasında müzakirə edilərək qəbul olunub. Problemlərin sadalandığı və həlli istənildiyi bir sənədin dövlət başçısına göndərildiyini az qala prinsipsizlik və xəyanat kimi təqdim edənlər yaxşı olar ki, özlərinə və keçdikləri yaxın dövrə baxsınlar. Bir də həmin müraciəti qəbul edənlərin keçdiyi yola.

Qeyd. Nə olursa olsun Koalisiya Şurasını qaralamağı qarşısına məqsəd qoyanlar, məktubdan bixəbər olanlar  iddia edir ki, niyə həmin sənəddə Asif Yusiflinin həbsdən azad olunması qeyd olunmur. Bu bixəbərlər və başdan- ayağa siyasi qərəz içində olanlar bilmirlər ki, həmin müraciət elə həm də Asif Yusifli və Fuad Qəhrəmanlıya görə dövlət başçısına ünvanlanıb. Sual oluna bilər; yalançı Asif Yusifli sevdalıları, niyə indiyə qədər bir kəlmə də olsun onun qanunsuz həbsi barədə yazmamısınız? Niyə bir dəfə də olsun bu cəsur, vətənpərvər Qarabağ qazisinin məhkəməsində iştirak etməmisiniz? Ona qarşı edilən haqsızlığa, ayrı- seçkiliyə etirazınızı bildirməmisiniz, onun ailəsini yada salmamısınız? Budurmu sizin Asif Yusifliyə diqqət və dəstəyiniz? Niyə indiyə qədər Koalisiyanın rəsmi sənədlərində Asif Yusifli və Fuad Qəhrəmanlının qanunsuz həbsi ilə bağlı mövqe ifadə olunmayıb? Niyə sizlərin orda- Koalisiyanın Şurasının üzvü olmuş və ondan da yuxarı qurumda Çoxtərəfli Qrupda hazırda təmsil olunan “müstəqil” və “ədalətli”, “haqq carçısı olan” dostlarınız, “ziyalı” silahdaşlarınız bir dəfə də olsun onları müdafiə etməyiblər? Görəsən hardadır Azərbaycanın ziyalı QHT rəhbərləri, yazarları, publisistləri, “görkəmli” hüquq müdafiəçiləri? Niyə onların səsi gəlmir? Qarabağ qazisini şərləyib qanunsuz həbsdə saxlayırlar. Qiyas İbarimovu heykələ yazı yazdığı ilə bağlı  bədəli inzibati cəza olan hərəkətinə görə ona 10 il cəza verirlər, ancaq bizim ziyalıların səsi çıxmır. Görəsən niyə? Amma indi bizi Asif Yusiflini niyə müraciətdə “unutduğumuza” görə ittiham edirlər. Belə yerdə deyirlər; utanmasan oynamağa nə var ki?

Beynəlxalq təşkilatların çağırışı...

Astanada 25- 26 oktyabrda keçirilən MSŞT İdarə Heyətinin toplantısına bir neçə gün qalmış, konkret olaraq  oktyabrın 19- da dünyanın 18 nüfuzlu beynəlxalq təşkilatı MSŞT İdarə heyətinə müraciət edərək Azərbaycanda vətəndaş cəmiyyətinin təqiblərə məruz qaldığı, Koalisiyanın 3 üzvü haqqında cinayət işi olduğu, Koalisiyanın üzvləri Asif Yusiflinin və Fuad Qəhrəmanlının qanunsuz həbsdə olduğu, mənim haqqımda qondarma cinayət təqibinin davam etdiyi, 3 üzvün (Zöhrab İsmayıl, Elçin Abdullayev və Səbuhi Qafarov) ölkəni tərk etdiyi və digər problemləri qeyd edərək Azərbaycanı Təşəbbüsdən çıxarmağa çağırdı (http://www.azadliq.info/161460.html)

İlk dəfə beynəlxalq sənədlərdə Asif Yusifli və Fuad Qəhrəmanlı MSŞA Koalisiyasının üzvü kimi təqdim edilir, onların qanunsuz həbsdə olduğu, digərlərinin isə ölkədən didərgin salındığı bildirilirdi.  Freedom House, Human Rights House Foundation və s. kimi nufuzlu təşkilatların imzaladığı bu bəyanatın meydana gəlməsində Koalisiya Şurası üzvlərinin prinsipial mövqeyi və bu mövqeyi bölüşən Koalisiya üzvlərinin MSŞT katibliyinə və beynəlxalq təşkilatlara təqdim etdiyi obyektiv və operativ məlumatlar böyük rol oynadı. Çünki bu sənəddə qeyd olunan məlumatların çoxu MSŞT katibliyinin bizim məlumatlarımız əsasında hazırladığı Hesabatda yer almışdı. Yeri gəlmişkən qeyd edək ki, öncəki illərin heç birində Azərbaycanla bağlı beynəlxalq təşkilatlardan MSŞT İdarə heyətinə bu səpkidə açıq, sərt və birmənalı çağırış göndərilməyib. Bu çağırış həm də Koalisiya Şurasının hazırkı mövqeyinin daha da sərtləşdirilmiş şəkildə müdafiəsi demək idi. Amma təəssüflər olsun ki, məlum dairələr və onların “müxalif” bağlantıları bu çağırışlara etiraz edir, etiraz edə bilməyənlər isə onu məzhəkə obyektinə çevirib lağ- lağ etməyə  cəhd göstərdilər.

 Koalisiya Şurasının MSŞT İdarə heyətinə müraciəti və son qərar...

Astana toplantısına bir neçə gün qalmış qərarlaşdıq ki, Beynəlxalq İdarə Heyəti üzvlərində  bizim mövqeyimizi, ölkədə vətəndaş cəmiyyətinin real durumunu ifadə edən sənəd olsun. Koalisiya Şurasına 2 sənəd təqdim olundu. Kaolisiya üzvləri Sabit Bağırov və Əliməmməd Nuriyev tərəfindən təqdim olunan sənəddə Azərbaycanda vətəndaş cəmiyyətinin və Koalisiya üzvlərinin problemlərinin həll olunduğu vurğulanır və ölkəmizin MSŞT- yə üzvlüyünün bərpa olunması xahiş olunurdu. Bu təklifi 11 Şura üzvündən 5 nəfəri dəstəklədi. Digər sənəd isə bizim tərəfimizdən təklif olundu. MSŞT İdarə heyətinə ünvanlanan həmin müraciətdə rəsmi Bakının İslahedici Planı tam yerinə yetirmədiyi, vətəndaş cəmiyyətinin problemləri həll olunmadığı üçün ölkəmizin Təşəbbüsdə hələ ki namizəd statusunda saxlanması və əlavə vaxt verib İslahedici Planın yerinə yetirilməsi üçün Azərbaycana yüksək səviyyəli missiya göndərilməsi xahiş olunurdu. Koalisiya adından bizim müraciət rəsmi sənəd kimi İdarə heyətinə təqdim edilsə də digər 5- liyin, eləcə də bəzi Koalisiya üzvlərinin müraciətləri də “zəhmətkeş məktubu” kimi anoloji unvana göndərildi. Təəssüf ki, bizim bu mövqeyimiz MSŞT ilə bağlı Çoxtərəfli Qrupda təmsil olunan, özlərini “müstəqil” və “demokrat”, “prinsipial” vətəndaş cəmiyyətinin təmsilçisi kimi təqdim edənlər tərəfindən təqdir edilmədi, dəstəklənmədi. Mən bu məsələdə hakimiyyət təmsilçilərinin və bu kursu müdafiə edənlərin mövqeyini daha normal və sədaqətli mövqe kimi dəyərləndirirəm. Amma özünü müxalifətçi, ziyalı, müstəqil QHT hesab edənlərin hakimiyətin mövqeyindən çıxış etməsini anlamaq olmur. Çox təəssüf ki, yenə də özünü müstəqil və müxalifət hesab edən bəzi partiya və təşkilatlar ölkə reallığından çıxış edən bizləri hədəfə alıb, hakimiyyətin imitasiya oyununda iştirak edən, ona dəstək verən dostlarını müdafiə etdilər və yenə edirlər (!?).

Hakimiyyət də öz növbəsində beynəlxalq ictimaiyyətin, MSŞT İdarə Heyətinin münasibətini yumşaltmaq üçün Astana toplantısı öncəsi bəzi addımlar atdı. Xarici donorlar tərəfindən Azərbaycan Respublikasının ərazisində qrantların verilməsi prosedurunda “bir pəncərə” prinsipinin tətbiq olunması ilə bağlı dövlət başçısı tərəfindən fərman imzalandı  (http://www.president.az/articles/21504). Koalisiyanın üzvü olan, qeydiyyatdan keçməyən 17 təşkilatın qeydiyyatına başlanıldı. Daha çox yerli və beynəlxalq sənədlərdə adı keçən şəxslərdən biri olaraq mənim haqqımda olan cinayət işinə xitam verildi. Hakimiyyət Astanadan müsbət qərar əldə etmək üçün lobbiçilərini işə saldı. ARDNF- nun icraçı direktoru Şahmar Mövsümovun timsalında İdarə Heyətinin toplantısına nümayəndə heyəti göndərdi.

Amma bütün cəhdlərə baxmayaraq MSŞT üzrə Beynəlxalq İdarə Heyəti hakimiyyətin və onun lobbiçilərinin deyil, məhz bizim- müstəqil vətəndaş cəmiyyətinin mövqeyini ifadə edən, Koalisiya Şurasının məlum müraciətinə uyğun qərar qəbul etdi. Hakimiyətin imitasiya oyununa getmədi.  MSŞT çərçivəsində Azərbaycanı namizədlik statusunda saxlayaq mart ayına kimi İslahedici Planın yerinə yetirilməsi üçün rəsmi Bakıya əlavə vaxt verdi. Əks təqdirdə ölkəmizi qurumdan xaric edəcəyini bildirdi (http://www.azerfax.az/news_9523.html).

Haşiyə. Biz Azərbaycanın Mədən Sənayesində Şəfaflıq Təşəbbüsündə qalmağında maraqlı olmuşuq, bu gün də o fikirdəyik. Ölkəmizin bu Təşəbbüsdə qalmasını ən azından vətəndaş cəmiyyəti üçün kiçik şans kimi qiymətləndiririk. Amma biz bu şansın vətəndaş cəmiyyətinin boğulması, hakimiyyətin yalançı şəffaflıq və hesabatlılıq imitasiyası etməsi hesabına başa gəlməsini istəmirirk. Bu bizim öncədən mövqeyimizdir və yəqin ki bundan sonra da belə olacaq (http://contact.az/docs/2016/Chetin%20sual/102500172813az.htm?22#.WBqDtC197cd)

 (Ardı var)