Parlamentin 100 illiyi

Bunlar yolun düzünü qoyub əyrisi ilə getməyə adət ediblər. Uşaqdan böyüyə hamı bilir ki, Azərbaycan parlamenti 1918-ci ilin dekabr ayının 7-də, günorta saat 1:25-də açılıb. Həmin mübarək gün ölkəmizdə parlamentarizmin başlandığı, parlament üsul-idarəsinin əsasının qoyulduğu gündür. Həmin tarixi qoyub parlamentin 100 illiyini sentyabrın 21-də keçirirlər. Ya bunlar o qədər savadsızdırlar ki, içərilərdə ilk parlamentin açılış gününü bilən yoxdur, ya da payız üçün yenə hansısa bir növbədənkənar qəfil planları var. Milli qürur yerinə çevrilmiş parlamentin yaranmasının 100 illiyini sentyabrın 21-də keçirmək onu gerçək tarixindən ayırıb ələ salmaq, bu böyük tarixi hadisəni millətin yaddaşında dolaşıq salmaq deməkdir. Parlamentin yüz illiyini görüntü üçün qeyd edirlər, amma həmin parlamenti yaradan bircə kişinin də adını çəkmirlər. Sankı parlamentin ilk sədri Əlimərdan bəy, onun birinci müavini Həsən bəy Ağayev, Məclisin katibi Rəhim bəy Vəkilov, ən böyük fraksiya rəhbəri Məhəmməd Əmin Rəsulzadə heç lmayıb. Hər şey Millət Məclisinin yaranmasından 5 il sonra dünyaya gəlmiş Heydər Əliyevlə başlayıb. Dünənki toplantıda da parlamenti yaradanlar, bu ölkədə parlamentar idarənin başlanğıcını qoyanlar qaldı bir tərəfə Heydər Əliyevin sovet dövründəki xidmətlərinin tərifi ərşü-əlayə qalxdı. Əlimərdan bəy Topçibaşov kimi mükəmməl bir şəxsiyyətin yerində Oqtay Əsədov, Fətəli xan, Nəsib bəy kimi xalqın haqı və hüququnu milli ideallarına çevirmiş dövlət adamlarının yerində İlham Əliyev, Novruz Məmmədov kimi təsadüfi adamların oturduğu bir hakimiyyətdən bundan artığın gözləməyə də dəyməz. Hələ görün dünənki çıxışında İlham Əliyev nə deyir? O, deyir ki, 1918-1920-ci illərdə Azərbaycan hökumət ölkə ərazisinə tam nəzarət edə bilmirdi. Və guya 140 milyard dollara yaxın neft gəlirlərinin axırına çıxmış, 5 milyarda dollar dəyərində Rusiyadan (otqatla birlikdə), bir o qədər də İsraildən silah və hərbi sursat almış İlham Əliyev 25 ildir işğal altında olan torpaqları düşmən tapdağından azad edib ölkənin bütün ərazisinə tam nəzarət edir. Adam yaddan çıxarır ki, 10 il atasının, 15 il də özünün bacarmadığı bir işə Cümhuriyyət hökuməti 6 ayda nail oldu, Qarabağın dağlıq hissəsində məskunlaşmış ermənilər öz qurultaylarını çağırıb Azərbaycan hökumətinə tabe olmaq haqqında qətnamə qəbul etdilər, boş xəzinə, yeni formalaşan ordu və sınıq-salxaq silahla 98 min kv.km ərazidə Azərbaycanın suverenliyi təmin edildi, hökumət bu ərazidə tam nəzarəti bərqərar etdi, əlavə olaraq 16 min kv.km əraziyə də iddialarını qoydu ortaya.Çünki həmin hökumətdə heç kimin ağlına gəlmirdi ki, Hərbi Nazirliyin büdcəsin, ölkənin müdafiə ehtiyacları üçün ayrılmış vəsaitləri ofşor hesablara keçirsin. Ona görə də 15 ildir İlham Əliyəv Xalq Cümhuriyyəti hökumətinin nəzarətində olmuş bu böyük ərazidən vur-tut 66,4 min kv.km-ni talamaqla məşğuldur. İndi bildinizmi Cümhuriyyət hökumətinin uğurlarına qısqanclığın, milli hökumət qurucularının işıqlı adlarına, milləti diri axlayan əməllərinə ögey münasibətin kökündə nə dayanır? Cümhuriyyət dəyərlərin bu kriminallardan, oğrulardan, ailə-klan təmsilçilərindən, XXI əsrdə nepotizm düşkünlərindən qorumaq lazımdır, bəylər!