RÜSTƏM İBRAHİMBƏYOVUN DÖVLƏT BAŞÇISINA MÜRACİƏTİ

Azərbaycan Respublikasının prezidenti, zati-aliləri, cənab İlham Əliyevə Möhtərəm cənab prezident, Bir neçə gün əvvəl Bakıda "Müstəqil Demokratik Dövlət quruculuğunda Azərbaycan ziyalılarının rolu: tarixi təcrübə və müasirlik" mövzusunda ictimai dinləmələr keçirilib. Azərbaycanın mədəniyət və elm xadimləri , ictimai birliklərin və vətəndaş cəmiyyəti institutlarının rəhbərləri Azərbaycanda dünyəvi, liberal, demokratik ideya və ənənələrin formalaşması və bərqərar olmasında, müsəlman şərqində ilk parlament tipli demokratik respublikanın yaradılmasında və inkişafında, sovet hakimiyyəti dövründə milli özünəmənsubluq və milli özünüdərkin qorunmasında, dövlət müstəqilliyinin bərpası və totalitar ideologiyadan azad plüralist cəmiyyətə keçid zamani Azərbaycan maarifçilərinin, ziyalılarının əhəmiyyətli rolunu müzakirə ediblər. Hazirda bizim bəzi problemlərlə bağlı qayğılarımızı, həmçinin ölkəmizin stabil, demokratik inkişafına ziyalı dəstəyinə yönəlmiş gələcək məqsəd və planlarımızı, keçirilmiş müzakirələrin yekunlarını özündə ehtiva edən xüsusi müraciət hazırlanır. Hörmətli cənab prezident, Müzakirə olunan bir çox məsələlərlə yanaşı ictimai dinləmələrin iştirakçıları həbsdə olan jurnalist Eynulla Fətullayevin və iki gənc blogerin - Adnan Hacızadə və Emin Millinin azad olunması barədə sizə müraciət olunması ideyasını səsləndiriblər. Bu təkliflər toplantı iştirakçıları tərəfindən dəstəklənib və bizim ümumi fikrimizin sizin diqqətinizə çatdırılması zərurəti yaranıb. Hesab edirik ki, söz və özünü ifadəetmə azadlığı stabil, demokratik və çiçəklənən Azərbaycanın qurulması, ölkənin uğurlu modernləşməsinin fundamental əsaslarindan və şərtlərindən biridir. Sizin Azərbaycan milli mətbuatının 135 illiyinin qeyd olunması ilə əlaqədar imzaladığınız sərəncamda haqlı olaraq müstəqil Azərbaycan mətbuatının ölkədə maarifçilik, liberalizm, dünyəvi, demokratik dövlətçilik ideyalarının yayılması və möhkəmlənməsində rolu qeyd olunub. Əlbəttə, bu o demək deyil ki, jurnalistlərin yazdığı hər şey həqiqətə uyğundur, ədalətlidir, obyektivdir və onlarla hökmən razılaşmaq lazımdır. O cümlədən, bizim müzakirələrimiz zamanı qeyd olunduğu kimi, bu, həm də yuxarıda adları çəkilən şəxslərin bir sıra yazılarına aiddir. Ancaq biz əminik ki, fikir toqquşmaları və ictimai konsensus axtarışları, ictimai rəyin nəzərə alınması ölkəmizin uğurlu inkişafı, həmçinin müstəqil KİV-in, yüksək peşəkar Azərbaycan jurnalistikasının formalaşması istigametində çətin də olsa, yeganə düzgün yoldur. Təqiblər, jurnalistlərin həbs olunması bu sahədə vəziyyəti yaxşılaşdırmır, cəmiyyətdə əlavə gərginlik doğurur, həmçinin ölkəmizin beynəlxalq imicinə böyük zərbə vurur. Yuxarıda qeyd olunanları nəzərə alaraq, toplantı iştirakçılarının qərarına müvafiq, sizdən xahiş edirik ki, bütün konstitutsion səlahiyyətlərinizdən istifadə edərək həbsdə olan jurnalist Eynulla Fətullayevin və gənc blogerlər - Adnan Hacızadə və Emin Millinin azad olunmağına kömək edəsiniz. Hörmətlə, Rüstəm İbrahimbəyov toplantının sədri