VAŞİNQTON BAZARINDA QİYMƏTLƏR

BAKI/13.09.10/TURAN: Emil Fərhadoğlu bloqunda (emilgala.wordpress.com/2010/09/08/vasinqton-bazarindaki-qiymətlər/#) Azərbaycan vətəndaşları üçün maraq kəsb edən məqalə yazıb. O Vaşinqtonda ərzaq məhsullarının qiymətlərini, Amerika və Azərbaycanda əhalinin illik gəliri və orta aylıq əmək haqlarını müqaisə edib. Müəllif Vaşinqtondakı mağazalarda satışda olan ərzaq məhsullarının qiymətləri əks olunan fotoları da bloqunda yerləşdirib. Məqaləni və şəkilləri təqdim edirik:
Son günlər Bakıda yaşayan dost-tanışla təmaslarda ən çox danışılan mövzu Azərbaycanda ərzağın qiymətləri olub. Yenicə bazardan qayıtmış bir tanışım bazarda qiymətlərin od tutub yanmasından şikayət edir və məndən təkidlə yaşadığım ABŞ paytaxtında pomidor, xiyar və s. bu kimi ərzaqların qiymətlərini soruşurdu. Müqayisədə Bakıdakı qiymətlərin Vaşinqton bazarındakı qiymətlərdən baha olması nəticəsinə gəldi. Azərbaycandakı qiymətləri faktlarla sizin nəzərinizə çatdıra bilməsəm də, (siz bunu məndan daha yaxşı və daha tez edə bilərsiniz) qərara aldım ki, Vaşinqton bazarındakı gündəlik tələb olunan ərzaqların qiymətlərini oxucuların nəzərinə çatdırım. Bakı bazarındakı qiymətlərlə müqayisəni isə oxucuların üzərinə buraxıram. Qiymətlərin cədvəlini yazmamışdan əvvəl bir neçə qısa qeydi oxucuların nəzərinə çatdırmaq istərdim. Bu qeyd sizin qiymətlər arasında müqayisə aparmağınıza kömək edər.
Vaşinqton şəhərində əhalinin sayı 2009-cu ildə qeydə alınmış statistikaya görə, təxminən 600 000 nəfərdir, yəni Gəncə şəhərinin əhalisi qədər. 2008-ci ilin statistikasına görə isə, əhalinin orta illik gəliri 57 936 dollardır. Bu, orta aylıq əmək haqqının 4 828 dollar olduğuna işarə edir.
Prezidentin bu yaxınlarda imzalanmış son sərəncamı ilə Azərbaycanda minimum pensiya həddi 85 manata, təxminən 100 dollara qaldırılıb. 2010-ci ildə Azərbaycan Dövlət Statistika Komitəsinin son açıqlamasına görə, ölkədə orta aylıq əmək haqqı 315 manat 20 qəpik (təxminən 374 dollar) təşkil edir. Bu da orta illik gəlirin 3 782 AZN (təxminən 4 502 dollar) olması deməkdir.
Nəticə etibarilə bir Azərbaycan vətəndaşının bir illik gəlirinin Vaşinqtonda yaşayan bir şəxsin bir aylıq əmək haqqısından az olması qənaətinə gəlmək olar. Bəs görəsən Bakıdakı qiymətlər də Vaşinqtondakı qiymətlərdə 12 dəfə ucuzdurmu? Müqayisəni özünüz aparın!
ABŞ-da çəki vahidi pound (lb) olduğuna görə qiymətləri bu ölçü vahidi ilə yazmaq məcburiyyətindəyəm. Şəkildəki qiymətlər də poundla göstərilib. Nəzərinizə çatdırım ki, bir pound (lb ) təxminən yarım kiloqrama bərabərdir. Beləliklə, Vaşinqton bazarında ərzaq qiymətləri;
TƏRƏVƏZ
Pomidor - $ 1.29
Xiyar - $ 1.99
Bibər - $ 1.29
Kartof - $ 1.29
Soğan - $ 0.79
Kələm - $ 0.49
Göbələk - $ 1.29
MEYVƏ
Üzüm - $ 1.79
Qarpız -$ 3.99 (1 dənəsi)
Alma - $ 0.89
Armud - $ 1.29
Şaftalı - $ 0.99
Gavalı - $ 1.29
Kivi - $ 1 (3 dənəsi)
Banan - $ 0.49
Ananas - $ 2.99 (1 dənəsi)
Limon - $ 1 (4 dənəsi)
ƏT MƏMULATLARI
Mal əti (sümüksüz) - $ 3.99
Mal əti (çəkilmiş) - $ 1.99
Qoyun əti - $ 5.99
Toyuq əti - $ 1.19
Qeydləri götürdüyüm ərzaq qiymətləri bunlar oldu. Amma sizi maraqlardıran mən unutduğum digər ərzaqlar da varsa çəkinmədən qiymətləri sorusa bilərsiniz.
Mənim üzərimə düşən bu qədər. Sizin üzərinizdə isə yalnız müqayisə etmək qalır. Yol sizindir, buyurun!
Yuxarıdakı slaydşou hər şeyi aydınca göstərir.
Çalışaq MAT qalmayaq!
"Qiymətli" fotolar: