Tanınmış Türk rəssamı: “Azərbaycanın rəsm sənətini də sənətkarlarını da çox sevirəm”

Turan: Sənətə necə başladınız?

Taştekin: Sənətə lap uşaq yaşlarımda başladım.

Turan: Harda?

Taştekin: Çıldırın Akçit kəndində.Kiçik bir kənd idi.O vaxt Sovet İttifaqı ilə sərhəddə idi,indi Gürcüstan sərhədindədir.Kəndin heç bir tərəflə əlaqəsi yox idi.Sənətə olan sevgi mənə haradan gəldi?Onu bilmirəm, hələ də düşünürəm.Kənddə tablo yox, foto yox, atamın şəxsiyyət vəsiqəsində şəkil vardı.Bir də ibtidai məktəbdəki Əlifba kitabında şəkillər vardı,başqa yerdə şəkil görə bilmirdim.Şəklin nə olduğunu bilməsəm də o vaxt özüm şəkil çəkirdim.

Turan: Sovet İttifaqında qohumlarınız vardı?

Taştekin: Qohumlarımızı Qazaxıstana sürgün etmişdilər.Atamın xalası uşaqlarını sürgünə göndəriblər.

Turan: Siz də o tərəfdən gəldiniz, yoxsa?

Taştekin: Ulu babalarımız o tərəfdən gəliblər.Gürcüstan tərəfdən.

Turan: Şəkil çəkmə qabiliyyətinizi harada inkişaf etdirə bildiniz?

Taştekin: Mən birinci sinifdə oxuyanda böyük qardaşım dördüncü sinifdə idi.Müəllim onlara demişdi ki, Atatürkün portretini çəkəcəksiniz.Mən heyrət etdim ki, Atatürkün qaşlarını necə çəkəcəyəm? Müəllim öz qələmini çıxararaq saçın,qaşın necə çəkildiyini göstərdi.Mən də müəllimə baxaraq Atatürkün portretini çəkdim və qabiliyyətimiz oradan inkişaf etdirməyə başladım.Təsəvvür edin ki,birinci sinifdə Atatürkün portretini çəkdim.

Turan: İstedadınızın olduğunu o vaxt hiss etdiniz?

Taştekin: Mən istedad-zad bilmirdim, şəkil çəkməyə çalışırdım.Orda məktəbdə oxuyanda elə bilirdim ki, dünyada məndən yaxşı şəkil çəkən yoxdur.

Turan: Çıldırda şəkillərinizi nümayiş etdirdiyiniz yerlər oldumu?

Taştekin: Yox, mən şəkilləri çəkib bir tərəfdə saxlayırdım.Maraqlanan da yox idi.

Turan: İstanbula nə vaxt gəldiniz?

Taştekin: 1963-cü ildə evdən qaçıb gəldim.

Turan: Niyə qaçdınız?

Taştekin: İstanbulu görmək istəyirdim.Birbaşa Memar Sinan adına İncəsənət Akademiyasına getdim ki,şəklin necə çəkildiyini görüm.İbrahim Çallını o vaxt görmüşdüm.Abstrakt şəkilləri görəndə sənət işindən bir az uzaqlaşdım.Bəyənmədim.Klassik tərzdən ayrıla bilmədim, abstrakt şəkillərə meyl göstərmədim.1973-cü ildə Vəfa litseyində ilk sərgim açıldı.

Turan: Vəfa litseyi Türkiyənin ən məşhur təhsil ocaqlarından biridir.Bir çox məşhur adam orada oxuyub.Oraya necə yazıla bildiniz?

Taşştekin: Vəfa litseyi məhəllə məktəbi idi.O vaxt elita təbəqə Qalatasaray litseyində, sıravi xalq uşaqları isə Vəfa litseyində oxuyurdu.Şener Şen, Kemal Sunal, Müjdat Gezen kimi məşhur adamlar orada oxuyublar.Çapa tibb fakültəsinə işə girəndə mənə dedilər ki,Vəfa litseyində axşam oxumaq istəyirsənsə, adını yazdıra bilərsən.Türkiyənin ilk axşam litseyi orada idi.Mənim üçün göydən düşmə fürsət oldu.Türkiyə Cümhuriyyətinin 50-ci ilində ilk sərgim açıldı.1970-ci ildə çəkdiyim bir tablonu Çapadakı göz xəstəxanasına hədiyyə verdim.Məktəbdən qayıdanda gördüm ki,səhər gözlərini müayinə etdirmək istəyən insanlar gecədən növbəyə durublar.Qar yağmışdı, bir qadın öz körpəsini bağrına basıb növbədə gözləyirdi.Çox təsirlənib onu tabloya köçürdüm.

Turan: Deyəsən, 1990-cı illərin əvvəllərindən ardıcıl şəkildə fərdi sərgilər açmağa başlamısınız...

Taştekin: 1992-ci ildən bəri fərdi sərgilər açıram.İndiyə qədər 30-dan çox fərdi sərgi açmışam, 100-ə yaxın qrup sərgisində əsərlərim nümayiş etdirilib.

Turan: Son illərdə xarici ölkələrdə fərdi sərgiləriniz açıldı, qrup sərgilərində iştirak etdiniz.Əsərləriniz hansı ölkələrdə nümayiş etdirildi?

Taştekin: Belçika,Hollandiya və Fransada açdım.

Turan: Türk rəsm sənətində özünüzü hansı məktəbə aid hiss edirsiniz?

Taştekin: Abstrakt rəsm məktəblərindən uzaq dururam.Özümü yaxın hiss etdiyim məktəb-Osman Hamdi bəyin əsasını qoyduğu Orientalist ənənədir.Azərbaycan mənşəli məşhur rəssam İbrahim Safi çox bəyəndiyim sənətkardır.

Turan: Sizdən dəfələrlər eşitmişik ki, Azərbaycanda sərgi açmaq istəyirsiniz.

Taştekin: Azərbaycanda fərdi sərgi açmağa çox can atıram.Ancaq təəssüf ki, indiyə qədər bu arzumu həyata keçirə bilmədim.Çox sevdiyim Azərbaycanlı sənətkarlar var.Həm rəssamları həm də onların əsərlərini sevirəm.

Turan:Azərbaycandan dəvət gəlsə, gedib sərgi açarsınızmı?

Taştekin: Məmnuniyyətlə gedərəm.Aprelin 13-də İstanbulda fərdi sərgim açılacaq.Mən həmişə öz kökümü axtarmışam,bu dəfəki sərgimdə o mövzudakı əsərlərim üstünlük təşkil edəcək.