Jurnalist ədaləti Avropa Məhkəməsində axtaracaq

Bakı Apellyasiya Məhkəməsi hakim Camal Ramazanovun sədrliyi ilə “Amerikanın səsi” radiostansiyasının müxbiri Tapdıq Fərhadoğlunun şikayətini təmin etməyib.

Şikayət Yasamal rayon məhkəməsinin Yasamal rayon prokurorluğunun müstəntiqi Mübariz Əsədovun jurnalistin döyülməsi faktı üzrə cinayət işi açmaqdan imtina etməsindən verilmiş şikayətin təmin edilməməsi haqqında qərarından verilib.

Fərhadoğlu yerli məhkəmələrin qərarları ilə razı deyil və Avropa İnsan Hüquqları Məhkəməsinə şikayət vermək niyyətindədir.

Bu gün jurnalistin müdafiəçisi Samirə Ağayeva apellyasiya şikayətinə baxılması prosesinə buraxılmayıb.

Bu, CPM-yə cinayət işləri üzrə proseslərdə zərərçəkmişləri yalnız vəkillərin müdafiə edə biləcəyi haqqında edilmiş dəyişikliklərlə əsaslandırılıb. Bundan sonra hüquqi nümayəndələr yalnız şahidləri müdafiə edə biləcək.

Beləliklə, Fərhadoğlu prosesdə müdafiəsiz qalıb.

Xatırladaq ki, 20 fevral 2014-cü ildə Fərhadoğlu tələbələrin etiraz aksiyasını çəkərkən BDU-nun mühafizə xidmətinin rəhbəri Mahir Höcətov jurnalistin kürəyinə və başına yumruq və təpiklə vurub. Nəticədə jurnalist iş qabiliyyətini qismən itirib.

Videokadrda Höcətovun jurnalisti döydüyü əksini tapıb. Faktiki olaraq, bu, CM-in 163-cü maddəsində nəzərdə tutulmuş cinayətdir (jurnalistin qanuni fəaliyyətinə maneə yaradılması).

“Videodəlillər olmasına baxmayaraq, məhkəmə şikayəti təmin etməyib və mən Avropa Məhkəməsinə müraciət edəcəyəm”, deyə Tapdıq Fərhadoğlu bildirib.

Xatırladaq ki, jurnalist prezident İlham Əliyevə, baş prokurora, İnsan hüquqları üzrə İşçi Qrupa işinin obyektiv araşdırılması xahişi ilə müraciət edib. -04В-