Məhkəmə icmalı: 29 iyun – 1 iyul 2026-cı il

Siyasətçilər, vətəndaş cəmiyyəti nümayəndələri və jurnalistlərin məhkəmə prosesləri

1. İyunun 29-da Bakı Ağır Cinayətlər Məhkəməsində hakim Azər Tağıyevin sədrliyi ilə “Toplum TV işi” üzrə məhkəmə prosesi vəkillərin çıxışı ilə davam edib.

Demokratik Təşəbbüslər İnstitutunun rəhbəri və III Respublika Platformasının spikeri Akif Qurbanovun vəkili Fuad Ağayev öz müdafiə nitqində bildirib ki, məhkəmə baxışı zamanı tərəflərin çəkişməsi və hüquq bərabərliyi prinsipləri dəfələrlə və kobud şəkildə ittiham tərəfinin xeyrinə pozulub.

O, istintaqın tez başa çatdırılmasını və prosesual pozuntuları qeyd edərək, ədalətli hökmün çıxarılacağına ümid etmədiyini bildirib. Bununla belə, F. Ağayev çıxışının yekununda məhkəmədən müvəkkilinə bütün maddələr üzrə bəraət verilməsini istəyib.

Növbəti məhkəmə prosesi iyulun 6-na təyin olunub.

2. İyunun 30-da İmişli Rayon Məhkəməsində Azərbaycan Xalq Cəbhəsi Partiyasının üzvü Vüqar Qədirliyə hökm oxunub.

Vüqar Qədirli 2 il azadlıqdan məhrum edilib.

V. Qədirli ötən il dekabrın 12-də İmişli rayonunda saxlanılıb. Dekabrın 13-də isə onun barəsində qanunsuz silah saxlama ittihamı ilə həbs-qətimkan tədbiri seçilib. O, ittihamı qəbul etməyib.

3. İyulun 1-də Bakı Apellyasiya Məhkəməsində sosial işçi Zamin Zəkiyev barəsində hökmdən verilmiş apellyasiya şikayətinə baxılıb.

Hakim Emin Əliyevin sədrliyi ilə baş tutan iclasda Z. Zəki və müdafiəçisi Günay İsmayılova çıxış edərək ittihamlarla razılaşmadıqlarını bildiriblər və cinayət işinə bəraətverici əsaslarla xitam verilməsini xahiş ediblər.

Məhkəmə Zamin Zəkinin ittiham olunduğu Cinayət Məcəlləsinin 313-cü (vəzifə saxtakarlığı) maddəsi üzrə cəlbetmə müddəti bitdiyi üçün həmin ittihamın Bakı Ağır Cinayətlər Məhkəməsinin 11 mart 2026-cı il tarixli hökmündən çıxarılması barədə qərar qəbul edib.

Bununla da Z. Zəki barəsində çıxarılan 7 il 6 aylıq həbs cəzası 7 il 3 aylıq həbs cəzası ilə əvəzlənərək qanuni qüvvəyə minib.

Korrupsiya və dövlət orqanları ilə bağlı məhkəmə prosesləri

1. “Gold Residence” şirkətinin icraçı direktoru Nurlan Məmmədovun işi üzrə yekun məhkəmə prosesi keçirilib. Şirkət rəhbərinə 3 il yarım müddətinə şərti cəza verilib.

Məhkəmənin şərti cəza verməsində əmlak sahibləri ilə şirkət arasında barışığın əldə olunması, onlara təzminat ödənilməsi, habelə N. Məmmədovun məhkəmədə peşmançılıq ifadə etməsi rol oynayıb.

Söküntü “Nəriman Nərimanov” metro stansiyasının yaxınlığında, Fətəli xan Xoyski prospekti 128-130 və Əhməd Rəcəbli küçəsi 5B ünvanlarının kəsişməsində aparılıb və altı nəfərin əmlakı onların razılığı olmadan sökülüb. Mülkiyyətçilərə ümumilikdə 470 min manata yaxın ziyan dəyib.

Nurlan Məmmədov əmlak sahiblərinin şikayətləri əsasında cinayət məsuliyyətinə cəlb edilib. Ona qarşı Cinayət Məcəlləsinin 186.2.1-ci (əmlakı qəsdən məhvetmə və ya zədələmə, zərərçəkmişə külli miqdarda ziyan vurmaqla) və 308.2-ci (vəzifə səlahiyyətlərindən sui-istifadə, ağır nəticələrə səbəb olduqda) maddələri ilə ittiham irəli sürülüb. Onun barəsində polisin nəzarətinə verilmə qətimkan tədbiri seçilib.

N. Məmmədov məhkəmədəki ifadəsində özünü təqsirli bilib. Lakin o bildirib ki, həmin ərazidə söküntünün aparılması haqqında Bakı Şəhər İcra Hakimiyyətinin başçısı Eldar Əzizov 2024-cü ildə sərəncam verib.

Təqsirləndirilən şəxs əməlindən peşman olduğunu və zərərçəkənlərə dəymiş ziyanın ödənildiyini bildirərək məhkəmədən həbs cəzası verilməməsini xahiş edib. Zərərçəkənlər də artıq şikayətçi olmadıqlarını təsdiqləyiblər.

Nəticədə N. Məmmədov 186.2.1-ci və 308.2-ci maddələr üzrə təqsirli bilinsə də, ona yalnız şərti cəza verilib.

2. İyulun 1-də Bakı Ağır Cinayətlər Məhkəməsində hakim Vüqar Quliyevin sədrliyi ilə Bakıda “İdrak” liseyində müəllimi güllələməkdə təqsirləndirilən yeniyetmənin cinayət işi üzrə məhkəmə iclası keçirilib.

İclasda dövlət ittihamçısı ittiham aktını elan edib.

İttihama görə, müəllim Şəhla Kamilova şagirdə dərsi bilmədiyi üçün irad bildirib. Bu zaman şagird onun iradını özünə qarşı hörmətsizlik kimi qəbul edib. Daha sonra yeniyetmə Bakı şəhəri, Rəsulzadə qəsəbəsində yerləşən evlərindən atası Samir Şirinov tərəfindən gizlədilən ov tüfəngini və patron darağını öz otağına aparıb.

Patronu darağa yerləşdirib və çantasında gizlədib. O, tüfəngi gözətçinin çantalara baxmamasından istifadə edərək rahatlıqla liseyə keçirə bilib. Daha sonra odlu silahı atəşə hazır vəziyyətə gətirib və müəllim Şəhla Kamilovanın olduğu otağa daxil olaraq atəş açdıqdan sonra oranı tərk edib.

Təqsirləndirilən şəxs özünü qismən təqsirli bilib. O, müəllimi öldürmək məqsədinin olmadığını deyib.

Növbəti iclas iyulun 24-nə təyin olunub.

3. İyulun 1-də Sumqayıt Şəhər Məhkəməsində hakim Fərid Nəsimiyevin sədrliyi ilə “Qurtuluş” Reabilitasiya Mərkəzinin rəhbəri Ceyhun Salmanov və mərkəzin daha iki əməkdaşı — Elşad Məhərrəmov və Natiq Əliyevin cinayət işi üzrə məhkəmə prosesi yekunlaşıb.

Onlar qabaqcadan əlbir olan bir qrup şəxs tərəfindən iki və daha çox şəxsi qanunsuz azadlıqdan məhrum etməkdə təqsirləndirilirdilər.

Hökmə əsasən, Ceyhun Salmanova 3 il 3 ay müddətinə şərti azadlıqdan məhrumetmə cəzası təyin edilib.

Elşad Məhərrəmov isə 3 il 6 ay müddətinə şərti azadlıqdan məhrum edilib.

Natiq Əliyev 3 il müddətinə şərti azadlıqdan məhrum edilib. Onların hər üçü məhkəmə zalından azad edilib.

İttihama görə, “Qurtuluş Reabilitasiya Mərkəzi” MMC-nin direktoru Ceyhun Salmanov Elşad Məhərrəmov, Natiq Əliyev və istintaqa məlum olmayan digər şəxslərlə qabaqcadan əlbir olaraq ayrı-ayrı vaxtlarda 7-dən çox şəxsi zor tətbiq etməklə və aldatmaqla mərkəzin Sumqayıt şəhəri, Corat qəsəbəsində yerləşən müəssisəsinə (yaşayış evinə) gətirib.

Onların həmin şəxsləri orada iradələrinin ziddinə və qanunsuz olaraq azadlıqdan məhrum etməklə saxladıqları bildirilib.

Saxlanıldıqları müddətdə həmin şəxsləri yaxınları ilə əlaqə saxlamaq imkanından, o cümlədən mobil telefon və digər rabitə vasitələrindən məhrum etdikləri, müxtəlif formalarda fiziki və psixi iztirablar verərək onlara əzab verdikləri, saxlanılan şəxslərdən bir neçəsinin sağlamlığına xəsarət yetirdiklərinə dair əsaslı şübhələr müəyyən edilib.

4. İyulun 1-də Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə mənimsəmədə təqsirləndirilən Dənizkənarı Bulvar İdarəsinin İdarə Heyətinin sabiq sədri İlqar Mustafayev, onun köməkçisi olmuş Rəşad Bədəlov və “GİRASOL” MMC-nin direktoru Fuad Babayev barəsindəki cinayət işi üzrə məhkəmənin növbəti iclası keçirilib.

İclasda hakim tərkibi dəyişdiyi üçün məhkəmə istintaqı yenilənib.

İclasda şahidlər ifadə veriblər. Şahid Aydın Alxasov təqsirləndirilən şəxsləri tanıdığını və velosiped təmirçisi işlədiyini deyib.

O qeyd edib ki, maaşının 600–700 manatını kartla, 300 manatını isə əlbəəl alırdı.

Növbəti iclas iyulun 10-na təyin edilib.

İttihama görə, İlqar Mustafayev sözügedən idarədə işlədiyi dövrdə köməkçisi Rəşad Bədəlov, “GİRASOL” MMC-nin direktoru Fuad Babayev və digər şəxslərlə birgə rəsmi sənədlərə yalan məlumatlar daxil etməklə qurumun ərazisində yerləşən qeyri-yaşayış sahələrinin icarəyə verilməsi, ərazidə kommersiya obyektlərinin fəaliyyətinin təşkili, gəmi gəzintiləri və digər bu kimi fəaliyyət sahələrindən əldə olunan 12 milyon manatdan artıq vəsaiti mənimsəyiblər.

Bundan başqa, İlqar Mustafayevin 1 milyon 800 min manatdan artıq məbləğdə vergini dövlət büdcəsinə ödəməkdən yayınmaqda və cinayət yolu ilə əldə edilmiş pul vəsaitinin 10 milyon manatdan artıq hissəsini özü və qohumlarının adına əqdlər bağlamaq yolu ilə müvafiq əmlaklar alaraq leqallaşdırmaqda təqsirli bilindiyi qeyd olunub.

İlqar Mustafayevə Cinayət Məcəlləsinin 179.4-cü (xüsusilə külli miqdarda törədilməklə mənimsəmə), 193-1.3.2-ci (xeyli miqdarda törədilməklə cinayət yolu ilə əldə edilmiş əmlakın leqallaşdırılması), 213.3-cü (xüsusilə külli miqdarda vergiləri ödəməkdən yayınma), 308.2-ci (ağır nəticələrə səbəb olmaqla vəzifə səlahiyyətlərindən sui-istifadə etmə) və 313-cü (vəzifə saxtakarlığı) maddələri ilə, Fuad Babayev və Rəşad Bədəlova isə həmin Məcəllənin 179.4-cü, 308.2-ci və 313-cü maddələri ilə ittiham elan edilib.

Cinayət işi üzrə müəyyən edilən ziyanın ödənilməsini təmin etmək məqsədilə dəyəri 11 milyon manatdan artıq olan əmlakın üzərinə həbs qoyulub.

5. İyulun 1-də Bakı Ağır Cinayətlər Məhkəməsində hakim Kamil Əliyevin sədrliyi ilə siqaret qaçaqmalçılığında təqsirləndirilən şəxslərin məhkəmə hazırlıq iclası keçirilib.

İclasda anket məlumatları dəqiqləşdirilib, tərəflərə hüquq və vəzifələri izah edilib.

Daha sonra müdafiəçilər məhkəməyə vəsatətlər təqdim ediblər.

Təqsirləndirilən Zaur Haşımovun vəkili bildirib ki, müvəkkilinin həyat yoldaşı xərçəng xəstəsidir, daimi yaşayış yeri məlumdur və istintaqdan yayınması üçün əsas yoxdur. Buna görə də onun barəsində seçilmiş həbs-qətimkan tədbirinin ev dustaqlığı ilə əvəzlənməsini xahiş edib.

Eyni zamanda təqsirləndirilən Amil Cəbrayılov və Fərid Usubovun vəkilləri də müvəkkilləri barəsində ev dustaqlığının seçilməsini xahiş ediblər.

Təqsirləndirilən Fərrux Haqverdiyevin vəkili bildirib ki, müvəkkilinin oğlu müharibə veteranıdır, özü də müsbət xarakterizə olunur. Bunların nəzərə alınmasını və barəsində həbs-qətimkan tədbirinin ev dustaqlığı ilə əvəz olunmasını xahiş edib.

Daha sonra Tamerlan Axundzadənin vəkili vəsatət verərək bildirib ki, müvəkkili 44 günlük Vətən müharibəsində könüllü iştirak edib. Vəkil sadalanan halların nəzərə alınmasını və onun barəsində həbs-qətimkan tədbirinin ev dustaqlığı ilə əvəz edilməsini xahiş edib.

Tamerlan Axundzadə vəsatətə münasibət bildirərkən qeyd edib ki, cinayət törətməyib və özünü təqsirli bilmir.

Təqsirləndirilən Heydər Eyvazlının vəkili məhkəməyə bildirib ki, iş üzrə baxılmaya xitam verilməli və yenidən araşdırılması üçün istintaq orqanına qaytarılmalıdır.

Dövlət ittihamçısı vəsatətlərin təmin edilməməsini və işin baxışa verilməsini təklif edib.

Məhkəmə vəsatətlərin təmin edilməməsi və işin baxışa verilməsi barədə qərar qəbul edib.

Növbəti iclas iyulun 15-də keçiriləcək.

Ötən ilin dekabr ayında Dövlət Gömrük Komitəsinin Dəniz Nəqliyyatı və Enerji Resursları Baş Gömrük İdarəsinin Bakı Hövsan Beynəlxalq Ticarət Dəniz Limanı Gömrük postu, “Bakı Hövsan Beynəlxalq Ticarət Dəniz Limanı” Açıq Səhmdar Cəmiyyətinin əməkdaşları və cinayətkar birliyin digər üzvlərinin qanunsuz əməlləri barədə cinayət işi üzrə istintaq tədbirləri nəticəsində “Bakı Hövsan Beynəlxalq Ticarət Dəniz Limanı” ASC-nin faktiki rəhbəri Ruslan Eyyubov, ASC-nin baş direktoru Rəşad Daşdəmirov, liman xidmətinin rəisi Zaur Haşımov, limanın briqadiri Fərrux Haqverdiyev, Dövlət Gömrük Komitəsinin Dəniz Nəqliyyatı və Enerji Resursları Baş Gömrük İdarəsinin Bakı Hövsan Ticarət Dəniz Limanı Gömrük postunun rəisi Fərid Usubov, həmin gömrük postunun inspektorları Heydər Eyvazlı, Tamerlan Axundzadə və Tahir Tahiri, qeyd olunan Baş Gömrük İdarəsinin Əməliyyat-Təhqiqat İdarəsinin Əməliyyat şöbəsinin böyük əməliyyat müvəkkili Ənvər Tağıyev, habelə tütün məmulatlarının nəqliyyat vasitələri ilə daşınmasını və saxlanmasını həyata keçirən Elçin Rüstəmov, Fariz Məhərrəmov, Firuz Əliyev, Amil Cəbrayılov, Ələsgər İsmayılov, Rövşən Tarverdiyev, eləcə də istintaqla şəxsiyyətləri araşdırılan digər şəxslərin mütəşəkkil dəstə halında cinayət əlaqəsinə girərək Birləşmiş Ərəb Əmirlikləri və İran İslam Respublikasından ümumilikdə 5,4 milyon manatdan artıq dəyərdə aksiz markası ilə markalanmalı olan tütün məmulatlarını belə marka olmadan gəmi ilə qeyd edilən limandan qaçaqmalçılıq yolu ilə ölkə ərazisinə keçirmələrinə dair əsaslı şübhələr müəyyən edilib.

Toplanmış ilkin sübutlar əsasında həmin şəxslər Azərbaycan Respublikası Cinayət Məcəlləsinin müvafiq olaraq 206.4-cü (mütəşəkkil dəstə tərkibində külli miqdarda qaçaqmalçılıq), 213-1.2.1-ci, 213-1.2.2-ci, 213-1.2.3-cü (qabaqcadan əlbir olan bir qrup şəxs tərəfindən təkrarən külli miqdarda aksiz markası ilə markalanmalı olan malların belə marka olmadan satış məqsədilə saxlanması) və 308.2-ci (ağır nəticələrə səbəb olmaqla vəzifə səlahiyyətlərindən sui-istifadə etmə) maddələri ilə təqsirləndirilən şəxs qismində cəlb ediliblər.

Separatçıların məhkəmə prosesi

1. İyunun 30-da Bakı Apellyasiya Məhkəməsində Bakı Hərbi Məhkəməsi tərəfindən barələrində ittiham hökmü çıxarılmış Ermənistan Respublikası vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin apellyasiya şikayətləri üzrə məhkəmə baxışı davam etdirilib.

Bakı Apellyasiya Məhkəməsinin hakimləri Elmar Rəhimovun sədrliyi, Emin Mehdiyev və Mehriban Qarayevanın iştirakı ilə keçirilən məhkəmə iclasında təqsirləndirilən Davit İşxanyan məhkəməyə müraciət edərək məhkəmə iclaslarının protokolları ilə tanış olduqdan sonra hazırladığı qeydləri təqdim etmək istədiyini bildirib.

Məhkəmə kollegiyasının sədri iclas protokolları ilə tanış olmağın onun prosessual hüququ olduğunu qeyd edib.

Davit İşxanyana izah olunub ki, protokollara dair qeydlər Azərbaycan dilində təqdim edilmədiyi üçün onların tərcümə olunduqdan sonra məhkəməyə təqdim edilməsi zəruridir. Bildirilib ki, qeydlər şifahi deyil, yazılı formada və Azərbaycan dilində təqdim olunmalıdır.

Qeydlər tərcümə olunduqdan sonra məhkəmə prosesində çəkişmə zamanı tərəflər arasında bərabərliyin təmin olunması üçün ittiham tərəfinə də təqdim edilməlidir.

Davit İşxanyan qeydlərinin tərcüməçiyə təqdim olunmasına şərait yaradılmasını xahiş edib. Məhkəməyə sədrlik edən hakim bunun üçün ona müvafiq şəraitin yaradılacağını bildirib.

Daha sonra çıxış edən David Babayan yeni təyin olunmuş müdafiəçisi ilə tanış olmaq üçün şərait yaradılmasını xahiş edib.

Məhkəmə iclası müdafiə tərəfinin apellyasiya şikayətlərinin əsaslandırılması üzrə çıxışlarla davam etdirilib.

Təqsirləndirilən Davit Allahverdiyanın müdafiəçisi çıxış edərək müdafiə etdiyi şəxs barəsində bəraət hökmünün çıxarılmasını məhkəmədən xahiş edib. Davit Allahverdiyan müdafiəçisi tərəfindən verilmiş apellyasiya şikayətini müdafiə etdiyini və həmin şikayətdə göstərilən dəlillərlə razı olduğunu bildirib.

Sonra Melikset Paşayanın müdafiəçisi çıxış edib. O, təqsirləndirilən şəxs barəsində 2026-cı il 5 fevral tarixli ittiham hökmünün ləğv edilərək bəraət hökmünün çıxarılmasını məhkəmədən xahiş edib.

Çıxış edən M. Paşayan müdafiəçisinin səsləndirdiyi mövqeyi dəstəklədiyini bildirib. O, özünü irəli sürülmüş ittiham üzrə təqsirli bilmədiyini qeyd edib.

Daha sonra təqsirləndirilən Davit İşxanyanın müdafiəçisi çıxış edib. Vəkil çıxışında D. İşxanyan barəsində 2026-cı il 5 fevral tarixli hökmün ləğv edilməsini və bəraət hökmünün çıxarılmasını məhkəmədən xahiş edib.

Ardınca təqsirləndirilən şəxslərin müdafiəçiləri ilə konfidensial görüşlərinin təmin edilməsi məqsədilə məhkəmə iclasında fasilə elan olunub.

Fasilədən sonra məhkəmə iclasında çıxışlar davam etdirilib.

Çıxış edən təqsirləndirilən Davit İşxanyan əvvəlcə vəsatət verərək özü tərəfindən hazırlanmış apellyasiya şikayətinin və ərizəsinin dublikat nüsxələrinin cinayət işinin materiallarına əlavə olunmasını məhkəmədən xahiş edib.

Ardınca bildirib ki, ona qarşı irəli sürülmüş ittihamla razı deyil.

Məhkəmənin növbəti iclası iyulun 3-də keçiriləcək.

Bakı Hərbi Məhkəməsinin 5 fevral 2026-cı il tarixli hökmünə əsasən, Arayik Harutyunyan, Levon Mnatsakanyan, David Manukyan, Davit İşxanyan və David Babayan ömürlük azadlıqdan məhrumetmə cəzasına məhkum ediliblər.

Arkadi Qukasyan və Bako Sahakyan 20 il, Madat Babayan və Melikset Paşayan 19 il, Qarik Martirosyan 18 il, Davit Allahverdiyan və Levon Balayan 16 il, Vasili Beqlaryan, Qurgen Stepanyan və Erik Qazaryan isə 15 il müddətinə azadlıqdan məhrum ediliblər.

Onlar Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanun və qaydalarının pozulması, terrorçuluq, terrorçuluğun maliyyələşdirilməsi, hakimiyyəti zorla ələ keçirmə və digər çoxsaylı cinayətlərdə təqsirli biliniblər.