Açıq Hökumət Təşəbbüsü Konfransı: Azərbaycanda hökumət-vətəndaş cəmiyyəti dialoqu mexanizmi yaradılmalıdır

İyulun 21-22 tarixlərində Filippinin paytaxtı Manila şəhərində Açıq Hökumət Tərəfdaşlığı (AHT) çərçivəsində Asiya-Sakit Okean Regional Dialoq adlı ikigünlük konfrans keçirilib. Bunu konfransa İqtisadi Təşəbbüslərə Yardım İctimai Birliyinin təmsilçisi kimi qatılan Samir Əliyev bildiir.

Onun sözlərinə görə, Asiya İnkişaf Bankının (AİB) mənzil qərargahında baş tutan tədbirə Sakit Okean hövzəsi və Asiya qitəsini AHT-də təmsil edən 12 ölkənin 100-ə qədər iştirakçısı qatılıb. Regional konfransda Azərbaycan yalnız vətəndaş cəmiyyəti səviyyəsində təmsil olunub.

S.Əliyev tədbirə İqtisadi Təşəbbüslərə Yardım (İTY) İctimai Birliyinin eksperti olaraq qatıldığını deyib. Natiq vətəndaş cəmiyyəti olaraq Azərbaycanın AHT təşəbbüsündə qalmaqda, statusunun yaxşılaşdırılması üçün hökumətlə dialoqa hazır olduğunu deyib. “Əlbəttə, əsas suallar hökumətin buna nə dərəcədə hazır olması ilə bağlı idi və əsas gözləntilər də ondan idi. Bu suallara isə orada iştirak etməli olan hökumət nümayəndəsi cavab verməli idi”, deyə S.Əliyev bildirib.

S.Əliyev deyir ki, regional tədbir uğurlu təcrübələri bölüşmək və mənimsəməkdə ölkələr üçün məkan yaradılması, AHT üzrə yeni qəbul edilmiş Milli Fəaliyyət Planlarının (2016-2018) təqdimatı və rəylərin alınması, Milli Fəaliyyət Planlarının dəstəklənməsi üçün tələblərin müəyyənləşdirilməsi kimi 3 tələb qoyub.

S.Əliyevə görə, hökumət qurumları ilə vətəndaş cəmiyyəti arasındakı dialoq tədbirin əsas müzakirə obyekti olub. AHT-nin baş direktoru Sanjay Pradhan çıxışında bu təşəbbüslərin dəstəklənməsini vətəndaşların hüquq və imkanlarının artırılması üsulu kimi dəyərləndirib. Vətəndaşların ən mühüm tələbləri ödənilməklə, həyat səviyyələrinin əhəmiyyətli dərəcədə yüksəldilməsi üçün prosesə daha çox hökumət qurumu və vətəndaş cəmiyyəti qoşulmalıdır.

Tədbirdə hökumət qurumları ilə vətəndaş cəmiyyəti arasındakı dialoqun Azərbaycan üçün də aktual olduğu vurğulanb. Azərbaycanda belə dialoqun olmaması təəssüf hissi doğurub. Azərbaycan AHT təşəbbüsünə ilk qoşulan ölkələrdən olsa da, bu qurumdakı 4 illik fəaliyyət dövründə bu çərçivədə vətəndaş cəmiyyəti ilə dialoq mexanizmi yaratmayıb. Vətəndaş cəmiyyəti ilə məsləhətləşmələr aparılması AHT təşəbbüslərinin effektiv yayılmasının əsas şərtidir.

2016-cı il may ayının 4-də Cənubi Afrikanın Cape-Town şəhərində keçirilən Açıq Hökumət Tərəfdaşlığının Rəhbər Komitəsinin iclasında Azərbaycanın statusu tamhüquqlu üzvlükdən qeyri-aktiv ölkə statusuna endirilib. Bunun əsas səbəbi ölkədə vətəndaş cəmiyyəti institutlarının fəaliyyətinə məhdudiyyətlər yaradılması olub. Azərbaycanın tamhüquqlu üzvlüyünün bərpa edilməsi üçün hökumətin bir ildən də az vaxtı var, bu müddətdə vətəndaş cəmiyyətinin normal fəaliyyəti üçün xeyli işlər görülməlidir. 2016-cı ilin dekabrında Parisdə AHT-nin növbəti Qlobal Sammitinə qədər hökumət-vətəndaş cəmiyyəti dialoqu mexanizmi ortaya qoyulmalıdır. -05B-