“İşgəncələrə son qoyulsun!” kampaniyasının fəaliyyət perspektivləri haqqında

Bakı/29.10.19/Turan: Repressiya və İşgəncələr Əleyhinə Komitə bu gün rəsmi olaraq “İşgəncələrə son qoyulsun!” adlı ictimai kampaniyanın başladığını elan edib.

Komitə sədri Oqtay Gülalıyevin bugünki mətbuat konfransında verdiyi məlumata görə, son illər hüquq-mühafizə orqanları işgəncələri geniş şəkildə tətbiq edir və bu təcrübə dövlət səviyyəsində dəstəklənir. Kampaniyanın məqsədi işgəncələrə ictimai müqavimətin təşkilidir.

Kampaniya çərçivəsində 9 nəfərlik təşkilat komitəsi yaradılıb, komitə bir neçə istiqamətdə iş aparacaq.

“İşgəncə tətbiq edən vəzifəli şəxslərə qarşı tədbir görülməsi üçün rəsmi orqanlara müraciət edəcəyik”, deyə Gülalıyev bildirib. Bundan başqa, zərərçəkmişlərin adından məhkəməyə iddiaların verilməsi təşkil ediləcək.

İşgəncələr haqqında məlumatlar toplanacaq, daha sonra hesabat dərc ediləcək.

“Beynəlxalq təşkilatlar qarşısında Azərbaycanda işgəncə tətbiq edənlərə qarşı sanksiyalar məsələsini qaldıracağıq. DİN və digər idarələr qarşısında etiraz aksiyaları keçirməyi planlaşdırırıq”, deyə o qeyd edib.

Həmçinin, fleş-mob keçiriləcək, videoçarxlar hazırlanacaq, sosial şəbəkələrdə isə informasiya və maarifləndirici materiallar yerləşdiriləcək. İctimai qınaq və həmrəylik tədbirləri, habelə yerli və beynəlxalq təşkilatlarla görüşlər planlaşdırılır, deyə Gülalıyev əlavə edib.

AXCP Rəyasət Heyətinin üzvü İradə Nəriman çoxalan inzibati həbs faktları haqqında məlumat verib. 2016-cı ildə siyasi motivlərlə inzibati qaydada cəmi 30-32 nəfər həbs edilibsə, bu ilin 10 ayı ərzində 80 nəfər həbs edilib. Təkcə oktyabrda 33 nəfər həbs edilib, 57 yaşlı AXCP fəalı Paşa Ümidova qarşı isə cinayət ittihamı irəli sürülüb. Hazırda 20 AXCP fəalı hələ də həbsdədir. Bu gün Bakı Apellyasiya Məhkəməsinin qarşısında siyasi fəal və jurnalist Emin Maniyev də saxlanılıb.

“Onu saxlayıb naməlum istiqamətə aparıblar. Bunu açıq yerdə, hamının gözü önündə edirlərsə, qapalı yerlərdə insanlara nələr edə biləcəklərini təsəvvür etmək çətin deyil”, deyə Nəriman bildirib.

Demokratik Qüvvələrin Milli Şurasının üzvü Eldəniz Quliyevin fikrincə, işgəncələrin tətbiqi cəmiyyətdə qorxu yaratmaq məqsədi güdür. “Amma bəzən bunun şok terapiyası təsiri olur və insanları ayıldır”, deyə Quliyev bildirib.

Hüquq müdafiəçisi Əlövsət Sadıqlı deyib ki, komitə mitinqdə və saxlanma yerlərində vətəndaşlara qarşı işgəncə tətbiq edən polis əməkdaşları və digər şəxslər haqqında məlumatı ümumiləşdirəcək. -06D-