Komitə dindarların hüquqlarının müdafiəsilə bağlı AŞPA-ya müraciət edib

İslamçıların Hüquqlarını Müdafiə Komitəsi (İHMK) bu kateqoriyadan olan şəxslərin həbslərinə ikili münasibətlə bağlı cümə günü RATİ-də dinləmələr keçirib.

Son 3-4 ildə ölkədə islam cameəsinə aid şəxslərin kütləvi şəkildə həbs olunduqları qeyd edilib. Amma istər ölkə daxilində, istərsə də beynəlxalq aləmdə bu həbslərə yetərli reaksiya verilməməsinə diqqət çəkilib. Tədbir təşkilatçıları  siyasi əqidəsindən aslıl olmadan həbs edilən hər kəsi müdafiə etdikləri halda digər ictimai-siyasi qüvvələrin və mətbuatın dindarları yetərli şəkildə müdafiə etmədiklərini vurğulayıblar. Bundan əlavə, qurumun AŞPA-ya ünvanladığı müraciətdə də beynəlxalq qurumlarda islamçıların müdafiəsinə təsirli dəstək verilmədiyi əksini tapıb.  

İslami cameəyə hücumların XX əsrin 90-cı illərinin ortalarından başlandığı, “islam” sözü olan ictimai-siyasi qurumların qeydə alınmasında problemlərin yaşandığı  nəzərə çatdırılıb. Həmin problemlərin günümüzdə də davam etdiyi xatırladılıb. Rəsmi Bakının dini sahədəki siyasəti ciddi tənqidə məruz qoyulub. Belə ki, azana qadağa, məscidlərin sökülməsi, daha sonra hicaba qadağa kimi halların etirazlara səbəb olduğu deyilib. Eyni zamanda hicaba qadağa qoyaraq “hicab problemi” yaratmağın məqsədinin aydın olmadığı bildirilib. Həm də iqtidarın dini cameəyə belə amansızlığının fəlsəfəsinin anlaşılmaz olduğu iddia edilib. Hər hansı etiraza görə insanların uzun müddətə azadlıqdan məhrum olunmasının başa düşülən olmadığı ifadə edilib. “Bu, rəsmi Bakının Azərbaycanı dünyanın dini tolerantlıq mərkəzi kimi göstərmək səylərilə bir araya sığmır, bu necə tolerant ölkədir ki, dindarlar adi dini haqlarını tələb etdiklərinə görə həbslərə, işgəncələrə məruz qalırlar”, - natiq Rövşən Əhmədli rəsmi Bakının dini tolerantlıq siyasətinin səmimi olmadığını nəzərə çatdırıb.  

Məhbusların etiqadlarına görə həbsxanada da təzyiqlərə məruz qalmaları qeyd edilib. Həbsdə olan bəzi dindarların namaz qıldıqlarına, azan verdiklərinə görə döyüldükləri və “kartser”ə salındıqları deyilib. Bu cameəyə aid neçə-neçə məhbusun məhbəsdə vəfat etdiyi nəzərə çatdırılıb.

Bəzi natiqlər beynəlxalq qurumların islamçıların müdafiəsinə yetərli şəkildə qoşulmamasını rəsmi Bakını dəstəkləyən Azərbaycanın AŞPA nümayəndə heyətinin dini cameə barədə qərəzli informasiya yaymasını göstərib. Qeyd edilib ki, nümayəndə heyəti islamçıları “radikallıq”da, “təcavüzkarlıq”da  və s. ittiham edərək onlarla dialoq aparmağın mümkünsüz olması imici yaradıblar. Odur ki, komitə ilk növbədə bu imici alt-üst etməyin vacibliyini vurğulayıb.       

Daha sonra komitənin islamçıların hüquqlarının müdafiə olunması ilə bağlı AŞPA-ya ünvanladığı müraciət oxunub. Müraciətdə son 3 ildə dini cameədə aparılan həbslərin əsassız olması, insanların dini etiqad azadlıqlarını müdafiə etmək üçün dinc aksiyalar zamanı həbsə alındıqları deyilir. Bu etiqad azadlığı uğrunda mübarizədə həbs edilən insanları beynəlxalq qurumların yetərli şəkildə dəstəkləmədiyi əksini tapır.

Son olaraq müəlliflər AŞPA-nı Azərbaycanda dini sahədə  qadağaların aradan qaldırılmasına yardımçı olmaya, repressiyalara laqeyd qalmamağa və  hökumətə təsir göstərməyə çağırırlar.

Müraciətdə həbsdə olan dindarların siyahısı da əksini tapıb.-05C-