Media-icmal 07.10.20

“Azərbaycan” qəzeti  “İlham Əliyevin şərtləri dəyişməzdir” sərlövhəli məqalədə Azərbaycanın ərazi bütövlüyü uğrunda müharibə əməliyyatlarını dəyərləndirir.

Müəllif deyir ki, Azərbaycan ordusu Ermənistanın ön xətdəki mövqelərini ilk gündən yarıb, qarşı tərəfin hərbi hissələrini, döyüş texnikalarını və infrastrukturunu, cəbhənin dərinliyindəki atəş nöqtələrini, bazalarını darmadağın etməkdədir.

Müəllif sentyabrın 27-də əks-həmlə əməliyyatları başladıqdan sonra bəzi   beynəlxalq təşkilatların, bəzi dövlətlərin atəşi dayandırmaq, məsələni danışıqlarla həll etmək çağırışını gecikmiş sayır: “Bu həmin təşkilatlar və dövlətlərdir ki, 30 ilə yaxın müddətdə bir dəfə də olsun Ermənistanın Azərbaycan torpaqlarını işğal etdiyini dilə gətirməyiblər. Dövlətlərin ərazi bütövlüyünün pozulmasının yolverilməzliyi beynəlxalq hüququn əsas normalarından biridir”.

Məqalədə yada salınır ki, Ermənistan-Azərbaycan münaqişəsinə dair ən mühüm sənədlər BMT Təhlükəsizlik Şurasının 1993-cü il ərzində qəbul etdiyi 822, 853, 874, 884 saylı qətnamələrdir, amma onun təəbləri yerinə yetirilməyib.

Müəllif deyir ki, 27 ildir bu tələblər kağız üzərində qalıb.

Əməliyyatların başlamasına gəlincə, müəllif vurğulayır ki, Azərbaycan ərazilərini daha 30 il işğalda qalmasını gözləmək fikrində deyil.

Müəllif deyir ki, Ermənistan müharibə əməliyyatlarının dayanmasını istəyirsə Azərbaycan tərəfin şərtlərini qəbul etməlidir.

“Ermənistanın baş naziri bir il bundan əvvəl bizim torpaqlarımızda demişdi ki, “Qarabağ Ermənistandır”. Azərbaycan xalqından üzr istəməlidir. İkincisi, o deməlidir ki, Qarabağ Ermənistan deyil. Üçüncüsü, Azərbaycanın ərazi bütövlüyünə hörmət etməlidir.  Dördüncüsü, bəyan etməlidir ki, hansı gündə, hansı bölgədən Ermənistan silahlı qüvvələri çıxır. Bu şərtlər Minsk Qrupunun həmsədrləri tərəfindən təsdiq edilməlidir. O halda təbii ki, atəşkəs bərpa olunacaq və beləliklə, bu məsələ müzakirə yolu ilə həll olunacaq, Azərbaycan xalqı öz doğma torpaqlarına qayıdacaq”, - müəllif Azərbaycan tərəfin şərtlərini yada salır.

“Bizimyolinfo”  Ermənistanın raketləri niyə partlamır? sərlövhəli məqalədə ekspert Ramil Məmmədli ilə söhbətləşir.

R.Məmmədlinin deməsinə görə, raketlərin saxlanılması alınmasından baha başa gəlir, belə ki, onun saxlanma şəraiti, qulluq qaydaları, ona tökülən mayelər və bu mayenin dəyişdirilməsi hamısı xərc tələb edir.

Əks təqdirdə atəş açılan zaman o raket və döyüş başlıqları işə düşmür, düşsə də effektiv olmur: “Ermənistan da müəyyən problemlərlə bağlı xərclərini azaltmaq üçün raketlərə qulluq göstərməyib, ona görə atəş açırlar, raket gəlir düşür, amma partlamır”,- ekspert qeyd edib.

Ekspert əlavə edir ki, erməni tərəf ya köhnə raket alıb, ya da köhnə  raketlərdən istifadə edir.

O, mülki əhaliyə atılan qadağan olunmuş kasetli bombalar haqda da danışıb: “Gəncəyə atılan raketlər “Smerç” yaylım atəş sistemi ilə atılıb. Onun mərmiləri, yəni raketləri 3 hissədən ibarət olur. Birinci termobollik, yəni zireh dələn, digəri qəlpəli, yəni şəxsi heyət əleyhinə, üçüncüsü isə kasetlidir, yəni döyüş başlığı daşıyır. Kasetli bombaların içərisində həm də kimyəvi silahlar olur. BMT bu silahların isifadəsini qadağan edib”.

R.Məmmədli deyir ki, Azərbaycanda kasetli silahların istehsalı, ehtiyatının toplanması, ölkə ərazisindən daşınması və istifadəsi faktı qeydə alınmayıb.

Onun deməsinə görə, Azərbaycan ərazisinin bir hissəsi başqa ölkənin silahlı qüvvələri tərəfindən işğal olunduğu kasetli silahlardan istifadə olunmaması konvensiyasına qoşula bilmir.

Ekspert deyir ki, hazırda Ermənistan ordusunun Qarabağda yerləşən hərbi hissələrinin arsenalında kasetli sursatlar ata bilən sovet istehsalı 122 mm.-lik “Qrad” və 220 mm. çaplı “Uraqan”, Çin istehsalı WM-80 reaktiv yaylım atəş sistemləri var:: “Kasetli silahlar rəqibin canlı qüvvəsini və infrastruktrunu sıradan çıxarmaq üçün nəzərdə tutulur. Sursat bəlli məsafədə açılır və daxilindəki çox sayda sursat ətrafa səpələnir. Kasetli silahların acı nəticələri heç də piyadalar əleyhinə minalardan az deyil”.

Onun deməsinə görə, indiyədək kasetli silahların təsirinə məruz qalmış 30 ölkə və ərazi siyahısına Azərbaycan da daxildir.

“Redaktor.az” saytı isə “Mingəçevir su anbarına təhlükə yoxdur - 9 ballıq zəlzələyə dözümlüdür sərlövhəli məqalədə son vaxtlar Ermənistan tərəfin Mingəçevir İSES-i  vuracağı hədələri barədə hərbi ekspert Üzeyir Cəfərovla söhbətləşir.

“Azərbaycan Ermənistan tərəfinə törətdiyi təxribatlara bağlı öz xəbərdarlığını edib. Düşünürəm ki, rəsmi İrəvan bu xəbərdarlıqdan nəticə çıxarmalıdır. Əgər nəticə çıxarmasa, baş verənlər onlar üçün indikindən də ağır olacaq”. Bunu isə hərbi ekspert Üzeyir Cəfərov deyib.

O qeyd edib ki, Ermənistan Azərbaycanın şəhər və rayonlarına etdiyi raket hücumları etməklə əks-hucumun qarşısını almaq, atəşkəsə nail olmaqdır:   “Lakin onlar doğru yol seçməyiblər və bu təxribtların cavabını Ermənistan ödəməlidir, ödəyəcək də. Bunun başqa yolu yoxdur. Çünki Azərbaycan mülkü vətəndaşların hədəf alınmaması ilə bağlı Ermənistan tərəfə dəfələrlə xəbərdarlıq edib. Amma görünən odur ki, ermənilər hələ də edilən xəbərdarlıqdan nəticə çıxarmayıblar”.

Ü.Cəfərov erməni tərəfin Mingəçevir su anbarını vurmağa cəhd etmələri haqda da danışıb: “Ermənilər su anbarının tarixini açıb oxusalar görərlər ki, o, su anbarının bəndləri hansı gücə malikdir. Mən şəxsən Mingəçevir su anbarının vurulmasından narahat deyiləm. Çünki həmin anbar 9 ballıq zəlzələnin təsirinə davamlıdır. Yəni, anbarın bəndlərinin dağıdılması üçün gərək ora atom bombası atılsın. Onlar, sadəcə, xof, qorxu yaratmaq üçün həmin əraziyə raket atırlar”.

U.Cəfərov Ermənistan ordusunun tam məğlub olmasına az müddətin qaldığını bildirib: “Düşmən ordusu elə bir sarsıdıcı zərbə alıb ki, yaxın günlərdə vuruşmağa taqətləri belə olmayacaq. Hazırda ordumuz başlarına od ələyir. İnanıram ki, qısa zamanda ordumuz düşmən üzərində möhtəşəm qələbə qazanacaq və biz işğal altındakı torpaqların tamamına qovuşacağıq”.

“Mətbuat.az” saytı isə “Gəncəyə raket atılması Qərbin maraqlarına zərbədir” sərlövhəli məqalədə müəllif Gəncəyə raket atılmasını politoloq Məhəmməd Əsədullazadə ilə dəyərləndirir.

M.Əsədullazadə hesab edir ki,  “Ermənistan Gəncəyə raket atmaqla əslində Qərbin regionda enerji və geosiyasi maraqlarına zərbə vurdu. “Gəncə dəhlizi” ABŞ başda olmaqla, Qərbin enerji və nəqliyyat dəhlizidir”, -Əsədullazadə bildirib. Ekspertin sözlərinə görə,  Azərbaycan XİN bu məsələni Vaşinqton və Brüsselə bir daha bildirməidir.

“Gəncəyə raket atılması ilə artıq Azərbaycan Ermənistana heç bir kompromis yeri qoymayacaq. Ermənistanın terrorçu siyasi rəhbərliyi duşünür ki, Gəncəni vurmaqla Azərbaycanı atəşkəsə məcbur edəcək, yaxud Azərbaycan Ermənistana cavab zərbəsi vurmaqla Rusiyanı müharibəyə cəlb edəcək. Ortada Türkiyə faktoru var və Rusiya bu münaqişədə yer almayacaq”, - politoloq bildirir.

M.Əsədullazadənin deməsinə görə, Ermənistan rəhbərliyi heç vaxt Azərbaycan ordusunun Xankəndində hərbi obyektləri, bazaları vuracaqlarını hesablamamışdı: “Onlar hesab edirdilər ki, Azərbaycan ətraf rayonlara yalnız hücum edə bilər. Amma heç ağıllarına da gəlməzdi ki, Azərbaycan ordusu Xankəndidə, Şuşada, Ağdərədə həmçinin Madagiz istiqamətində erməniləri məhv edərək hərbi üstünlüyü ələ ala bilər”.

Ekspert deyir ki, Azərbayvan təhlükəsizliyi naminə Ermənistan ərazisindən raket atılan yerlərə atəş zərbələri endirə bilər, bu, onun hüququdur.