Media-icmal 09.10.20

“Azərbaycan” qəzeti  “Azərbaycan xalqı qələbə xəbərini gözləyir” sərlövhəli məqalədə hərbi əməliyyatları dəyərləndirir.

Müəllif deyir ki, sentyabrın 27-dən başlanan hərbi əməliyyatların səbəbi Ermənistanın 30 ilə yaxın işğal etdiyi Azərbaycan ərazilərini danışıqlar vasitəsilə boşaltmaq istəməməsi, yeni ərazilər işğal etməyə cəhd etməsi, təmas xəttində mülki şəxsləri və hərbçiləri hədəf alması, infrastruktura zərbə vurması,  təxribatlar törətməsi olub.

Müəllif  vurğulayır ki, hərbi əməliyyatlar zamanı isə döyüş meydanında müharibə aparmaq əvəzinə Ermənistan yenə də mülki əhalini, əməliyyat zonasıandan uzaq şəhər və rayonları, sivil strateji obyektləri hədəfə alır.

Müəllif hesab edir ki, Ermənistanın təxribatlarına cavab olaraq Azərbaycan ordusu sentyabrın 27-dən əks-həmlə əməliyyatlarına başlayıb, həm də xalq bunu 30 il idi ki, gözləyirdi.

Müəllif deyir ki, torpaqların azadlığı uğrunda müharibə Azərbaycan xalqının həmrəyliyini göstərdi, siyasi baxışlarından asılı olmayaraq, dövlətçilik və milli maraqları rəhbər tutan bütün partiyalar bu amala dəstək oldular.

Müəllif vurğulayır ki, işğal olunmuş ərazilər uğurla azad edilir, artıq Suqovuşan, Tərtər rayonunun Talış kəndi, Cəbrayıl, Füzuli rayonlarının kəndləri işğaldan azad edilib.

“Mən əminəm ki, bizim uğurlu əks-hücum əməliyyatımız işğala son qoyacaq! Ədalətsizliyə son qoyacaq! Otuz ilə yaxın davam edən işğala son qoyacaq! Çünki Azərbaycan xalqı öz torpağında yaşamaq istəyir. Azərbaycan vətəndaşı Vətən həsrəti ilə yaşayır” deyə müəllif dövlət baçısı İlham Əliyevdən sitat gətirir.  

“Yenisabah.az”  saytı “Qarabağın azad olunması üçün ən uyğun vaxt seçilib – rus politoloqlar” sərlövhəli məqalədə Qarabağ torpaqlarının işğaldan azad olunması üçün müharibənin  niyə bu il başlaması səbəblərinə ekspertlər aydınlıq gətirirlər.

Müəllif deyir ki, Qarabağda sentyabrın 27-dən başlayan müharibə dünyanın diqqət mərkəzindədir.  Müəllifə görə, Tükiyənin Azərbaycanın əks-hücum əməliyyatına açıq dəstək verməsi əsas müzakirə mövzusudur. Belə ki, münaqişə 30 ildir davam etsə də  Ankaranın hərbi əməliyyatları məhz indi dəstəkləməsi müxtəlif prizmalardan dəyərləndirilir.

Politoloq Yevgeni Ben deyir ki, burada qaçqınları Avropaya buraxmamaqla Avropanın Türkiyədən asılı vəziyyətə düşməsi, Türkiyə ilə Rusiya arasında birgə iqtisadi layihələrin olması,  ABŞ-ın Türkiyənin iradəsi ziddinə getməməsi kimi səbəblər var.

Y.Benə görə, Ərdoğan Bakının köməyi ilə Qafqazda möhkəmlənmək üçün yaxşı məqam seçib, Gürcüstan praktiki olaraq türklər tərəfindən alınıb.

Digər politoloq İvan Skorikov isə Qarabağda başlayan eskalasiya fonunda Türkiyə və Rusiya arasında hərbi toqquşma ola bilməsini istisna edib.

Onun fikrincə, Rusiya başa düşür ki, indi Qarabağda sülhün ən azı iki açarı var ki, bunlardan biri də Ankaradadır.

Müharibənin necə bitəcəyinə gəlincə, Y.Ben bildirib ki, İlham Əliyev Ermənistan Silahlı Qüvvələrinin Qarabağı tərk etməsi barədə vaxt cədvəli təqdim edərsə, o zaman Azərbaycan ordusunun hücumu dayandıracağını söyləyib.

“Müsavat.com”  “30 illik müharibənin qələbə ilə bitməsi Azərbaycana investisiya axınını gücləndirəcək” sərlövhəli məqalədə isə ekspertlər qələbə qazandıqdan sonra  Azərbaycanın işğaldan azad olan ərazilərində iqtisadi həyatın mümkün inkişafını dəyərləndirirlər.

Ekspertlər hesab edirlər ki, ərazi bütövlüyünün bərpası və ölkənin müharibə vəziyyətindən çıxmasından sonra investisiya mühiti daha cəlbedici olacaq.

Ekspertlərə görə, bu münaqişə bu günə qədər investorları, iş adamlarını Azərbaycana gəlməkdən çəkindirirdi, amma  ərazi bütövlüyü təmin edildikdən sonra belə düşüncələr ortadan qalxacaq, Azərbaycana investisiya yatırılacaq.

“Bir şərtlə ki, müharibədən sonra investisiya mühitinə əngəl olan bütün maneələr aradan qaldırmalıdır. Özümüzü aldatmayaq, investisiya mühiti ilə bağlı çox sayda problemlərimiz var. Son illər bu istiqamətdə xeyli işlər görülsə də problemlər qalmaqdadır”.

İqtisadçı ekspertlər hesab edirlər ki, investisiya yatırımı üçün hüququn aliliyi, Rəqabət Məcəlləsi, investisiyanın qorunması və s. təmin edilməlidir.

Eksperlər bunu da xüsusi qeyd edirlər ki, investor üçün kimin qalib, kimin məğlub olması yox, iqtisadi sabitliyin olması əsas məsələdir. İqtisadçının sözlərinə görə, reytinq məhz xarici investorlar üçündür ki, onlar buna baxıb ölkəyə investisiya qoyub-qoymamaq barədə düşünürlər: 

“Redaktor.az” saytı isə “Cəmi 10 dəqiqəyə İrəvanı darmadağın edəcək- raketlərimiz”  sərlövhəli məqalədə Ermənistanın “İsgəndər-E”  silahı ilə Azərbaycanı hədələməsinə hərbi ekspert Abuzər Əbilov cavab verir.  

Onun deməsinə görə, bu silahın Ermənistana satılmış variantı “E” (Eksport) – “İsgəndər-E”dir. “Bu variant 280 km. dan artıq uçuş məsafəsinə malik deyil, Kompleksin atəşə  hazırlanması üçün 20 dəqiqə lazımdır. Və bu kompleks atəş zamanı məhz bir raket ata bilir. İkinci raket isə bundan sonra atıla bilər.

A.Əbilovun demsinə görə, Azərbaycanın silah arsenalında “POLONEZ”  yayım atəş sistemi və İsrail istehsalı olan “LORA” raketləri var.“Lora" raketinin çəkisi 1580 kq.-dır. Maksimal atəş uzaqlığı 300 km.-dan çoxdur.  Döyüş başlığının çəkisi 240 kq.-dır. Məhvetmə radiusu 100 metrdir. Döyüş maşınında 4 raket konteynerdə yerləşir. 13 dəqiqə içində atəşə hazır ola bilir, Raketin unikallığı da odur ki, uçuş zamanı çətin manevrlər edərək trayektoriyanı dəyişməklə HHM kompleksləri üçün əlçatmaz olur.  “Polonez" isə yüksək sürətə malik ballistik raketlərdir. Bir maşın 8 belə raket buraxa bilir ki, raketlərin hər biri fərqli hədəflərə tuşlanmaq xassəsinə malikdir. Bir raketin məhvetmə qabliyyəti 275 kv.m.- dir. 

“Polonez”in atəş uzaqlığı 299 km.-dir. Raketin çəkisi 780 kq.-dır. Döyüş başlığının çəkisi 140 kq.-dır. Atəşə hazırlıq üçün heyətə 10 dəqiqə lazımdır. “İsgəndər” bütün parametrlərinə görə Azərbaycanın silahlanmasında olan raketlərdən geri qalır. Təkcə döyüş başlığının çəkisinə görə irəlidədir”.