Media-icmal 10.12.20

Koronavirusa qarşı mübarizə, Türkiyə prezidenti Ərdoğanın Bakı səfərinin mahiyyəti, Rusiyanın Azərbaycandan bu ölkəyə qida ixracına qadağa qoymasına şərh, Türkiyə-Rusiya monitorinq mərkəzinin Ağdamda yerləşdirılməsinın səbəbləri və s. medianın aparıcı mövzuları sırasındadır.

“Azərbaycan” qəzeti  “Yoluxmanın yüksək həddi sərt karantinin tətbiqini şərtləndirdi sərlövhəli məqalədə Azərbaycanda

koronavirus infeksiyasına qarşı mübarizədə sərt qaydalarşn tətbiq olunmasşnın səbəblərini şərh edir. 

Müəllif deyir ki, bu virusun yayılmağa başladığı bir il ərzində dünyada 70 milyon nəfər bu virusa yoluxub, 1,5 milon nəfər insan isə dünyasını dəyişib.

Son zamanlar digər ölkələrdə olduğu kimi, Azərbaycanda da infeksiyaya yoluxma sayının kəskin artması sərt karantin tədbirlərinin tətbiq olunmasını şərtləndirib.

Qərara əsasən ölkə üzrə xüsusi karantin rejiminin müddəti gələn ilin 31 yanvarınadək uzadılıb, eyni zamanda bu il dekabrın 14-dən 2021-ci ilin 18 yanvarınadək bütün ölkə üzrə sərtləşdirilmiş xüsusi karantin rejimi tətbiq ediləcək.

Nazirlər Kabinetinin müvafiq qərarı ilə müəyyən edilmiş iş və xidmət sahələri istisna olmaqla, digər sahələrdə iş və xidmətlər dayandırılır. Paytaxt Bakı da daxil olmaqla, bəzi yaşayış məntəqlərinə giriş-çıxış dayandırılacaq, gündə bir dəfə olmaqla 3 saatlıq SMS icazə sistemi tətbiq ediləcək.

Qapanma tətbiq edildiməsilə bağlı iş yerlərini itirən insanlara birdəfəlik 190 manat maliyyə yardımı ediləcək

Xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur.

Mütəxəssislərə görə, indiki halda karantin qaydalarının tələblərinə ciddi əməl etməklə, maska taxmaqla, sosial izolyasiya olunmaqla virusa qalib gəlmək olar.

“Mətbuat.az” saytı  “Ərdoğanın Bakıya səfəri yeni siyasi mərhələyə səbəb olacaq'' - ekspertdən açıqlama” sərlövhəli məqalədə Türkiyə  prezidentinin Azərbaycana səfərini dəyərləndirir.

İşğalda olan ərazilərin azad edilməsilə bağlı İkinci Qarabağ Müharibəsində qazanılmış qələbə münasibətilə dekabrın 10-da Bakıda Zəfər Paradı keçiriləcək. Bununla əlaqədar Türkiyə prezidenti Ərdoğan Bakıya gəlib. Bu səfərin mahiyyətini isə ekspert Məhəmməd Əsədullazadə dəyərləndirir.

Ekspertə görə, Türkiyə prezidentinin bu səfəri iki dövlət arasında yüksək əməkdaşlığın mesajıdır.

Digər tərəfdənsə ekspertə görə, bu səfər ikitərəfli hərbi əməkdaşlığın yeni mərhələsi olacaq.

O əlavə edir ki, bu səfər çərçivəsində sülhməramlıların Qarabağda fəaliyyəti və Monitorinq Mərkəzinin iş prinsipi, növbəti mərhələdə Ermənistanla sülh danışıqları, Mehri dəhlizi müzakirə ediləcək. Bununla yanaşı Bakı-Naxçıvan-Qars dəmiryolu xəttinin tikintisi məsələsi də müzakirə mövzusudur.

Politoloq vurğulayır ki, Azərbaycan-Türkiyə tandemi regionda separatizmi, işğalçılığı aradan qaldıracaq, Qarabağla bağlı qaranlıq qalan bütün məsələlərin həllinə rəvac verəcək.

Politoloq hesab edir ki, bu səfər yeni siyasi mərhələyə qədəm qoymaqla bərabər, həm də Azərbaycanın xeyrinə regionda müsbət dəyişikliklərə səbəb olacaq.

“Bizimyolinfo.az”  saytı isə Rusiyadan Azərbaycanın “Zəfər Paradı”na qarşı pomidor və alma qadağası – açıqlama” sərlövhəli məqalədə Rusiyanın Azərbaycana alma, pomidor qadağasını dəyərləndirir.

Söhbət ondan gedir ki, dekabrın 10-da Bakıda Zəfər Paradı keçirilir, Rusiyanın aidiyyatı qurumları isə məhz dekabrın 10-dan Azərbaycandan Rusiyaya ixrac edilən pomidor və almalarda xəstəlik aşkarlandığını iddia edərək bu ixraca qadağa qoyur. 

Rusiya bazarı Azərbaycanın aqrar sektoru üçün önəmlidir. 2019-cu ildə  Azərbaycandan bu ölkəyə təzə və soyudulmuş pomidor idxalı 172.359 min ton təşkil edib. Rusiyaya pomidor tədarükünün həcminə görə Azərbaycan birinci yerdədir.

Mütəxəssis və ekspertlər diqqəti  hadisənin baş verdiyi tarixə, Zəfər Paradının keçiriləcəyi 10 dekabr üzərinə cəmləyir.

Ekspertlər hesab edirlər ki, Rusiya bu addımı ilə öz aləmində Azərbaycanın zəfər sevinci kefinə “soğan doğrayır”. Mütəxəssislər diqqəti ona çəkirlər ki, Rusiyanın vaxtaşırı Azərbaycana tətbiq etdiyi qadağalar konkret siyasi proseslərlə bağlı olur və bundan siyasi təzyiq vasitəsi kimi istifadə edilir.

İqtisadçı-ekspert Qubad İbadoğlu bildirib ki, bu qərarın dekabrın 10-da Bakıda keçiriləcək hərbi paradla əlaqəsi var.

Q.İbadoğlu deyir ki, Azərbaycan ordusunun Ermənistandan qənimət kimi ələ keçirdiyi və sabahkı paradda nümayiş etdirəcəyi hərbi texnika Rusiya istehsalıdır, onların paradda nümayiş etidirlməsi Rusiya hərbi sənaye kompleksini nüfuzdan salır.

“Redaktor.az” saytı isə "Ərazini tərk etməsələr, güc yolu ilə çıxarılacaqlar” TÜRKİYƏ ordusu gəlir sərlövhəli məqalədə Monitorinq Mərkəzinin yerləşdirilməsi məsələsi müzakirə olunur.

Müzakirədə iştirak edən hərbi ekspert Əbuzər Əbilov deyir ki, Türkiyə-Rusiya birgə Monitorinq Mərkəzinin Ağdamda yerləsdirilməsi məqsədə uyğundur.

Ekspert fikrini belə əsaslandırılır ki, Ağdamdan bütün Qarabağ ərazisini nəzarətdə saxlamaq mümkündür”.

Fikrini davam etdirərək ekspert vurğulayıb ki, Qarabağın həm quru, həm də hava ərazisini Ağdamdan müşahidə etmək olur.

Hərbi ekspert bildirir ki, Ağdamın Ağdərəyə yaxın olması və bu bölgədə ermənilərin daha sıx məskunlaşması, qondarma rejimin silahlı qüvvələrinin hələ də ərazidən çıxmaq istəməməsi səbəbindən Monitorniq Mərkəzi məhz Ağdamda qurulub.

Ekspert hesab edir ki, bununla keçmiş Dağlıq Qarabağın ermənilər yaşayan hissəsinin təhlükəsizliyi təmin ediləcək, eyni zamanda gələcəkdə burada mümkün separatşı aktivliyinin də qarşısı alınacaq.

Hərbi ekspert deyir ki, monitorniq qrupunun məqsədi məhz sülhü təmin etmək və qondarma rejimin qüvvələrini Azərbaycan ərazisindən çıxarmaqdır, əgər həmin qüvvələr ərazini tərk etməsə, o zaman güc yolu ilə çıxarılacaq.