Paytaxt Bakının inkişafı, təhsil sahəsindəki qayğılar, bələdiyyə seçkiləri ətrafında müzakirələr və s. məsələlər medianın aparıcı mövzuları sırasındadır.

Vətəndaşa diqqət- dövrün tələbi

“Azərbaycan” qəzeti “Bakının abadlığı və bakılıların rahatlığı” sərlövhəli məqalədə son 29 ildə Bakının inkişafını dəyərləndirir.

Müəllif vurğulayır ki, dövlət baçısı İlham Əliyev bu günlərdə Bakı meri Eldar Əzizovu qəbul edib və söhbət paytaxtın inkişafı ilə yanaşı problemlərin aradan qaldırılması ətrafında gedib.

Müəllif deyir ki, Bakı son 20 ildə yeni memarlıq nümunələri, göydələnlərin ucaldılması, tarixi binaların, yolların bərpası, park və xiyabanların salınması ilə simasını dəyişərək dünyanın ən gözəl şəhərlərindən birinə çevrilib.

Müəllif əlavə edir ki, paytaxtın ekoloji vəziyyətinin yaxşılaşdırılması üçün Balaxanı zibilxanasının ləğvi, müasir poliqonun qurulması, zibilin çeşidlənməsi, bərk tullantıların yandırılmasının müasir texnologiyalarla aparılması ilə paytaxtda ən ağır ekoloji fəlakət mənbəyi ləğv edilib.

Yazı müəllifinə görə, daha bir antiekoloji mənbə Bibiheybət mədənlərindəki neftlə çirklənmiş yerlər, gölməçələr idi, orada da yeni park, idman şəhərciyi, müasir idman hovuzu, digər ictimai obyektlər tikilib.

Müəllif vurğulayır ki, Böyükşor gölünə onilliklər ərzində axıdılan kanalizasiya, lay suları, neftlə çirklənmiş sular bu əraziləri də ekoloji fəlakət zonasına çevirmişdi, bu gün bataqlıq kimi tanınan yerdə olimpiya stadionu tikilib, ağaclar əkilib, bunlardan əlavə, keçmış Sovet küçəsində də 20 hektarlıq əsrarəngiz park salınıb və s.

Müəllif deyir ki, həmin görüşdə dövlət başçısı bir çox binalarda, bloklarda vəziyyətin ürəkaçan olmadığını, lift təsərrüfatının köhnəldiyini, nümunəvi həyətlərin qurulmasının vacibliyini, evlərarası həyətlərin bəzi hallarda zəbt olunduğunu vurğulayıb.

Yazıda vurğulanır ki, dövlət başçısı şəhərin hər yerinin abad olunmasını, vətəndaşları narahat edən bütün problemlərin aradan qaldırılmasını, şəhərsalma qaydalarına tam əməl edilməsini, şəhərsalma qaydalarının pozulmasını ön plana çıxarıb.

Müəllif deyir ki, həmin görüşdə ən vacib mövzulardan biri də rayon icra hakimiyyətlərinin vətəndaşlara diqqət məsələsi olub və “Bakı Şəhər İcra Hakimiyyəti və bütün rayon icra hakimiyyətləri vətəndaşlara böyük diqqətlə yanaşmalıdırlar” deyə dövlət başçısı bəyan edib.

Bu birləşmələr təhsilə nə verəcək?

“Lent.az” da isə “Qurumların birləşdirilməsi təhsilə nə verəcək? – “ciddi problemlər var” sərlövhəli məqalə oxumaq olar.

Müəllif təhsil idarəçiliyi sahəsində bəzi qurumların birləşdirilməsi barədə  təhsil sahəsi üzrə ekspert Kamran Əsədovla söhbətləşir.

Müəllif deyir ki, baş nazir Əli Əsədovun qərarı ilə Təhsil İşçilərinin Peşəkar İnkişafı İnstitutu (TİPİİ), İstedadlı Uşaqlarla İş Mərkəzi (İUİM), Respublika Elmi-Pedaqoji Kitabxanası (REPK) Təhsil İnstitutuna (Tİ) birləşdirildi.

Yazi müəllifi əlavə edir ki, əslində bu, Azərbaycan prezidenti İlham Əliyevin bu il yanvarın 17-də imzaladığı fərmanla həyata keçirilib.

Ekspert K.Əsədov baş nazirin qərarına şərhində bildirib: “Mənə görə Təhsil İşçilərinin Peşəkar İnkişafı İnstitutu (TİPİİ) yaradılanda qarşıya qoyulan heç bir hədəfə çatmadı, məqsədə nail olmadı. Bu institutu ancaq Müəllimlərin İşə Qəbul (MİQ) və Diaqnostik Qiymətləndirmə (DQ) imtahanlarında və müəllimlərə mənasız təlimlər keçirib sertifkartlar paylayanda görürdük”.

Ümid edirəm ki, bundan sonra Təhsil Nazirliyinin aparatı təhsilin idarə edilməsi, Tİ isə təhsilin məzmunu ilə məşğul olacaq. Çünki bu istiqamətdə ciddi boşluq və problemlər mövcuddur.

K.Əsədov deyir ki, TİPİİ  fəaliyyəti dövründə müəllimlərin peşəkarlıq imkanlarının genişləndirilməsi istiqamətində ciddi bir iş görmədi.

Ekspert iddia edir ki, son üç ildə elmi-tədqiqat müəssisəsi kimi Tİ fundamental və tətbiqi tədqiqatlar, təhsil innovasiyalarının tədqiqi, yaradılması və tətbiqi ilə bağlı nəzəri, praktiki məsələləri araşdırmaq sahəsində ciddi bir işləri görülməyib.

K.Əsədova görə, 3 ildən çoxdur ki, institut Təhsil Nazirliyinin qoşması kimi fəaliyyət göstərir, hazırda bu institutun işi, tədqiqatı, araşdırması yoxdur: “Təşəbbüskarlıqlarını görmürəm. Son 5 ildə təhsil sahəsində böyük islahatlar həyata keçirilir. Böyük yenilik və rezonansla müşayiət olunan həmin islahatlara başlamadan öncə Təhsil İnstitutunda təhlil aparılmalı idi. Amma bunların heç biri baş vermir. Hazırda metodik vəsaitlər və təhsilin idarəçiliyinə lazım olan vəsaitlərin verilməsində ciddi problemlər var. İstər məktəbəqədər təhsil müəssisələrində, istər orta, istərsə də ali məktəblərdə ümumi mərkəzdən təhsil materiallarının idarə olunması, aparılan elmi-tədqiqat işləri ilə bağlı ciddi qüsurlar var”.

Belə bələdiyyə kimə lazım?-ekspert baxışı

“Redaktor.az”da isə “Belə bələdiyyələr kimə və nəyə lazımdır? ölkədə seçki ab-havası yoxdur sərlövhəli məqalə diqqəti çəkir.

Müəllif deyir ki, dekabrın 23-də  ölkədə bələdiyyə seçkiləri keçiriləcək və xarici təcrübəyə istinadən bələdiyyə seçkilərinin demokratiyanın inkişafında, partiyaların siyasi aktivliyində mühüm rol oynadıını vurğulayır.

Müəllif əlavə edir ki, Azərbaycanda belə deyil, məlum və qeyi-məlum səbəblərdən, bu seçkilərdə aktivlik həddən artıq zəif olur.

Üstəlik müəllifə görə, bələdiyyələrin dotasiyalar hesabına yaşaması, icra orqanlarından birbaşa asılı olması fəaliyyət əmsalına əsaslı təsir edir.

Seçkilərin keçirilməsinə çox az vaxt qalmasına baxmayaraq, bununla bağlı xalqda heç bir hərəkətlilik yoxdur: “Hazırlıqlar, namizədlər barədə məlumatlar çox azdır. Türkiyədə keçirilən seçkilər daha maraqla izlənilirdi, nəinki ölkəmizdə”.

S.Əliyevə görə, bələdiyyələrdən gözləntilər çox olsa da, təəssüf ki, bu institut özünü doğrulda bilmədi, bunun səbəbi mövcud qanunvericiliklə bağlıdır. “Faktiki olaraq, Azərbaycanda bələdiyyə institutu ona verilən səlahiyyətləri icra etmək hüququna malik deyil. Başqa ölkələrlə müqayisə aparsaq, Azərbaycanda bələdiyyənin səlahiyyətlərinin çox aşağı olmasını müşahidə edirik. Normalda bələdiyyə yerli hakimiyyətdir və əhaliyə ən yaxın olan qurumdur. Yəni, əhalinin problemlərini, yerlərdə olan narazılıqları bələdiyyədən yaxşı bilən qurum ola bilməz”.

Ekspert bildirir ki, Azərbaycanda bu gün yerli səviyyədə olan bütün problemləri, icra hakimiyyətləri tərəfindən görülür: “Yəni, bu sahədə paralellik var. Bu paralellik heç olmasa kənd, qəsəbə səviyyəsində aradan qalxmalıdır. Eyni zamanda biz regional idarəetməyə keçid etməliyik. Yəni icra hakimiyyəti regional olmalı, bələdiyyələr isə kənd, qəsəbə, rayon səviyyəsində qalmalıdır”.

S.Əliyev deyir ki, Azərbaycan yerli özünüidarəetməyə dair Avropa Xartiyasının bəzi müddəalarını ratifikasiya edib: “Bununla da Avropa Şurası qarşısında öhdəlik götürüb ki, yerli səlahiyyətlər bələdiyyələrə veriləcək. Amma bizim bələdiyyə statusu haqqında qanuna baxsaq, görərik ki, bizdə yerli idarəetmə səlahiyyətlərinin müəyyən hissəsi və ya az hissəsi bələdiyyələrə verilib, bu da çox cüzidir. Ölkəmizdə bələdiyyələrə verilməli olan səlahiyyətlərlə, bələdiyyələrin öhdəlikləri səhv anlaşılır. Bunlar bir-birindən fərqli anlayışlardır. Məsələn, öhdəlik odur ki, bələdiyyə qəbirstanlıqları saxlamalıdır, amma bu, onun səlahiyyəti deyil. Səlahiyyət odur ki, qəbiristanlıqların saxlanmasını bələdiyyəyə tapşırıb, büdcədən bunun üçün bu quruma pul ayrılır. Yəni, səlahiyyətin arxasında öhdəlikdən fərqli olaraq, pul dayanır. Bizdə bələdiyələrə hər hansı bir səlahiyyət verilmir”.