Media-icmal 13.10.18

Azərbaycandakı ictimai sabitlik, xaricdə təhsil almış kadrlara münasibət, idarəçiliyə alternativ baxış, ailə institutunun zəifləməsi və s. məsələlər bugünki (13 oktyabr, 2018-ci il) medianın aparıcı mövzularındandır...

İlham Əliyevin "ictimai sabitlik modeli"

"Azərbaycan" qəzeti "İlham Əliyevin "ictimai sabitlik modeli" MDB-də nümunədir" sərlövhəli məqalədə Azərbaycandakı sabitliyin səbəblərini dəyərləndirir.

Müəllif qısa müddətdə əldə etdiyi sosial-iqtisadi uğurlara görə Azərbaycanın dünya miqyasında liderlər mövqeyinə yüksələn, dünya birliyi sistemində siyasi kursu nəzərə alınan, uğurları qlobal miqyasda qəbul edilən ölkəyə döndüyünü bildirir.

Məqalə müəllifi vurğulayır ki, dünyada qlobal maliyyə böhranının dərinləşdiyi bir halda Azərbaycanda həyata keçirilən siyasət nəticəsində ölkədə bütün sahələrdə uğurlar və yeniliklər əldə edilib: "Bütün bu uğurlar və bütövlükdə Azərbaycanın hazırkı reallıqları ulu öndər Heydər Əliyevin müəyyən etdiyi inkişaf strategiyasının nə dərəcədə mükəmməl xarakter daşıdığını təsdiq edir. Həm də bir daha aydın olur ki, bu siyasət yeni çalarlarla daha da zənginləşdirilərək dövrün tələblərinə uyğun formada Prezident İlham Əliyev tərəfindən böyük müvəffəqiyyətlə davam etdirilir".

Müəllif Azərbaycandakı ictimai-siyasi sabitliyi ən böyük uğurlardan biri sayır və bu sabitliyi qalan bütün uğurların yerinə yetirilməsində əsas amil adlandırır.

Müəllif Avropanı "tarixən davam edən müstəmləkəçilik və imperializm siyasətində", bu siyasətin Yaxın Şərq və Afrika ölkələrində silahlı qarşıdurmalara səbəb olmasında ittiham edərək, Azərbaycanda vəziyyətin tamamilə fərqli olduğunu bildirir.

Yazı müəllifi deyir ki, müstəqilliyin ilk illərində hakimiyyətdə olan qüvvələrin başıpozuq fəaliyyətlərinin nəticəsində Azərbaycanda təhlükəsizliyə təhdidlər baş alıb gedirdi: "Yalnız ulu öndər Heydər Əliyevin hakimiyyətə qayıdışı ilə ölkədə sabitlik bərqərar edildi, ictimai-siyasi sabitlik üçün təhlükə doğuran zərərli meyllərə, qanunsuz silahlı birləşmələrə qarşı uğurlu və təxirəsalınmaz tədbirlər həyata keçirildi".

Müəllif deyir ki, Prezident İlham Əliyevin 15 illik fəaliyyətinin ən qabarıq tərəflərindən biri də bu dövrdə ictimai-siyasi sabitliyin qorunub saxlanılması, daha da möhkəmləndirilməsi, cəmiyyət həyatının təhlükəsizliyinin təmin olunmasıdır və təsadüfi deyil ki, Azərbaycan dünyanın ən təhlükəsiz diyarlarından biri kimi tanınır.

Parlamentdə yüksək maaş "dilemması"

"Bizimyol.info"da isə "Xaricdə təhsil alanlara fərqli maaş təklif edilməlidir" sərlövhəli məqalə oxumaq olar.

Müəllif bildirir ki, Milli Məclisin deputatı Qüdrət Həsənquliyev parlamentdə Azərbaycanda ingilis dilli pulsuz məktəblərin açılması təklifilə çıxış edib və təklifini belə əsaslandırıb: "Ölkəmizdə inglis dilinin öyrənilməsinə də ehtiyac var və bu dilin öyrənilməsi ilə bağlı dövlət proqramı qəbul edilməlidir".

Müəllifin sözlərinə görə, deputat bu məsələni parlamentdə Rusiyanın daha üç məktəbinin Azərbaycanda filiallarının açılması ilə bağlı fikirlərin səsələndiyi fonda bildirib.

Q.Həsənquliyev deyir ki, Azərbaycanda ingilis dilli məktəblər var, lakin onlar çox bahalıdır: "Rusiya Azərbaycanda daha 3 universitetinin filialını açmaq niyyətindədir. O zaman dünyanın ilk 200-lüyünə daxil olan ali məktəblərin ölkəmizdə filialının açılması istiqamətində də işlər görülməlidir".

Müəllif deyir ki, deputat xaricdə təhsil alan tələbələrin Azərbaycanda işləmələri məsələsinə toxunaraq bildirib: "Çox təəssüf ki, xaricdə təhsil alan tələbələr ölkəmizə qayıtdıqdan sonra burada əmək haqqının azlığına görə çalışmaq istəmir, yenidən geri qayıdırlar. Həmin uşaqlara fərqli maaş təklif etmək imkanı olmalıdır. Biz dövlət orqanlarına, idarə və təşkilatlara belə bir şərait yaratmalıyıq ki, fərqli əmək haqqı vermək imkanları olsun. Xaricdə təhsil alan tələbələr kadr ehtiyatı kimi geri çağırılmalıdır".

Məqalə müəllifi vurğulayır ki, xaricdə ali təhsil almış gənclərə fərlqi maaş məsələsinə Milli Məclis sədrinin birinci müavini Ziyafət Əsgərov etiraz bidirib və xaricdə təhsil alanları Azərbaycandakı tələbələrdən fərqləndirməyi, onları daha yuxarı pilləyə qoymağı doğru saymayıb.

Üstəlik, Z.Əsgərov bu fərqləndirmə təklifini Azərbaycan təhsil və tələbəsini aşağılamaq kimi dəyərləndirib: "Bakı Dövlət Universiteti, ADA Universiteti, Bakı Ali Neft Məktəbi yaxşı kadrlar yetişdirir, məgər onlar xaricdə oxuyanlardan əksikdirlər?".

Z.Əsgərov iddia edib ki, xaricdəki universitetlərdə qeyri-adi təhsil vermirlər və öz fəaliyyətindən misal çəkərək, tələbələrindən 22 nəfərin magistr təhsilini müxtəlif xarici ölkələrdə aldıqlarını, onların 80%-nin universiteti fərqlənmə diplomu ilə bitirdiklərini deyir və bunu onların Azərbaycanda aldıqları bakalavr təhsilinin nəticəsi adlandırır.

Xatırladaq ki, Azərbaycanda Rusiyanın Moskva Dövlət Universitetinin, Seçenov adına universitetin filialları fəaliyyət göstərir, daha üç universitetin filialının açılması gözlənilir.

Bu yaxınlarda açıqlanmış beynəlxalq icmala görə, Azərbaycanın və Rusiyanın ali məktəblərindən heç brinin adları dünyanın top-200 univesitetləri sırasında yer almır.

Təcrübə dediyin...

"Azadlıq.info" az da isə "Təcrübə və dövlət idarəçiliyi" sərlövhəli məqalə diqqət çəkir.

Müəllif ölkədə dövlət idarəçiliyinin düzgün istiqamətdə çalışmadığı iddiasını ortaya qoyur.

Müəllifə görə, qarşıya qoyulan məqsədə çatmaq, etimadı doğrultmaq, əsl vətəndaş olmaq üçün ən əsas insani keyfiyyət məsuliyyətli olmaqdır və bu keyfiyyət olduqda digər zəruri addımlar atılır.

Müəllifə görə, burada əsas məqamlardan biri də getdiyin yolda səndən əvvəlkilərin buraxdığı səhvləri təkrarlamamaq, ondan ibarət almaqdır.

Yazı müəllifi iddia edir ki, təcrübə adlı nəticə çıxarmaq kimi bir hal yoxdur və bu mənada bəzi filosoflardan sitatlar da gətirir: "Məsələn, Huxley deyirdi ki, "təcrübə bir insanın başından keçənlər deyil, keçənlərin qoyduğu izlərdir". Oskar Uayld isə "təcrübə hər kəsin öz səhvlərinə verdiyi addır" deyirdi. Kamyunun nəzərində isə "təcrübə"sözü mənasızdır. O deyirdi ki, təcrübəlilik təcrübədən asılı deyil. Təcrübəlilik deyil, dözüm əsasdır, ümumiyyətlə, Kamyuya görə, heç bir paraktika, təcrübə insanı müdrik etmir, xəbərdar edir".

Daha sonra müəllif bu müstəvidə düşüncələrini Azərbaycanda mövcud idarəçiliyə cəmləyərək deyir: "Gözümüzün qarşısında dövlətçilikdən, idarəçilikdən xəbəri olmayanlar, hər dəfə ağzını açanda lətifə mövzusuna çevrilənlər 25 ildir ki, dövlət sükanının arxasında əyləşiblər. Həm də bu 25 il ərzində heç bir müsbət təcrübədən faydalanmaq istəməyiblər. Bütün sahələri bərbad vəziyyətə salıblar. Elə bir mənzərə yaranıb ki, "dövlətçilik", "dövlət strategiyası", "idarəçilik fəlsəfəsi" deyəndə, gözümüz önünə vətəni çapıb-talamaq gəlir. Azərbaycan insanı elə başa düşür ki, dövlət məhz belə idarə olunmalıdır. Bəzən bu idarəçiliyə şükr edənlər də olur".

Müəllif iddia edir ki, mövcud hakimiyyətə alternativ olanlar isə 25 ildir hakimiyyətə düzgün idarəçiliyin yolunu göstərir, amma hakimiyyət "işıq gələn tərəfə" getmək istəmir, bu günə qədər olan tənqidlərdən dərs almır.

Müəllif mövcud hakimiyyətə münasibətdə "bunlardan başqa ölkəni heç kim idarə edə bilməz" kimi düşüncəni də əsassız, "korroziyaya uğramış yalan" sayır və ölkəni indikilərlə müqayisə edilməz dərəcədə yaxşı idarə edəcək potensial və qüvvə olduğunu bildirir.

Müəllifə görə, bu gün ən böyük təcrübə qətiyyət, əzm, cəsarət, iradədir, sərt rejimin qarşısında duruş gətirə bilməyənlər bu keyfiyyətlərin adını "təcrübə" qoyublar.

Müəllif iddia edir ki, ölkə insanı gecikə-gecikə təcrübə yığmır, əksinə təcrübə siçanı olur və bundan xilas olmaq lazımdır.

Bir dərdin min dərmanı olsa da ...

"Novoye Vremya" qəzetində isə "Ailə institutu niyə dağılır?" sərlövhəli məqalə maraq doğurur.

Müəllif bu ilin 8 ayında ölkədə boşanmalarla bağlı rəsmi göstəricilərə istinadən bu sahədə vəziyyətin heç də sevindirici olmadığını bildirir: "Bu ilin 8 ayında Ədliyyə Nazirliyinin bölmələri 40235 nikah qeydə alıb. Bu müddətdə 9877 boşanma baş verib. Hər 1000 nəfərə 6,2 nikah, 1,5 boşanma düşür.

Müəllif deyir ki, Azərbaycan kimi ailə qurulmasına ciddi diqqət yetrirlən bir ölkədə 10 minə yaxın ailənin dağılması da çoxdur və bu boşanmalar ailə institutunun deqradasiyaya uğramasının göstəricisidir.

Yazı müəllifi ölkədə narkomanların sayının çoxalması ilə bağlı göstəricilərlə boşanmaların artması arasında birbaşa əlaqə gördüyünü bildirir: "Bu hal, əlbəttə, ailə institutunun zəifləməsinə taleyüklü təsir göstərir. Alkoqolizmin, narkomanlığın ailələri dağıtdığını, ailə-məişət zəminində cinayətlərin artdığını göstərir".

Müəllif bu zəmində ölkədə artmaqda olan intihar hallarını da arxa plana keçirmək düşüncəsində olmadığını deyərək, ölkədə sosial vəziyyətin də ailə institituna təsir göstəridiyini xüsusi vurğulayır: "İşsizlik, gəlirin olmaması, mənzil problemi, ailələrdə münaqişələrə və nəticədə ailələrin dağılmasına səbəb olur.

Müəllif deyir ki, göründüyü kimi, boşanmaların artması səbəbləri çoxdur və hakimiyyət təkcə burada gösətriciləri göstərməklə kifayətlənməməli, bunun qarşısnı almaq üçün sistemli tədbirlər görməlidir.

Müəllifə görə, dövlət qurumları, sahə mütəxəssisləri, ailə probemləri uzmanları bu məsələyə ciddi yanaşmalıdırlar.

Yazı müəllifi iddia edir ki, bu sahədə qurumlar çox olsalar da, işlərində təpər yoxdur və boşanmların sayının artması bu qurumların fəaliyyətsizliyinin də göstəricisidir.

Müəllifə görə, bu problemə yenə də barmaqarası baxış davam etsə, ailə dəyərləri həqiqətən ciddi təhlükə altına düşəcək. --0--