Media-icmal 13.11.20

"Azərbaycan" qəzeti  "Hikmət Hacıyev: Azərbaycanın xaricdəki diplomatik nümayəndəliklərinin rəhbərləri ölkənin rəsmi mövqeyinə zidd olan özbaşına açıqlamaların verilməsindən çəkinməlidirlər" sərlövəhli məqalədə Azərbaycanın bəzi səfirlərinin tələskən mövqelərinə münasibət ifadə edilir.

Rusiya Federasiyası Silahlı Qüvvələrinə məxsus helikopterlə əlaqədar baş vermiş faciəvi hadisə ilə bağlı noyabrın 9-da (həmin gün Ermənistanın Naxçıvanla sərhədində Rusiyaya məxsus helikopter Azərbaycan tərəfindən vurulub və bununla bağlı Azərbaycan tərəfi müvafiq izah verib - red.) Azərbaycan Respublikasının Prezidenti İlham Əliyev və Rusiya Federasiyasının Prezidenti Vladimir Putin arasında telefon danışığı olub.

Müəllif deyir ki, Azərbaycan Xarici İşlər Nazirliyi müvafiq açıqlama ilə çıxış edib, Azərbaycan Baş Prokurorluğu tərəfindən bu təsadüfi faciə ilə bağlı cinayət işi açılıb. Azərbaycan və Rusiya Baş prokurorları arasında istintaqın gedişi ilə əlaqəli telefon danışığı olub, istintaqın gedişi ilə bağlı qarşılıqlı məlumat mübadiləsi həyata keçirilir.

Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Azərbaycanın Rusiyada səfirinin (Polad Bülbüloğlu nəzərdə tutulur - red.) bu məsələ ilə bağlı verdiyi şərhİ yersiz adlandırıb, belə halların Azərbaycan-Rusiya əlaqələrinə xələl gətirə bilmədiyini vurğulayıb.

Prezidentin köməkçisi deyib: "Həmçinin, məsələnin mahiyyətinə varmadan Azərbaycanın Rusiyadakı səfirinin Azərbaycanın Dağlıq Qarabağ bölgəsinin statusu ilə bağlı söylədikləri qəbuledilməzdir. Azərbaycanın xaricdəki diplomatik nümayəndəliklərinin rəhbərləri və digər rəsmi şəxsləri ölkənin rəsmi mövqeyinə və Prezident İlham Əliyevin yürütdüyü siyasətə zidd olan özbaşına açıqlamaların verilməsindən çəkinməlidirlər".

"Yenisabah.az" saytı "Qarabağda birmənalı olaraq Azərbaycan qanunları işləyəcək" sərlövhəli məqalədə deputat Anar Məmmədov Qarabağda ermənilərin hansı statusla yaşayacaqlarını şərh edir.

O hesab edir ki, Qarabağda Xankəndində, Xocalı rayonunun bir hissəsində və Xocavənd raonunun çox cüzi bir hissəsində yaşaya bilərlər. 

Deputata görə, Azərbaycan vətəndaşlığını qəbul edən ermənilərin Azərbaycan dilini öyrənmələri şərtdir, çünki təhsili Azərbaycan dilində alacaqlar. 

A.Məmmədov bu ərazilərdə Azərbaycan manatının dövriyyəyə buraxılacağını, şərtləri Azərbaycan tərəfin diktə edəcəyini, asayişin qorunmasına Azərbaycan polisinin nəzarət edəcəyini vurğulayır: "Qarabağa heç bir status verilmədiyinə görə, digər rayonlarda olduğu kimi, burada da Azərbaycan qanunları işləyəcək".

Ermənistanla Qarabağ arasında əlaqə yalnız Laçın dəhlizi vasitəsilə mümkün olacaq və məntəqəyə nəzarət Azərbaycan tərəfin əlində olacaq.

"Moderator.az" saytı isə Azərbaycanın qazandığı qələbədən sonra Ermənistan daxilində proseslərin inkişaf istiqamətini politoloq Zərdüşt Əlizadə ilə dəyələndirir.

Politoloqa görə, Kremldə  Ermənistanda hakimiyyət məsələsinə birmənalı münasibət yoxdur, fikir ayrlığı var, belə ki, Rusiya Xarici İşlər naziri Sergey Lavrovun mövqeyi də bundan irəli gəlir.      

Z.Əlizadə deyir ki, Qarabağ məsələsinə bağlı S.Lavrovun dediklərində qeyri-adi heç nə yoxdur: "S.Lavrov sadəcə son bəyanatdan qəzəblənmiş erməniləri sakitləşdirmək üçün elə danışır. Ermənistanda hakimiyyət dəyişikliyinin olacağını da gözləmirəm".

O qeyd edir ki, Rusiya Ermənistanda hakimiyyət dəyişkliyinə cəhd edəcək, amma buna nail ola bilməyəcək, çünki Paşinyan hakimiyyəti də zəif deyil. 

Onun sözlərinə görə, son iki ildə Paşinyan hakimiyyəti xeyli möhkəmlənib, üstəlik Qərb ölkələrinin dəstəyini də əldə edib və qarşıdakı günlərdə Ermənisatnda başlanmış mitinqlər də səngiyəcək.

Z.Əlizadə deyir ki, başqa tərəfdən də Ermənistan və region üçün Paşinyanın hakimiyyətdə qalması daha sərfəlidir.

"Müsavat. com" saytında  "Türkiyə hərbiçiləri Azərbaycana gətiriləcək: Onların missiyası Rusiya sülhməramlıları ilə eynidir" sərlövhəli məqalədə Cənubi Qafqazda problemlərin həlli üçün Türkiyə, Azərbaycan və Rusiya fəaliyyət formatı yaradıldığı deyilir.

Müəllifin fikrincə, Ermənistanın bu prosesdə iştirakı əslində formal xarakter daşıyır və ATƏT-in Minsk qrupu formatı öz əhəmiyyətini tamamilə itirib, hətta ABŞ və Fransa müəyyən cəhdlər göstərsələr belə, bu dövlətlərin problemin həlli prosesinə cəlb ediləcəyi qətiyyən inandırıcı deyil.

Müəllifə görə, böyük ehtimalla Ermənistanda ümid edirdilər ki, bu vəziyyət əbədi olaraq davam edəcək, Azərbaycan öz ərazi bütövlüyünü bərpa etmək üçün hərbi əməliyyatlara əl atmayacaq və ərazilər Ermənistanın nəzarətində qalacaq.

Müəllif yada salır ki, Ermənistan qırmızı cizgiləri keçmişdi, odur ki, hərbi əməliyyatlar başladı.

Münaqişənin yalnız sülh danışıqları ilə həllinin mümkünlüyünü iddia edənlərin əksinə olaraq, problem hərbi vasitələrlə yoluna qoyuldu.

Noyabrın 10-da Azərbaycan, Rusiya və Ermənistanın imzaladığı həmin sənəd çərçivəsində artıq münaqişənin nizamlanması prosesinin sonuncu fazasına start verilib. Müəllif vurğulayır ki, imzalanmış kapitulyasiya bəyannaməsinə görə, Ermənistan Azərbaycanın Ağdam, Laçın və Kəlbəcər rayonlarını dekabrın 1-dək döyüşsüz boşaltmalıdır.