Media-icmal 27.05.21

“Bu dəfə müharibə Qarabağda olmayacaq“

“Yenisabah.az” saytı xəbər verir ki, “Azərbaycan müharibədə qələbə qazandıqdan sonra Ermənistanla sərhəddi müəyyənləşdirməyə başlayıb.

“Atlas Araşdırmalar Mərkəzi isə bəyan edir ki, bu normal proses Ermənistanda narazılıq yaradıb. Çünki 30 ilə yaxındır sərhəddin nə olduğunu bilmirdilər, Qarabağ və ətraf rayonların əbədi nəzarətlərində qalacağını zənn edirdilər və buna alışmışdılar”. Bunu “Atlas” Araşdırmalar Mərkəzinin rəhbəri Elxan Şahinoğlu bildirib. Politoloq indi Azərbaycan hərbçilərinin ermənilərin bu “alışqanlığına” son qoyduğunu vurğulayıb.

Mərkəz rəhbəri deyir ki, Ermənistan hakimiyyəti Rusiyanın Kollektiv Təhlükəsizlik Müqaviləsi Təşkilatının işinə çox müdaxilə etməsini istəyir, amma Rusiya müdaxilə etmədiyi üçün bu, daha çox narazılığa səbəb olur.

Mərkəz rəhbərinə görə, sərhəddə atışma olması ilə bağlı erməni tərəfin yaydığı xəbərlər daha çox sərhəddə gərginlik yaratmağa hesablanıb. Əksinə, məlum oldu ki, erməni tərəf Azərbaycana atəş açıb.

Ermənistan itkilərin yerini doldura bilməyib, Rusiyadan müdafiə istəyir, sərhəd məsələsi isə iki dövlət arasında  məsələdir və Rusiya buna müdaxilə edə bilməz. Politoloqa görə,  əgər Rusiya prosesə müdaxilə edərsə Azərbaycan-Rusiya münasibətləri kəskinləşəcək.

“Modern.az”  saytında “Bakıdakı dəhşətli tıxacların səbəbi” açıqlandı”sərlövhəli məqalədə deyilir ki, son günlər Bakı tıxacların əlində əsir qalıb, ən acınacaqlısı isə odur ki, əvvəllər səhər və axşam pik saatlarda üzləşdiyimiz tıxacla indi bütün günboyu qarşılaşırıq.

Bakı Nəqliyyat Agentliyinin mətbuat katibi Mais Ağayev Modern.az-a açıqlamasında tıxacın hər küçədə müxtəlif səbəblərdən yarandığını bildirib. Onun fikrincə, bir küçədə tıxac nəqliyyat vasitələrinin çoxluğuna görə yaranırsa,  digər küçədə sıxlıq halları hansısa bir avtomobilin nasazlığı və sair ilə bağlı olur.

Avtomobil sahəsi üzrə ekspert Elməddin Muradlı deyir ki, insanlar şəxsi həyatda şəxsi nəqliyyat vasitələrinə daha çox üstünlük verirlər.

O vurğulayır ki, bununla paralel təxminən 1 aydır ki, Bakıda “Formula-1” yarışlarına hazırlıq prosesi gedir və yollarda müəyyən məhdudiyyətlər tətbiq olunur. Bəzi yollarda müvafiq mühafizə qurğuları quraşdırılırsa yolun hərəkət hissəsi daralır, sürət aşağı düşür, intensivlik azalır.

Ekspert Ərşad Hüseynov da son günlər müşahidə olunan tıxacların əsas səbəbi kimi “Formula-1” yarışlarına hazırlığı göstərib.  Bakıda “Formula-1” yarışlarının keçirilməsi ilə bağlı şəhərin mərkəzi küçələrinin bəzisində nəqliyyatın hərəkəti məhdudlaşdırılır. Bəzi küçələrdə artıq maneələr qoyulub, hərəkət istiqamətini dəyişiblər. Əsas səbəb odur. Xüsusi bir başqa səbəbi yoxdur. Ümumi olaraq da onu deyə bilərəm ki, səbəb həm də metronun işləməməsi, marşrutların lazımi dərəcə də fəaliyyət göstərməməsinə görə fərdi avtomobillərdən və taksilərdən istifadə hallarının çox olmasıdır”.

“Moderator.az”  saytında “Rusiya hərbi kontingenti Qarabağda ola-ola Azərbaycan buradakı yurisdiksiyasını bərpa edə biləcəkmi?” sərlövhəli məqalədə söhbət ondan gedir ki, Rusiya sülhməramlıları Yuxarı Qarabağ ərazisindədir, bu halda Azərbaycan müharibə yolu ilə həmin torpaqları geri ala bilərmi?

ABŞ-da yaşayan tanınmış politoloq Ərəstun Oruclu da hərbi yolu Azərbaycan üçün riskli adlandırır.  “Belə ki, Rusiya 2008-ci ildə Gürcüstana qarşı tətbiq etdiyi Cənubi Osetiya ssenarisinə əl ata bilər. Yəni, “sülhməramlıları” qorumaq adı altında bölgəyə əlavə hərbi güc yeritmək olar ki, bu da heç bir halda Azərbaycanın maraqlarına cavab vermir”.

Onun fikrincə, nəzəri baxımdan bəlkə də mümkündür, amma indiki halda əlverişli olduğunu söyləmək olmaz. Digər yol isə diplomatik-siyasi yoldur.