SOCAR və TOTAL «Abşeron» yatağının işlənməsi haqda çərçivə sazişi imzalayıblar

  SOCAR (Azərbaycan Dövlət Neft Şirkəti) və Fransanın TOTAL şirkəti noyabrın 21-də “Abşeron” yatağının işlənməsi prinsipləri haqda çərçivə sazişi imzalayıblar.

“Bakı görüşünün yekunları üzrə Abşeron” yatağının işlənməsi prinsipləri haqda çərçivə sazişini SOCAR rəhbəri Rövnəq Abdullayev və TOTAL-ın baş icraçı direktoru Patrik Puyanne imzalayıb”, - SOCAR-ın məlumatında deyilir.

Puyannenin sözlərinə görə, TOTAL Azərbaycanla əməkdaşlığın davam etdirilməsində  maraqlıdır.

O həmçinin qeyd edib ki, şirkət Azərbaycanda neft-qaz əməliyyatlarına investisya qoyuluşunu davam etdirəcək.

Puyanne TOTAL-ın Azərbaycanda digər neft-qaz layihələrində, o cümlədən “Ümid” və “Babək” perspektiv yataqlarında iştirak imkanlarından maksumum istifadə etməyə hazır olduğunu bildirib.

SOCAR rəhbəri bildirib ki, “Abşeron” yatağında ilk istismar quyusunun qazılmasına 2017-ci ilin ortalarında başlanılacaq. Həmin yataqda ilk qazın hasilatına isə 2019-cu ilin III-IV   rübündə başlanması planlaşdırılır.

“Abşeron” dəniz blokunun kəşfiyyatı, işlənməsi və hasilat pay bölgüsü haqda saziş 2009-cu il fevralın 27-də imzalanıb. Hazırda layihənin iştirakçıları SOCAR (40%), TOTAL (40% - operator) və GDF Suez-dir (20%).

Müqavilə 30 il müddətinə bağlanıb.

İlk kəşfiyyat quyusunun qazılmasının yekunları ilə bağlı TOTAL 2011-ci ilin sentyabrında “Abşeron” yatağında 350 mlrd. kubmetr qaz və 45 mln. ton kondensat həcmində dəyərləndirilən qaz ehtiyatlarının olduğunu təsdiqləyib. “Abşeron” bloku Bakıdan 100 km. aralıda, 500 metr dərinlikdə yerləşir.–0--