“Dörd bankda müvəqqəti inzibatçılığın tətbiqi devalvasiyaya hazırlıq demək deyil”, - Əkrəm Həsənov

Bakı/27.04.20/Turan: Mərkəzi Bankın Azərbaycanın dörd bankında müvəqqəti inzibatçılıq tətbiq etməsi gözlənilən devalvasiya ilə bağlı söhbətlərin yaranmasına səbəb oldu.

Mərkəzi Bankın qərarı "Atabank", "NBC", "Əmrahbank", "AGBank"-a aiddir.

Sosial şəbəkələrdə devalvasiya zamanı bəzi bankların saxtakarlığının qarşısını almaq üçün belə bir qərarın verildiyi barədə ehtimallar səsləndi.

Mərkəzi Bankın qərarını “Turan”a şərh edən bank eksperti Əkrəm Həsənov bildirib ki, bu heç cür devalvasiya planları ilə əlaqəli ola bilməz.

“Əmin deyiləm ki, devalvasiya haqqında qərar yalnız bu dörd bankda büdrəyə bilər. Təkcə bunlar saxtakarlıq edə bilər? Mərkəzi Bankın qərarı bu bankların uzun müddətdir üzləşdiyi problemlərlə bağlıdır”, - deyə o hesab edir.

Ekspert xatırladıb ki, “Atabank” və “NBC” çoxdandır bank hesab olunmur, çünki onların həlli mümkün olmayan problemləri var. Onun fikrincə, digər iki bankda – “Amrahbank” və “AGBank”da situasiya mürəkkəbdir, lakin kritik deyil.

“Bu bankarlın problemləri kreditlərin qaytarılması ilə bağlıdır. Uzun müddət maliyyə tənzimlənməsi sahəsində vəziyyət birmənalı deyildi. Maliyyə Bazarlarına Nəzarət Palatası qətiyyətli addımlar atmaq istəmirdi. Palata ləğv ediləndən və səlahiyyətləri Mərkəzi Banka veriləndə sonra Elman Rüstəmov bu vəzifədə qalıb qalmayacağını bilmirdi. Ona görə də bu problemlərin həlli ilə məşğul olmurdu. Lakin onu növbəti dəfə Mərkəzi Bankın rəhbəri təyin edəndən sonra addımlar atmaq məcburiyyətində qaldı”, - Əkrəm Həsənov bildirdi.

Onun sözlərinə görə, müvəqqəti inzibatçılıq tətbiq etməklə Mərkəzi Bank bankların saxlanılması imkanlarını yoxlayacaq.

“Hər şey bu bankların verdiyi kreditlərin keyfiyyətindən asılı olacaq. Kreditlərin yoxlanılması qərar qəbul etməyə imkan verəcək. Problemli kreditlərin zəmanəti, yəni girov və buna bənzər nəsə varsa, aydındır ki, onlar tam ümidsiz deyil və nə vaxtsa məhkəmə yolu ilə qaytarmaq olar. Bu halda Mərkəzi Bank bankı bağlamayacaq. Əgər Mərkəzi Bank hansısa bankın kreditlərini tam ümidsiz hesab etsə, onu bağlamaqdan başqa yol qalmır”, - deyə Əkrəm Həsənov bildirib.

Bu zaman o qeyd edib ki, adətən Azərbaycanda bu işlər şəffaf aparılmır.

“Yaxşı olardı ki, Mərkəzi Bank bu bankları şəffaf yoxlasın və ictimaiyyətə dəqiq məlumat versin. Bu halda hamı bu bankarla bağlı qərarın nə qədər doğru olduğunu qiymətləndirə bilər”, - o fikrini tamamladı.–71В-