ATƏT-in Minsk qrupunun həmsədrlərinin mətbuat üçün bəyanatı

Bakı/19.01.18/Turan: ATƏT-in Minsk Qrupunun həmsədrləri (İqor Popov - Rusiya, Stefan Viskonti - Fransa və Endryu Şofer - ABŞ) və ATƏT sədrinin şəxsi nümayəndəsi Anjey Kasprşik yanvarın 18-də Krakovda Ermənistan xarici işlər naziri Edvard Nalbandyan və Azərbaycan xarici işlər naziri Elmar Məmmədyarovla görüşdən sonra bəyanat yayıblar. Sənəddə deyilir:

Nazirlər və həmsədrlər Dağlıq Qarabağ münaqişəsi üzrə əvvəlki sammitlərində əldə edilmiş sazişlərin həyata keçirilməsinə yardım məqsədilə növbəti addımları müzakirə ediblər.

Xarici işlər nazirləri prinsip etibarilə həmsədrlərin ATƏT-in hazırki sədrinin Şəxsi Nümayəndəsi ştatının genişləndirilməsi üzrə yenidən baxılmış konseptual sənədi ilə razılaşıblarc.

Məşvərət zamanı tərəflər və həmsədrlər hazırda masa üzərində olan təkliflərdə yer alan əsas həssas məsələlər üzrə fikir mübadiləsi aparıblar.

Həmsədrlər həmçinin danışıqlar prosesinə mühüm töhfə verəcək etimadın möhkəmləndirilməsi üzrə tədbirlər görməyə çağırıblar. Nazirlər və həmsədrlər təmas xəttində nisbi sakitlik olduğunu qeyd ediblər və həmsədrlər tərəfləri bu müsbət təmayülü möhkəmləndirməyə çağırıblar.

Həmsədrlər nazirlərə münaqişənin əhatə etdiyi ərazilərdə vəziyyətin qiymətləndirilməsi üzrə 2010-cu ildəki missiyalarını davam etdirməkdə maraqlı olduqlarını bildiriblər.

Həmsədrlər fevralın əvvəllərində regiona səfər etməyi planlaşdırırlar. -02D-