Azərbaycan səfirliyinə hücum etməkdə təqsirli bilinən şəxs hələ ölüm hökmünə məhkum edilməyib

Bakı/03.10.23/Turan: Azərbaycan Baş Prokurorluğu yanvarın 27-də Azərbaycanın Tehrandakı səfirliyinə silahlı hücum törədən şəxs barəsində ölüm hökmü verilməsi haqqında məlumatları təkzib edib.

Yanvarın 27-də İran vətəndaşı Yasin Hüseynzadə Azərbaycanın Tehrandakı səfirliyinə silahlı hücum edib. Avtomatla səfirlik binasına daxil olan Hüseynzadə səfirliyin bir mühafizə əməkdaşını öldürüb, iki nəfəri yaralayıb. Yaralılardan biri onu binadan çıxarmağa müvəffəq olub. Bakıda hadisə terror aktı kimi qiymətləndirilib və səfirlik təxliyyə olunub.

Oktyabrın 2-də bir çox KİV-lər Azərbaycan dövlət televiziyasına istinadla İran Ali Məhkəməsinin Hüseynzadə barəsində ölüm hökmü çıxardığını bildiriblər. 

Lakin, Azərbaycan Baş Prokurorluğunun məlumatına görə, İran İslam Respublikasının qanunvericiliyinə uyğun olaraq cinayət işinin istintaqı tamamlanaraq baxılması üçün məhkəməyə göndərilib və prokuror tərəfindən təqsirləndirilən şəxsin ən ağır cəzaya məhkum edilməsi tələb olunub, lakin hazırda məhkəmə tərəfindən yekun qərar qəbul edilməyib. 

"Ümidvarıq ki, iş üzrə yaxın vaxtlarda məhkəmə tərəfindən ədalətli hökm çıxarılaraq layiqli cəzanın verilməsi təmin ediləcəkdir", deyə Prokurorluq qeyd edir. 06B