Beynəlxalq Münasibətlərin Təhlili Mərkəzinin rəhbəri təşkilatın prioritetləri barədə

Bakı/02.08.19/Turan: Dünya birliyinin Azərbaycan və Qarabağ münaqişəsi haqda obyektiv məlumatlandırılması Beynəlxalq Münasibətlərin Təhlili Mərkəzinin fəaliyyətinin əsas istiqamətlərindən biri olacaq. Bu barədə Mərkəzin İdarə Heyətinin sədri Fərid Şəfiyev bugünkü mətbuat konfransında bildirib.

Mərkəz Azərbaycan prezidentinin 6 fevral 2019-cu il tarixli fərmanına uyğun olaraq publik hüquqi şəxs statusunda yaradılıb. Mərkəz dünyada və regionda vəziyyətin, Ermənistan-Azərbaycan münaqişəsinin müxtəlif aspektlərinin təhlili ilə məşğul olacaq, beynəlxalq münasibətlər və təhlükəsizlik məsələləri ilə bağlı fundamental araşdırmalar aparacaq. Mərkəzin işinin əsas istiqamətlərindən biri Azərbaycanın müxtəlif məsələlər, o cümlədən Dağlıq Qarabağ münaqişəsi üzrə mövqeyinin beynəlxalq ictimai, siyasi və akademik dairələrə çatdırılması olacaq.

Mərkəz beynəlxalq beyin mərkəzləri ilə sıx əməkdaşlıq etmək niyyətindədir. Artıq onların bəzisi ilə memorandumlar imzalayıb. Bundan əlavə, Azərbaycan haqda dərin araşdırmaların aparılması üçün əcnəbi alimlərə təqaüdlərin verilməsi nəzərdə tutulur.

F.Şəfiyev beynəlxalq elmi mərkəzlərdə Azərbaycan haqda obyektiv araşdırmaların çatışmazlığını qeyd edib. Çox vaxt Azərbaycan haqda kitabların müəllifləri ermənilər, ya da ermənipərəst araşdırmaçılar olur. Xarici mütəxəssislərin cəlb edilməsi bu boşluğu doldurmaq və beynəlxalq auditoriyaya dərin obyektiv araşdırmalar təqdim etmək məqsədi daşıyır.

Həmçinin Mərkəz yerli araşdırmaçılar üçün seminarlar və treninqlər keçirmək niyyətindədir. F.Şəfiyev bunu onunla izah edib ki, bəzən beynəlxalq kitabxana mərkəzləri azərbaycanlı müəlliflərin Qarabağ münaqişəsinə dair kitablarını qəbul etməkdən imtina edirlər ki, bu kitablar çox emosionaldır və elmi standartlara uyğun deyil. Odur ki, Mərkəz treninqlərdə ən yaxşı əsərlərin tərtib edilməsi üzrə beynəlxalq standartlar barədə araşdırmaçıları məlumatlandırmağı planlaşdırır.

Mərkəz digər yerli beyin mərkəzləri, akademik institutlar, ali məktəblərin beynəlxalq münasibətlər kafedraları, həmçinin QHT-lər və bu sahədə səriştəli müstəqil ekspertlər ilə əməkdaşlığa hazırdır.

Mərkəzin ştatı 10 elmi əməkdaşdan ibarətdir. Onlar region ölkələri və aparıcı beynəlxalq mərkəzlər üzrə mütəxəssislərdir. Odur ki, Mərkəz müxtəlif formalarda və digər mütəxəssislər ilə əməkdaşlıqda maraqlıdır.

Erməni dilini bilən mütəxəssisə, eyni zamanda KİV-də yazıların ilk mənbənin dilindən öyrənilməsinə ehtiyac var.

F.Şəfiyev Mərkəzi ekspert cəmiyyəti ilə müzakirələrə açıq platforma adlandırıb. Mərkəz alternativ rəyləri və baxışları dinləməyə hazırdır. Mərkəzin ekspertləri Azərbaycan üçün aktual olan beynəlxalq və regional məsələlər üzrə operativ şərhləri KİV-ə təqdim etməyə hazırdır. F.Şəfiyev etiraf edib ki, bəzən səriştəsiz şərhlər olmadığından mediada məlumatsız "politoloq"ların fikirləri yayılır.

Mərkəzin işi barədə məlumat vaxtaşırı qurumun saytında, həmçinin Facebook və Twitter sosial şəbəkələrdə yerləşdiriləcək. Hazırda sayt yaradılır. Mərkəz həmçinin aylıq bülleten buraxacaq.

Mətbuat konfransında Mərkəzin loqosu təqdim edilib. Loqo Azərbaycan bayrağının rənglərində üç dalğalı xətt və üzərində ingilis dilində AİR center yazılmış təsvirdən ibarətdir.

F.Şəfiyev Mərkəzin gələcək planlarından da danışıb. Belə ki, sentyabrda Azərbaycanın beynəlxalq enerji siyasətinə həsr olunmuş "dəyirmi masa" keçiriləcək. Oktyabrda türkdilli ölkələrin araşdırma mərkəzlərinin iştirakı ilə tədbir olacaq.

Qeyd edək ki, Beynəlxalq Münasibətlərin Təhlili Mərkəzi ləğv edilmiş Strateji Araşdırmalar Mərkəzinin əvvəllər yerləşdiyi binada yerləşir.06C--