Mövlud Çavuşoğlu Türk Şurasının dəstəyini qazanıb

Bakı/14.10.19/Turan: Türkiyənin xarici işlər naziri Mövlud Çavuşoğlu oktyabrın 14-də Azərbaycanın paytaxtında keçirilən türkdilli ölkələrin Əməkdaşlıq Şurasının (Türk Şurası) xarici işlər nazirlərinin iclasındakı çıxışında görüşün Türk Şurası üçün mühüm dönəmdə keçirildiyini söyləyib. Bu barədə "Anadolu" agentliyi məlumat yayıb.

"Əməkdaşlığımızın izləri Avropaya çatıb. Budapeştdəki ofisimiz təkcə müşahidəçi- üzv Macarıstan və Macarıstan xalqı ilə deyil, həm də digər Avropa ölkələri ilə əməkdaşlığımızı möhkəmləndirəcək", - o deyib.

M.Çavuşoğlunun sözlərinə görə, Türk Şurası mühüm regional bir təşkilata çevrilib. Mövcud nəticələrin əhəmiyyətini vurğulayan nazir Türk Ticarət-Sənaye Palatasının yaradılmasının vacibliyini vurğulayıb.

M.Çavuşoğlu bildirib ki, Türk Ticarət-Sənaye Palatası ticarət və investisiyaların artırılması üçün güclü mexanizm təqdim edəcək ki, Türk biznes-forumu daha da koordinasiya edilmiş fəaliyyətlər üçün iş dünyasını birləşdirəcək.

"Dünya bazarında rəqabət qabiliyyətli qala bilmək üçün istehsal etdiyimiz məhsulları mümkün qədər tez və ucuz etmək niyyətindəyik. Bu, bizi türk dünyası üçün vacib olan etibarlı əlaqə məsələsinə aparır. Mükəmməl əlaqə lazımdır", - o deyib.

Türk Şurası ölkələri sülh və sabitlik zonası yaradıblar, ancaq bunlar təhlükələrə və təhdidlərə qarşı toxunulmaz deyil. M.Çavuşoğlu qeyd edib ki, türk ölkələri xarici siyasət və təhlükəsizlik məsələlərində, o cümlədən beynəlxalq təşkilatlarla əməkdaşlıq etməlidirlər.

"Biz iqlim dəyişikliyi, rasizm, separatizm, mütəmadi mühacirət və terrorizm kimi regional və qlobal problemlərə qarşı ümumi cəbhə təqdim etməliyik. Şəxsən mən bütün qardaşlarımı FETÖ (Gülənin qadağan edilmiş təşkilatı) ilə mübarizədə lazım olan hər şeyi etməyə və bu terror təşkilatını bizim ölkələrdə məhv etməyə çağırıram.

Bir müşahidəçi olaraq, qardaş ölkələrimizə, o cümlədən Macarıstana, FETÖ-yə qarşı həyata keçirdikləri tədbirlərə görə təşəkkür edirəm", - türkiyəli nazir deyib.

M.Çavuşoğlu bildirib ki, informasiya, telekommunikasiya, elektron hökumət və kibertəhlükəsizlik sıx əməkdaşlıq tələb edən mühüm məsələlər sırasına daxildir və ölkələr öz səylərini artırmalıdır.

Türk dünyasında iki mühüm problemin olduğunu xatırladan M.Çavuşoğlu deyib: "Qardaş Azərbaycanın beşdə bir hissəsi erməni işğalı altındadır. Prezident Rəcəb Tayyib Ərdoğanın tez-tez vurğuladığı kimi, bu, yolverilməzdir".

M.Çavuşoğlu bildirib ki, Türkiyə Azərbaycanın məsuliyyəti çərçivəsində Qarabağ münaqişəsinin sülh yolu ilə həllini dəstəkləyəcək.

Kiprin ikinci mühüm məsələ olduğunu vurğulayan M.Çavuşoğlu siyasi həll tapılana qədər Kipr türklərinin qanuni hüquqlarının qorunmasının zəruriliyinə diqqəti çəkib.

O qeyd edib ki, Türkiyə Şurasının üzvləri ədalətsiz təcridi aradan qaldırmaq və ədalətli həll tapmaq üçün Kipr türkləri ilə birləşməyə ümud edirlər.

"Əməliyyat məhdud, təmkinli və əlverişli olacaq", - o deyib. Türkiyə təhlükəsizliklə bağlı təhdidlər ilə qarşılaşıb.

"Təəssüf ki, bizim bəzi müttəfiqlərimiz Türkiyənin milli təhlükəsizliyinə zidd olaraq və PKK PYD / YPG-dəki Suriya filiallarına laqeydlikdən onları dəstəkləməyə davam edirlər. Buna görə də biz müstəqil hərəkətlər etməyə məcbur olduq, çünki bu müharibə başa çatmalıdır. Biz təhlükəsiz zona yaradılması üçün ABŞ ilə işləməyə çalışdıq, amma təəssüf ki, qeyd etdiyim səbəblərə görə bu, nəticə vermədi", - o bildirib.

"Bizim "Barış pınarı" əməliyyatının hədəfləri bəllidir: "Milli təhlükəsizlik üzərində terrorizm tendensiyasını aradan qaldırmaq, Suriyanın ərazi bütövlüyünü qorumaq, yerli əhalini PYD / YGP-dən xilas etmək və suriyalı qaçqınların öz evlərinə təhlükəsiz və könüllü şəkildə qayıtması üçün zəmin yaratmaq. Bu, hamımız üçün, xüsusən də Avropa üçün, həmçinin qeyri-leqal miqrant axını ilə qarşılaşan tranzit ölkə kimi Macarıstan üçün vacibdir. Bu əməliyyat məhdudlaşdırılmış, təmkinli və əlverişli olacaq, yalnız terror ünsürlərinə yönəldiləcək və mülki əhaliyə maksimum diqqət yetiriləcək", -M.Çavuşoğlu deyib.

Onun sözlərinə görə, Suriyanın birliyinin və ərazi bütövlüyünün qorunması Türkiyənin əsas prioritetidir.

"Suriya xalqının qanuni nümayəndələri, azlıqların nümayəndələri, o cümlədən Milli Koalisiya, müvəqqəti hökumət, qəbilə başçıları və xristianlar bizim əməliyyatı dəstəklədiklərini bildiriblər. Dəstək mesajlarına görə Azərbaycana və Macarıstana xüsusilə təşəkkür edirəm", - o vurğulayıb.

M.Çavuşoğlu bildirib ki, Suriyada döyüşən keçmiş əcnəbi terrorçuların öz ölkələrinə qaytarılması ən düzgün yanaşma olacaq.

"Təkcə əcnəbi terrorçuların yox, həm də onların ailələrinin öz ölkələrinə qayıtması vacibdir. Qadınların və uşaqların reabilitasiyaya ehtiyacı var. Əməliyyat həm də ona yönəldilib ki, köçkün suriyalılar təhlükəsiz və könüllü şəkildə evlərinə qayıda bilsinlər. Hər kəs təhlükəsiz və könüllü olaraq evinə qayıtmaq imkanı əldə etməlidir", - M.Çavuşoğlu deyib.

Azərbaycanın xarici işlər naziri Elmar Məmmədyarovun təşkil etdiyi görüşdə Qazaxıstanın xarici işlər naziri Muxtar Tleuberdi, Qırğızıstanın xarici işlər naziri Çingiz Aydarbekov, Özbəkistanın xarici işlər naziri Abdulaziz Kamilov, Macarıstanın xarici işlər və xarici ticarət naziri Peter Şiyarto və Türk Şurasının baş katibi Bağdad Amreyev iştirak ediblər. -0-