Azərbaycan Kinematoqrafçılar İttifaqına və onun sədri Rüstəm İbrahimbəyova qarşı təzyiqlərlə bağlı bəyanat

 

Biz vətəndaş cəmiyyəti nümayəndələri olaraq son vaxtlar tanınmış kinorejissor və ssenariçi Rüstəm İbrahimbəyovun və onun sədri olduğu Azərbaycan Kinematoqrafçılar İttifaqının təqib olunmasını kəskin şəkildə qınayırıq və bu basqıları birləşmə və ifadə azadlığının məhdudlaşdırılması kimi qiymətləndiririk.

                Belə ki, Rüstəm İbrahimbəyov artıq bir neçə ildir ki, Azərbaycanın ən tanınmış ziyalılarından biri kimi hazırkı hakimiyyətin yürütdüyü siyasəti və məmurların fəaliyyətini tənqid edir, son dövrlərdə bu tənqidlər bir az da kəskinləşmiş və artmışdır. Məhz İbrahimbəyov tərəfindən tənqidlərin artması və xwsusuilə də seçkilərlə bağlı açıqlamaların verilməsi nəticəsində ona və onun rəhbərlik etdiyi vətəndaş cəmiyyəti təşkilatına basqılar da genişlənmişdir.

Kinematoqrafçılar İttifaqında 2012-ci il noyabrın 20-dən təkrar şəkildə aparılan yoxlamalardan sonra dekabrın 27-də Vergilər Nazirliyinin Vergi Cinayətlərinin İbtidai Araşdırılması Departamentində Cinayət Məcəlləsinin 213.1-ci maddəsi[1] üzrə cinayət işi başlanılıb. Azərbaycan Kinematoqrafçılar İttifaqının üzvü, 2009-cu ildə “Şərq-Qərb” Bakı beynəlxalq kinofestivalının keçirilməsi üzrə səlahiyyətli nümayəndə olmuş Lalə Əfəndiyevaya Cinayət Məcəlləsinin 179.3.2-ci maddəs] ilə ittiham elan edilib. Yanvarın 18-də Vergi Cinayətlərinin İbtidai Araşdırılması Departamentin 10 əməkdaşı Kinematoqrafçılar İttifaqında axtarış aparıb və surətləri Vergilər Nazirliyinə əvvəllər təqdm edilmiş sənədləri yenidən yığıb aparıblar. Yanvarın 23-də İttifaq heç bir səbəb göstərilmədən, sənəd təqdim olunmadan və qabaqcadan xəbərdar edilmədən Bakı Şəhər İcra Hakimiyyətinin nümayəndələri tərəfindən Hökümət Evində yerləşən ofisindən çıxarılıb. Rüstəm İbrahimbəyov 2012-ci il dekabrın 30-da Moskvadan Bakıya gələrkən hava limanının sərhəd məntəqəsində onun diplomatik pasportunu və ümumvətəndaş pasportunu alıblar və nəyinsə araşdırıldığını deyiblər. İki saaatdan artıq müddət keçdikdən sonra İbrahimbəyov sərhəddən buraxılarkən ona bildirilib ki, o Ali Baş Komandanı saymadığı, hörmət etmədiyi üçün onlar da İbrahimbəyovu saymırlar. 2013-cü il yanvarın 21-də İbrahimbəyov Bakıdan gedərkən yenə də Bakı aeroportunun sərhəd məntəqəsində maneə ilə üzləşib. Keçiddə ona bildiriblər ki, texniki problem var və o gözləməlidir, yalnız uçuşa yarım saat qalmış o sərhəddən buraxılıb. Bundan əlavə, Azərbaycan telekanallarının əksəriyyətində və hakimiyyətin nəzarətində olan qəzetlərdə son həftələr ərzində Rüstəm İbrahimbəyov barədə qarayaxma kampaniyası başlanılıb və o heç bir fakt gətirilmədən müxtəlif mənimsəmələrdə ittiham edilir, ona məxsus olduğu iddia edilən mənzillər, opfislər və şirkətlərin adları çəkilir. Kinematoqrafçılar İttifaqının üzvlərinə qarşı təzyiq və hədələrin edilməsi barədə məlumatlar var.

Biz bəyan edirik ki, Kinematoqrafçılar İttifaqına açılan cinayət işi və İttifaqın ofisdən bu qaydada çıxarılması, o cümlədən İbrahimbəyovun özünə qarşı yönəlmiş addımlar  qanunsuzdur və birbaşa olaraq Rüstəm İbrahimbəyovun tənqidi fikirləri ilə bağlıdır. Hesab edirik ki, Azərbaycan hakimiyyəti onu tənqid edən səsləri boğmamalı, əksinə tənqidlərdən nəticə çıxarmalıdır.

Azərbaycan hakimiyyətinin Kinematoqrafçılar İttifaqına və onun sədrinə bu cür münasibəti əslində hakimiyyətin dürüst və müstəqil vətəndaş cəmiyyətinin formalaşmasında maraqlı olmadığını, tənqidi səsləri hər bir vasitə ilə susdurmağa hazır olduğunu və həm yerli, həm də beynəlxalq qanunvericilik normalarına əməl etmədiyini nümayiş etdirir. Bu təqiblər vasitəsilə hakimiyyət Azərbaycan vətəndaşlarının, konkret olaraq İttifaqda birləşən şəxslərin birləşmək azadlığını və İbrahimbəyovun öz fikirlərini maneəsiz şəkildə ifadə etmək azadlığını məhdudlaşdırmaq məqsədi güdür ki, demokratik cəmiyyətlərdə bu yolverilməzdir.

Biz Azərbaycan hakimiyyətindən Kinematoqrafçılar İttifaqına və onun sədri Rüstəm İbrahimbəyova qarşı təzyiqlərə son qoymağı, ölkə Konstitusiyasında və Azərbaycanın qoşulduğu beynəlxalq-hüquqi sənədlərdə təsbit edilmiş birləşmək və ifadə azadlıqlarına hörmət etməyi tələb edirik. Biz eyni zamanda demokratik beynəlxalq ictimaiyyəti bu məsələni diqqət mərkəzində saxlamağa və mümkün olan hər bir qanuni vasitələrlə Kinematoqrafçılar İttifaqını və onun sədrini müdafiə etməyə çağırırıq.           

Rəşid Hacılı, Media Hüquqları İnstitutu

Rəsul Cəfərov, İnsan Hüquqları Klubu

Leyla Əliyeva, Milli və Beynəlxalq Araşdırmalar Mərkəzi

Anar Məmmədli, Seçkilərin Monitorinqi və Demokratiyanın Tədrisi Mərkəzi

İlqar İbrahimoğlu, Dini Etiqad və Vicdan Azadlığı Müdafiə Mərkəzi

Mirvari Qəhrəmanlı, Neftçilərin Hüquqlarının Müdafiəsi Komitəsi

İradə Cavadova, İnsan Hüquqları üzrə Maarifləndirmə İctimai Birliyi

Ziya Quliyev, Hüquqi Təşəbbüslər Mərkəzi

İntiqam Əliyev, Hüquq Maarifçiliyi Cəmiyyəti

Leyla Yunus, Sülh və Demokratiya İnstitutu

Firudin Allahverdi, bəstəkar

Elmir Mirzəyev, bəstəkar

Rəhman Bədəlov, kulturoloq

Zəfər Quliyev, politoloq

Camal Əli, musiqiçi

Gündüz Ağayev, karikaturaçı

Tora Ağabəyova, rəssam

Tural Hacı, foto/video qrafikaçı

Aynur Zərrintac, bloqçu

İlkin Qəmbər, minval.az portalının baş redaktoru

 

 


[1] Xeyli miqdarda vergiləri və ya məcburi dövlət sosial sığorta haqlarını ödəməkdən yayınma - üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə min manatdan iki min manatadək miqdarda cərimə və ya iki ilədək müddətə islah işləri və ya üç ilədək müddətə azadlıqdan məhrum etmə ilə cəzalandırılır.

[2] Mənimsəmə və ya israf etmə, yəni təqsirkara etibar edilmiş özgə əmlakını talama külli miqdarda törədildikdə

 

Rəy yaz

Söz istəyirəm

Bizi sosial şəbəkələrdə izləyin

Xəbər lenti