ƏCƏB GÜLMƏLISƏN?!

Mən deyirdim də dünyanın və şiənin xilası İranın prezidentindədir, yəni, Əhmədnecatdadır! Amma inanmırdız. İndi inanacaqsınız, özü də rus demişkən, kak milinki. Hünəriniz var inanmayın, İran ayətüllahları sizə Allaha qarşı çıxmaqda fətvası verər, onda ağlınız başınıza gələr. Nə bilmisiniz!
Görmədiz İranda ötən yay nə var, nə var seçkidə saxtakarlıq etdiyinə görə, özü də elə bir ciddi saxtakarlıq da deyildi, 60-70% ola-olmaya, camaat saxtakarlığın əleyhinə çıxanda dedilər ki, Əhmədnecatın əleyhinə çıxmaq Allahın əleyhinə çıxmaqdır.
İndi isə Əhmədnecat 12-ci imamın zühurunun əleyhinə çıxan qüvvələri tapıb və tapan kimi də car çəkib. Sən demə, ağanın zühurunu əngəlləyən ABŞ imiş!!!! Tapıb da, adam "səbəbi" tapıb. Özü də elə tapıb ki, adam nəinki "şübhə" eləmir, hələ üstəlik "matı-mutu" da quruyur. Deyirəm işə bax e, necə "dəqiq, dürüst, yəqin". Deyirəm öğullar var e, xəbərimiz yox. Adam səbəbi biləndə nə edəcəyini bilir axı.
Amma, indi məni fikir götürüb, deyin niyə? Axı, İran həmişə deyirdi ki,
ay nə bilim ABŞ zəifdir, ay nə bilim, bizə heç nə edə bilməz. İndi nə olacaq? Bundan sonra nə təhər deyəcək ki, ABŞ zəifdir. Adama deməzlər ki, özünü dolamısan yoxsa cammatı?! Adama deməzlər ki, ya evini Allah yıxsın, bu necə zəifdir ki, imamın zühuruna mane olur?! Adama deməzlər ki, ya imamın zühuruna mane olan İrana, urana, filana nə baxır. Sizi "hopp" eləyib udar.
Amma, Əhmədnecata təşəkkür. Biz də fikirləşridik ki, yəqin ağanın zühurunu müsəlman ölkələrindəki korrupsiya, rüşvət, yalan, cəhalət, oğurluq, quldurluq, hakimiyyətin xalqı əzməsi, mollaların islam adına nağılları ləngidir. Deməli, bizlik bir şey yoxdur. Onda qoy müsəlman ölkələri korrupsiya, cəhalət, oğurluq, quldurluq, xalqı əzmək və s. kimi gözəl-gözəl işləri davam etdirsin, daha da çiçəkləndirsin. Onsuz da ağanın zühuru buna görə ləngimir. İşinizdə olun.
Amma Əhmədnecatdan soruşmaq istəyirəm, bəs genə sən bilərsən, Amerikanın məqsədi nədir ki, bu zühurun qabağını alır, onun marağı nədir? Bax, buna cavab versə, aləm olar. Amma talış demişkən, ay verdi ya...
Ancaq bir məsələ mənə hələ də qaranlıq qalır ki, bu cahanşümul kəşfi Əhmədnecat təkbaşına tapıb, yoxsa "ordan-burdan" eşidib. Əgər özü tapıbsa, Səudiyyə Ərəbistanının "Kral Feysəl" mükafatını Ərdoğan kimi ona da vermək olar. Düzdür, Səudiyyə bu mükafatı ağız-dodaq büzərək Əhmədnecata verməyə o qədər də maraqlı olmayacaq, amma ağsaqqal-qarasaqqal ağız açsa mümkün olar.
Yox, ordan-burdan eşidibsə, onda dəqiqələşdirmək lazımdır ki, ağanın zühurunu ləngitmək xəbəri Mərkəzi Kəşfiyyat İdarəsindən çıxıb ya ya başqa yerdən!? Bəlkə elə, Əhmədnecata dezinformasiya ötürməklə ABŞ "görürsüz də mənim gücümü" demək istəyib. Bu evi yıxılan da bu xəbəri doğru bilib bizə deyir, elə bilir ki, yaxşı iş görür. Daha demir ki, müsəlmanları qorxudur ki, ağanı ləngidən, bizi gör nə hala salar.
Vallah belə-belə işlər.
Bu yazı da belə.
Adam ki, boş qaldı elə Əhmədnecat kimi ağzına nə gəldi danışır.

Tofiq TÜRKEL