HACIBALA ABUTALIBOVUN KÖNÜLLÜ «MƏHƏRRƏMLİYİ»

Azərbaycan dünyəvi dövlətdir və bu dövlətin qanunlarına görə din dövlətdən ayrıdır, başqa sözlə, dini mərasimlərin dünyəvi həyata təsir etməsi mümkün deyil. Amma...
NƏ OLDU?!
Bu il Bakı meriyası şıdırğı şəkildə Yeni ili qarşılamağa hazırlaşırdı, paytaxtın ayrı-ayrı yerlərində yolkalar quraşdırılır, işıqlar qoşulur, buz meydançası hazırlanır, konsert proqramları tutulur, atəşfəşanlıq hazırlanırdı. Birdən məlum oldu ki, Qafqaz Müsəlmanları İdarəsi fətva verib ki, məhərrəm ayı dekabrın 29-dan başlanır. Bu yerdə Bakı meriyası konkret kimdən gəldiyi bilinməyən informasiya yaydı ki, məhərrəmlik ayı dekabrın 29-dan başladığı üçün dekabrın 31-də nəzərdə tutulan bayram şənlikləri, konsert və atəşfəşanlıq ləğv edilir.
HACIBALA ABUTALIBOVUN ŞİƏLİYİ VƏ DİNDARLIĞI
Sən demə, Bakı meri şiə və həm də güclü dindar imiş, yoxsa dünyəvi dövlətin paytaxt merinin dini mərasimə görə bayram şənliyini ləğv etməsini anlamaq mümkün deyil. Qafqaz Müsəlmanları İdarəsi Azərbaycanın dünəvi dövlət olduğunu və buna görə də dini mərasimin yer aldığı məhərrəm ayında hər hansı dövlət tədbirini ləğv edib-etməməyin dövlətin işi olduğunu və idarənin buna təsir etmək səlahiyyəti olmadığnıı bəyan edib. Yenə də fikirləşirik, axı məhərrəmlik ayı keçən il də yeni ilə təsadüf etmişdi, amma şənklilər ləğv olunmamışdı. Bəs nə oldu?!
ƏSL SƏBƏB VƏ MÜSİBƏT HARADADIR ?!
Rəhmətlik Cəlil Məmmədquluzadə yazırdı ki, "dedilər İrandan hürriyyət gəlir, mən də düşündüm ki, İrandan aftafa gələr, təsbeh gələr, amma hürriyyət gəlməz". İndi mən də düşünürəm ki, merdən dindar olmaz, amma bu şənlikləri niyə ləğv etsin axı?!
Ağlıma gələn nə oldu? Ağlıma gələn bu oldu ki, ya səbəb maliyyənin olmamasındadır, ya da ayrılan maliyyənin mənimsənilməsi üçün istifadə edilən üsul belədir.
PUL ÇATMAYANDA DİN İŞƏ DÜŞÜR
Bəli, buz meydançasının yaradılması, quraşdırılacaq nəhəng ekranın işıqlandırılması nəzərdə tutulan elektrik məsrəfindən dəfələrlə çox məsrəf istədiyi üçün meriya bundan imtina edib və əsl həqiqəti demək əvəzinə səbəb kimi məhərrəmlik ayının başlanmasını göstərib. Amma nəzərə alsaq ki, Nazirlər Kabineti hələ 2008-ci ilin yanvarında müəyyən etdiyi qrafikdə məhərrəm ayının dekabrın 29-da başlandığını xəbər verib, odur ki, merin bundan az qala bir il sonra xəbər tutması sadəcə təəccüblüdür. Amma yox, təəccüb burada yerinə düşmür, bu daha çox insanları avam yerinə qoymaqdır.
Deməli, belə. Pul az, xərci borcu ödəmir və bu yerdə birdən yada məhərrəmlik düşür, üstəlik bu şənliklərdə mahnılar ifa edəcək müğənnilərə pul verməmək üçün yenə də məhərrəmliyin başlanması yada düşür və konsert ləğv olunur. Maraqlı nədir? Merin "analoqu" olmayan addım atmasıdır. Cəmiyyətə izah verməmək və həqiqəti deməmək üçün ən yaxşı yol məhərrəm ayının başlanmasını göstərməkdir, həm dindarlar bundan razı qalır, həm dinə rəğbəti olanlar razı qalır, həm pul verməkdən canını qurtarır, həm də cəmiyyətə həqiqəti demirsən.
BƏS DÜNYƏVİ DÖVLƏT FAKTI NƏ OLSUN?
Bu yerdə kefli İskəndər sualına bənzər bir sual ortaya çıxır: cənab mer, dövlət dünyəvi dövlətldir, din dövlətdən ayrıdır, dini mərasim dünyəvi işə necə təsir edir, izah edin. Bax, bu faktı necə izah edəcəksinz deyə, Osmanlı türkləri demişkən, "merak edirəm". Sabah eyni uğurla işıq dirəkləri yıxıldıqda ramazan ayıdır, camaat oruc tutur, odur ki, ramazan ayı çıxdıqdan sonra dirəkləri qaldırarıq məsələsi də gündəmə gələ bilər.
Bu həm də həqarətdir, dinə həqarətdir, inanca həqarətdir, məzhəbə və mərasimə həqarətdir. Odur ki, kimin nə problemi varsa gedib problemini həll etsin, daha din adına özünə siyasi kapital toplamasın. Bu, sadəcə və sadəcə ayıbdır.