Opinionway Azərbaycan hakimiyyətini sevindirib və bununla məşğul olmağa davam edəcək

Həmişə hökumətyönlü fransızlar

Müxalif Milli Şuranın rəhbəri Cəmil Həsənli Azadlıq Radiosu-na müsahibəsində deyib ki, Azərbaycanda Konstitusiya referendumunun yekunları əvvəlcədən həll olunub. MSK-nın sentyabrın 27-də elan etdiyi nəticələr Azərbaycanda Fransanın araşdırmaçı OpinionWay institutu tərəfindən keçirilmiş sosioloji sorğunun yekunları ilə üst-üstə düşəcək. “Fransızlar” bildiriblər ki, Azərbaycanlı respondentlərin 81%-i 26 sentyabr referendumunda iştirak edəcək, rəyi soruşulanların 87%-nin fikrincə isə, “Konstitusiyaya təklif olunan əlavə və dəyişikliklər zəruridir”. Rəyi soruşulan 1200 respondentin 82%-i Azərbaycan Respublikasında siyasi stemin fəaliyyəti ilə bağlı məmnunluqlarını bildiriblər. Respondentlərin 93%-i hesab edir ki, hazırda Azərbaycanda həyata keçirilən işlər doğru istiqamətdə aparılır. Respondentlərin 96%-i hesab edir ki, prezident İlham Əliyev öhdəliklərini uğurla həyata keçirir, OpinionWay-in gəldiyi nəticə belədir.

Bu nəticələr, ilk növbədə, Rusiyanın “Kavkazskiy uzel” portalı tərəfindən Bakıda aparılmış videosorğuya əsaslı şəkildə ziddir. Videoçarxda görünür ki, (http://www.kavkaz-uzel.eu/blogs/16/posts/25956) rəyi soruşulanların cəmi 5-6-sının sentyabrın 26-na nəzərdə tutulmuş referendum haqqında məlumatı var və səsvermədə iştirak etmək istəyirlər. “Kavkazskiy Uzel” şəhərin küçələrində, avtovağzalda və Bakı Neft və Sənaye Universitetinin girişində 35 respondentə suallar verib. Çoxları hətta sualları cavablandırmaqdan imtina edib, bəzi azərbaycanlılar isə səssizcə kameradan üz çeviriblər.

OpinionWay kimdir? 2015-ci ilin noyabrında da onlar Azərbaycanda olublar və parlament seçkilərinə az müddət qala yerli jurnalistlərə apardıqları sorğunun nəticələrini təqdim ediblər. Bildiriblər ki, “İlham Əliyevin prezident öhdəliklərinin öhdəsindən gəlməsindən nə dərəcədə məmnunsunuz?” sualına respondentləin 78,8%-i “Çox məmnunam” cavabı verib... Bir çox digər suallara cavablar da Azərbaycan dövlət telekanalının – AzTV-nin üslubunda idi.

Bilavasitə 2015-ci il parlament seçkiləri günü Azərbaycanda elə həmin fransızlar exit-poll keçiriblər. Həmin vaxt onlar 118 dairə üzrə seçicilərin rəyini soruşub. 1200 nəfərin rəyi soruşulub. Sonradan məlum olub ki, sorğunun nəticələri Mərkəzi Seçki Komissiyasının ilkin nəticələri ilə üst-üstə düşüb.

2014-cü ilin dekabrında isə şirkət-institut Britaniyalıların rəyini soruşaraq, sonradan bildirib ki, dekabrda Böyük Britaniyada Avropa İttifaqına daxil olmaq haqqında referendum keçirilsəydi Dumanlı Albion sakinlərinin 42%-i Aİ-dən çıxmağın lehinə, 37%-i isə əleyhinə səs verərdi.

Üzüm üzümə baxa-baxa qaralır

Britaniya hadisələrini qoyaq bir kənara – bizi OpinionWay-in Azərbaycandakı fəallığı maraqlandırır. 2015-ci ildə onlar Azərbaycan Gənclərinin Hüquqlarını Müdafiə Mərkəzi ilə əməkdaşlıq ediblər. Google axtarış sistemi sözügedən adı axtardıqda yalnız Mərkəzin OpinionWay ilə birlikdə ictimai rəy sorğusunda iştirakı haqqında məlumat verir. Belə çıxır ki, artıq bu Azərbaycan təşkilatı işləmir, necə ki, siyasi səbəblərdən həbsxanalara düşmüş, amma narkotik saxlamaqda ittiham olunmuş gənc Azərbaycanlıların hüquqlarının müdafiəsi üzrə ictimai aksiyalarda da gözə dəyməyiblər.

Sentyabrın 26-da OpinionWay yenidən “qıvraq” hesabatla “sevindirəcək, belə ki, Azərbaycanda referendumda exit poll keçirmək niyyətindədir. MSK-nın sentyabrın 7-də keçirilən iclasında konstitusiya seçkilərində işləmək üçün Vətəndaşların Əmək Hüquqlarının Müdafiəsi Liqası Amerikanın AJF&Associated Inc təşkilatı ilə birlikdə, “Vətəndaş cəmiyyəti naminə” Müstəqil Məsləhət və Yardım Mərkəzi Fransanın Opinion Way Sosioloji Araşdırmalar İnstitutu ilə birlikdə, habelə ELS müstəqil Araşdırmalar Mərkəzi icazə alıb. MSK-nın istinad olunan məlumatından göründüyü qədər, analoji təşkilatlardan digər müraciətlər olmayıb.

Sən demə, OpinionWay Azərbaycandakı tərəfdaşını dəyişdirib, indi fransızlar “Vətəndaş cəmiyyəti naminə” Müstəqil Məsləhət və Yardım Mərkəzi ilə əməkdaşlıq edirlər. 2010-cu ilin noyabrında bu təşkilat Azərbaycanda parlament seçkilərinin “monitorinqini aparıb”, seçki qanunvericiliyinin ciddi pozuntularını qeydə almayıb. Bir halda ki, bu seçkiləri müşahidə edən bir sıra nüfuzlu xarici təşkilatlar, tənqidi icmalla çıxış ediblər. ATƏT DTİHB bildirib ki, “ümumiyyətlə seçkilər ATƏT çərçivəsində demokratik seçkilər üzrə bir sıra əsas öhdəliklərə uyğun olmayıb”. AŞPA-dan olan müşahidəçilər bildiriblər ki, seçkilər “sakit və dinc, beynəlxalq standartlara uyğun keçirilib”, amma seçkilərdə bir sıra nöqsanlar olduğunu qeyd ediblər. ABŞ Dövlət Departamentinin müşahidəçiləri seçkilərin beynəlxalq standartlara uyğun olmadığını bildiriblər.

Fransızlar Azərbaycana hörmət etmir – bizi öz saytlarına “yerləşdirməyiblər”

Professor Cəmil Həsənlinin sözlərinə görə, Konstitusiya referendumunun yekunları artıq məlumdur, OpinionWay artıq öz rəyini bildirib, onun nəticələri isə, professorun sözlərinə əlavə olaraq deyək ki, heç vaxt Azərbaycan MSK-nın hesabatlarından fərqlənmir. Burada hər şey aydındır və şübhə doğurmur. Təəccüblü olan başqa şeydir: niyə Fransa institutunun rəsmi saytında Azərbaycanda aparılan araşdırma haqqında hesabat yoxdur?

http://www.opinion-way.com ünvanına daxil olduqda qarşımızda Fransız dilində səhifə açılır. Axtardıqda saytın fransızca analoqunu tam şəkildə əks etdirən yalnız ingilis dilində versiyasını tapdıq. İncə-incə axtarış həyata keçirdik, hamıya açıq şəkildə yerləşdirilmiş bütün sorğuların metodologiyası və nəticələri ilə tanış olduq, Azərbaycan üzrə sorğunu tapa bilmədik. Belə olan halda biz şirkətin saytda göstərilən elektron ünvanına məktub göndərdik. Bizə aparılmış araşdırmanın yekunlarını təqdim etməyi xahiş etdik, təbii ki, belə bir iş aparılıbsa. Amma OpinionWay-dən məktubumuza cavab almadıq.