YATMIŞ ŞIR

Hanı Mirzə Sakit?
Mirzə Sakiti görsəniz deyin ki, Çingiz Çənizadə yenidən danışmağa başlayıb. Özü də nə istəyir danışır. O gün də hansısa bir qəzetdə açıqlama verib ki, həbs edilən gənclər sən demə heç bloqqer də deyilmiş. Hə, analar düz deyib, utanmasan hüquqmüdafiəçisi olmağa nə var? Qənizadənin işini tapşırırıq Mirzə Sakitə. Qoy Mirzə həqiqəti araşdırsın... Di ya Allah...
Şərhçi: Qənizadə müdafiədən topu ötürür yarımmüdafiəyə. Burada topu Aydın Mirzəzadə qarşılayır və rəqiblərin üstünə hücuma keçir.
Müdafiəçi Qənizadənin açıqlamasından sonra, deputat Mirzəzadə Aydın da deyib ki, həbs edilən gənclər - Adnan və Emin- bloqqer deyil: `Adnan Hacızadə və Emin Milli bloqqerlər deyildilər.Mən lap çox təəssüf edirəm ki, Adnan Hacızadə və Emin Mİllinin məsələsini belə siyasiləşdirilir. Mən onları bloqqerlər adlandırmağa qarşıyam. Bloqqer o adama deyilir ki, onlar internet bloqlarına malikdirlər - hansı ki hər gün yenilənilir, Ancaq mən heç vaxt onların bu fəaliyyətini eşitməmişəm. Bu gənclər müəyyən hərəkət üçün ittiham edilib və məhkəmə hökmünün onların fəaliyyətləri ilə heç bir əlaqəsi olmayıb.`
Şəhrçi: Aydın Mirzəzadədən rəqibləri aldatmağa cəht edir. Amma bu alınmır... Oyunu dünya səviyyəli hakimlər briqadası idarə edir.
Maraqlıdır, Aydın Mirzəzadənin bu açıqlamasından sonra soruşmaq lazımdır ki, əgər belə bloq- mloqdan danışırsa heç olmasa öz bloqu varmı? Yoxsa Aydın Mirzəzadə də bloqqer olar xəbərimiz olmaz. Əgər Aydın Mirzəzadə müəyyən edirsə kim bloqqerdir o zaman gedib İnformasiya Texnologiyaları Nazirliyində işləsin, siyasətdə nə var axı? Aydın Mirzəzadə yəqin Rusiya, Belorus, Qazaxıstan, Argentina, Sudan prezidentlərinin bloqlarından da xəbərsizdir. Çox güman onların da bloqları haddında heç bir şey eşitməyib. Hələ Aydın Mirzəzadənin bloqqerlərin həbsinə münasibət bildirməsi toya gediləsidir. Azərbaycanda yaşamağımızı unutmayın... Sevinmək lazımdır ki, bloqqerlərlə bağlı televiziya kanalları biabırçı piar kampaniyaları aparmadı. Bizimkilərə nə var, bir də gördün göyərti satanı çıxardıb efirdə danışdırır: `Emin və Adnan bloqqer deyil... Bloqqer bizik. Bütün günü bloklarda göyərti satırıq.` Və yaxud santexnik bloq siyasəti haqqında fikir yürüdür. Nə isə... Hədəfdən yayınmayaq. Heç olmasa Aydın Mirzəzadə desin görək, onun öz, şəxsi e-maili varmı? Varsa o e-maildən necə istifadə edir?
Şərhçi: Oyun dayandırılır... Meydançaya xaricdə yaşayan oyunçumuz daxil olur...
Adnan və Eminin həbsiylə bağlı Aydın Mirzəzadənin dostu Rüstəm İbrahimbəyov maraqlı cavab verirb: `Adnan Hacızadə və Emin Millinin həbsiylə bağlı olaraq deyim ki, mən məhkəmədə olmamışam və günahlarının da nə olduğunu bilmirəm. Amma görürəm ki, çox ağılsız hökmdür. Daha qanunsuz sözünü işlətmirəm. Çünki məhkəmənin hökmü ona görə ağılsız və axmaqdır ki, Azərbaycana ziyandan başqa heç nə vermir. Kimə lazımdır ki, bütün dünya bizə gülsün? Vəziyyəti bu həddə gətirənlər Azərbaycanın xeyrini güdmürlər. Cavanları həbs etmək elə əl yalamaqdır, yəni iqtidara deməkdir ki, görürsənmi mən sənə necə qulluq edirəm.`
Bu da belə...
Yadımdan çıxmamış onu da yazım ki, Zəlimxan Yaqubun da yeni bloqu fəaliyyət göstərir. Bloq gündə 15 min istifadəçi tərəfindən oxunur. İstəsəniz siz də müəllimin bloquna bir göz atarsınız. Aydın Mirzəzadənin gözündən iraq olan bloq belədir: dedeqorqud.wordpress.com
Bir oxucu da yazır ki, Azərbaycan yatmış şirdir... Bu yandan oyadırsan... Gedib o yanda yatır...
Əşşi... Niyə də yatmasın axı... Aydın Mirzəzadə bloqqerlərdən danışıb!