QRANTAMLYOT AXTARIŞI...

Qəzetlərə bir balaca yaxın olan adamlar -oxucular- bilirlər ki, qəzetlərdə maddi durum çox ağırdır. Söhbət bütün qəzetlərdən getmir, gedə də bilməz. Hamı bilir ki, bəzi qəzetlər nəzir-niyazla dolanır, bəziləri ruslar demiş `papa şotu`na. Satışdan da azca pul qazanan qəzetlər var. Nə isə uzatmayaq. Tağı Əhmədov demiş: `Burcutmayaq`
Hər zaman qəzetlərin maddi durum məsələsi gündəmə gələndə çox qəzet redaktoru ağzını göyə açıb, hökümətdən pul gözləyir. Hökmətdən qəzetlərə para ayrılan müddətdə yeni-yeni qəzet redaktorları, jurnalistlərinin peyda olması adama xüsusi zövq verir. `Dağ Çiçəyi` qəzetindən tutmuş `Qayka` qəzetinə qədər adlarını heç bir zaman eşitmədiyimiz əndirəbadi qəzetlərin redaktorları da civ-civ salıb, pul istəyirlər. Yazıq Əflatun Amaşov ha and-aman eyləyir ki, ə bir sıraya düzülün, özünüzü adam kimi aparın, hamınıza pul çatacaq. Amma kimə deyirsən? Hökümət maddi yardım edən ərəfədə aləm dəyir bir- birinə. Redaktor jurnalistini tanımır, jurnalist də diktafonunu. Hamı balaca uşaq kimi konfet gözləyir. Hökümət də konfeti kimə istəyir verir. Bu yerdə ağlayana pəpə yoxdur anlamı, ağlayana konfet yoxdur anlamıyla əvəz edilir.
Qardaş ölkə olan Fransa höküməti isə (özüm qəsdən belə yazıram ki, həmsədr Bernard Fasyeni öz tərəfimizə çəkim) fransız mediasına başqa cür yardım edir. Hökümət mətbuata yardım programı çərçivəsində, tələbə və təqaüdçülərə bir il müddətində pulsuz olaraq istədikləri qəzetə abunə yazılmaq şansı yaradır. Hər kəs istədiyi qəzetə pulsuz abunə yazılır. Belə bir şəraitdə raqabət mühiti də yaranır, qəzetlər də satılır...
Bir də gördün bizim hökümət də `fransuzskıy` yardım etdi. Qatıqsatanlara yardım məqsədiylə istədikləri qəzetdə bir illik abunə yazılma şansı verdi. Axı qatıq balonunun ağzını bağlamaq üçün qəzetdən istifadə edilir. Nə bilim meyvə- tərəvəzi də yeşik-meşikə yığanda altına qəzet salırlar. Kənd təsərrüfatının fantastik inkişaf ediyi vaxtda belə bir təklif göydən düşmədir. Təndir çörəyi satanların da qəzetdən istifadə etməyini düşünsək lap qiyamət olar. Hələ fəhlələrin iş zamanı başlarına qoyduqları üçbucaqlı qəzet papağından danışmıram.
Gül iyi gələn Fransanı bir tərəfə qoyub, qayıdaq mazut iyi verən Məmləkətmimizə... Gül dedim, yadıma Natiq Güləhmədoğlu düşdü. Azadlıq qəzetinin əməkdaşı Natiq Güləhmədoğlu səhər yuxudan ayılanda görüb ki, qollarında ərəbcə nəsə yazı yazılıb. Güloğlan hadisəylə bağlı ərəb dilini bilən molla, axund yanına gedib, onlar da deyiblər ki, bala sənin işin qəzetin direktoruna qalıb. Natiqin qollarına `Azər maaşı ver` sözləri yazılıbmış. Bunu eşidən Natiq yerindəcə təksəbir gətirib, asqırıb. Asqıraq tozunda mollaəmi `Maaş` sözlərini yenidən oxuyub.
Bu qeyri-adi hadisə də özü-özlüyündə jurnalistlərin vəziyyətinin yaxşı olmamasını sübut edir. Həqiqətən də vəzyyət yaxşı deyil... 1-2 gündür Ədliyyə Nazirliyi RATİ-də `şmon`a başlayıb. Eşidiblər ki, ofisdə qrantamlyot var. Qrant və qrantamlyotu müəyyən edə bilməyən nazirlik əməkdaşları `Bomba rabatay` deyib, doluşublar RATİ-yə... Di gəl, baş çıxar bu məsələdən.
Vəziyyətin ağır olduğu vaxtda siz də Əziz Nesinin məhşur `Biz evə qəzet almırıq...` hekayəsindəki kimi etməyin. Evə qəzet alın. Əgər hər gün mədəniz üçün çörək alırsınızsa, beyniniz üçün də kitab, qəzet alın!

Turxan QARIŞQA