Təhsil Nazirliyinin FH şəraitində məsafədən təhsilə hazır olmadığı məlum oldu

Bakı/17.03.20/Turan: Martın 2-dən Azərbaycanda orta və ali məktəblərdə dərslər dayandırılıb, uşaq bağçaları və idman klubları bağlanıb. Bu həftənin əvvəllərindən AzTV-Mədəniyyət telekanalında məktəblilər üçün dərs proqramlarının yayımlanmasına başlanıb.

Məktəb müəllimləri Təhsil Nazirliyinin yaratdığı telestudiyadan dərs keçir. Beləliklə, Azərbaycan ilk dəfə olaraq məsafədən təhsil tətbiq edir.

Ölkədə məsafədən təhsilin fəal tərəfdarlarından biri Tusi adına Azərbaycan Pedaqoji Universitetinin dosenti İlham Əhmədovdur. Amma Təhsil Nazirliyində onun televiziyada və sosial şəbəkələrdəki çıxışlarına məhəl qoymayıblar. Nəticədə, Azərbaycanda təhsil sistemi koronavirus problemi ilə üzləşib və məsafədən təhsilin təşkilinə hazır olmadığı məlum olub.

İlham Əhmədov Turan agentliyinə müsahibəsində deyib:

- O vaxt, hələ pandemiyadan əvvəl məsafədən təhsil verən universitetlər və məktəblər var idi, amma Azərbaycanın beş min məktəb və universitetinin yeni sistemə hazır olmadığı məlum oldu. Təhsil Nazirliyi nəinki məsafədən təhsil sistemi yaratmayıb, onun yaradılması cəhdlərinin də qarşısını alıb.

Məsafədən təhsil təkcə fövqəladə hallarda lazım deyil. Bizdə ixtisasartırma kursları indiyədək 50 il əvvəl olduğu kimi keçirilir, yəni müəllimlər, həkimlər Bakıya gəlir, burada yaşayır və kurslara gedirlər, bir halda ki, bütün bunları məsafədən etmək olar.

- Bunun səbəbi nədir, məsafədən təhsilə niyə belə münasibət göstərilir?

- Səbəb ondadır ki, 20 il ərzində sistem həmişə bir nəfərin - nazirin istəyi və bilikləri ilə idarə olunub. O, təhsilə nəyin lazım olduğuna, nəyin zərərli olduğuna özü qərar verirdi, mütəxəssislərin fikirlərini və dünya təhsilindəki trendləri diqqətə almırdı.

Təhsil Nazirliyi məsafədən təhsilin geriliyini Azərbaycanda internetin sürətinin az olması ilə izah edir, Nəqliyyat, Rabitə və Yüksək Texnologiyalar Nazirliyi isə bütün ölkədə internetin yüksək keyfiyyəti haqqında hesabat verir.

2000-ci illərdə, dünyada internet hazırda Azərbaycanda olduğundan daha zəif olduğu vaxt başqa ölkələrdə onlarla məsafədən təhsil verən universitet müvəffəqiyyətlə işləyirdi.

Bu gün bizim Təhsil Nazirliyimiz ənənəvi televiziyanın imkanlarından istifadə etmək məcbriyyətindədir, bu da ötən yüzilin səviyyəsidir. Təhsil Nazirliyində muxtar və keyfiyyətli, sabit məsafədən təhsil üçün kadr imkanları və texniki imkanlar yoxdur. Bir halda ki, təhsil haqqında qanunda məsafədən təhsilə xüsusi yer ayrılıb.

Təhsil və Rabitə nazirlikləri hökumət tərəfindən maliyyələşdirilən "Təhsil sisteminin informasiya-kommunikasiya texnologiyaları (İKT) ilə təchiz edilməsi", "Təhsil sisteminin informasiyalaşdırılması", "Elektron Azərbaycan", "İnformasiya Cəmiyyətinin inkişafı", "İKT-nin inkişafına dair Strateji Yol Xəritəsi" və digər proqramları qəbul edib.

Amma hazırda müəllimləri təcili şəkildə telestudiyaya çağırıb televiziyada yayımlamaq üçün onların dərslərini çəkirlər, bir halda ki, başqa ölkələrdə milli internet-kanallar mövcuddur, onlarda istənilən dərsi asanlıqla tapıb evdə öyrənmək olar. Hazırda bütün dünyada ənənəvi təhsillə yanaşı onlayn təhsil də mövcuddur və şagirdlər ən münasib təhsil metodunu seçə bilirlər. Məhdud imkanları olan insanlar üçün bu seçim xüsusilə aktualdır.

- Vəziyyəti necə düzəltmək olar?

- Universitetlər, xüsusən də məktəblər təkcə öz qüvvəsi ilə milli məsafədən təhsil sistemi yarada bilməz. Vəsait tapmaq, mütəxəssislər yığmaq və labüd problemin həlli üçün işçi qrup yaratmaq lazımdır. Azərbaycanda islahatlar aparılır, təhsil sisteminin də təcili islahatlara ehtiyacı var. -0-