Avropa Şurası Nazirlər Komitəsi Bakıdan AİHM-in qərarlarının icrasını tələb edib

Avropa Şurası Nazirlər Komitəsi dekabrın 6-8-də keçirilən iclasında Azərbaycan üzrə iki qərar qəbul edib. Bu qərarlarda ölkə hakimiyyəti Avropa İnsan Hüquqları Məhkəməsinin (AİHM) qərarlarını yerinə yetirməyə çağırılır.

Onlardan biri REAL Hərəkatının lideri İlqar Məmmədovun işinə aiddir. Belə ki, onun həbsinin qanunsuz olması barədə AHİM-in qərarına baxmayaraq, Azərbaycan hakimiyyəti onu azad etmir.

Nazirlər Komitəsi öz əvvəlki qətnamələrini və aralıq qərarlarını xatırladır. Həmin sənədlərdə İ.Məmmədovun dərhal azadlığa buraxılmasına çağırılır.

Nazirlər Komitəsi təəssüflə bildirir ki, Azərbaycan Ali Məhkəməsi 2016-cı il noyabrın 18-də AİHM-in qərarına məhəl qoymayaraq

İ.Məmmədovun barəsində ittiham hökmünü qüvvədə saxlayıb.

Nazirlər Kabinetinin qərarında göstərilir ki, İ.Məmmədovun həbsdə saxlanması Azərbaycanın Avropa Konvensiyasının 46-cı maddəsinin 1-ci bəndinə uyğun öhdəliklərini pozmasıdır.

AŞ Nazirlər Komitəsi İ.Məmmədovun işi üzrə AİHM-in qərarının icrasının təmin olunmasında israrlı olduğunu bildirib. Bununla əlaqədar Avropa İnsan Hüquqları Konvensiyasının 46-cı maddəsinin 4-cü bəndinə uyğun olaraq  “təşkilat sərəncamında olan bütün mexanizmlərdən istifadə imkanlarına baxır”.

Bu bənd Nazirlər Komitəsinə AİHM-in qərarlarını icra etməyən dövlətə qarşı sanksiya tətbiq etməyə imkan verir.

İ.Məmmədov 2013-cü ilin yanvarında İsmayıllıda baş vermiş hadisələrə  görə 7 il azadlıqdan məhrum edilib.

Bundan əlavə, Nazirlər Komitəsi “Müxalifət” qəzetinin jurnalistləri Rövşən  Mahmudov (Kəbirli) və Yaşar Ağazadənin işi üzrə AİHM-in qərarlarının tam icra olunmamasına münasibət bildirib.

Onlar Azərbaycan prezidenti İlham Əliyevin əmisi Cəlal Əliyevin iddiası üzrə 2,5 il müddətinə mühakimə olunublar. Lakin yarım ildən sonra əfv ediliblər.

Bununla belə, AİHM onların işində ifadə azadlığının pozulduğunu bildirib.

AİHM onlara kompensasiya ödənilməsi ilə yanaşı diffamasiya haqqında qanuna yenidən baxılması və buna görə adekvat cəza müəyyən olunması barədə qərar çıxarıb.

Nazirlər Komitəsi öz qərarında Azərbaycanda diffamasiya sahəsində qanunvericilikdə islahatların aparılmamasından təəssüfünü ifadə edib.

Hüquqşünas və hüquq müdafiəçisi İntiqam Əliyev Turan-ın müxbirilə söhbətində bildirib ki, Azərbaycan hökuməti Amnesty International təşkilatının müraciətinin iclas iştirakçıları arasında yayılmasına mane olmaq istəyib. Müraciətdə R.Mahmudov və Y.Ağazadənin işi ilə üzrə məsələnin müzakirəsi ilə əlaqədar Azərbaycanda ifadə azadlığının məhdudlaşdırılması, hökuməti tənqid edənlərin uydurma ittihamlarla həbsi, qanunvericiliyin pisləşməsi  barədə  daha çox fakt göstərilib.

Azərbaycanın səlahiyyətli nümayəndəsi Çingiz Əsgərovun AİHM-ə məktubunda qeyd olunub ki,  Amnesty International-ın müraciətinin məzmumu R.Mahmudov və Y.Ağazadənin işlərinə dair məsələdən kənara çıxır.

Bununla belə, müraciət iştirakçılar arasında yayılıb, təşkilatın saytında dərc edilib.

İ.Əliyev Nazirlər Komitəsinin qərarını şərh edərkən deyib ki, dəfələrlə Azərbaycan hökumətini AİHM-in qərarlarını, o cümlədən İ.Məmmədovla bağlı qərarı yerinə yetirməyə çağırıb.

“Öncə hökumət dialoqa hazır olduğunu bəyan edir, sonra isə bundan yayınır və nəinki AİHM-in qərarlarını yerinə yetirmir, üstəlik qanunvericiliyi daha da sərtləşdirir, vətəndaş cəmiyyətinə təzyiqləri artırır, uydurma ittihamlarla həbslər edir. Bu mənada Azərbaycanın vətəndaş cəmiyyəti Nazirlər Komitəsindən daha qətiyyətli addımlar gözləməkdə haqlıdır”, - hüquqşünas vurğulayıb.

Ancaq o hesab edir ki, yəqin ki, hökumət Azərbaycanın üzləşdiyi çətinlikləri nəzərə alaraq bunun nəticələrini, “məhəl qoymamaq siyasəti”nin nələrə səbəb ola biləcəyini başa düşür. Odur ki, İ.Əliyev güman edir ki, İ.Məmmədov da daxil olmaqla, bir qrup siyasi məhbus yaxın vaxtlarda azadlığa buraxılacaq.—06B--