Din xadimləri ilk dəfə ixtisasartırma kurslarından keçəcəklər

Çərşənbə axşamı Qafqaz Müsəlmanları İdarəsində (QMİ) din xadimlərinin ixtisasartırma kurslarından keçmələrilə bağlı toplantı keçirilib. 

Azərbaycanda din xadimlərinin ixtisasartırma kurslarına cəlb olunması ilk dəfədir. Bu məsələnin vacibliyi bir neçə cəhətlə əsaslandırılıb.  Din xadimlərinin moizə və çlxlşlarının keyfiyyətinin yüksəldilməsi, dindən təfriqə üçün istifadə etmək cəhdlərinin qarşısının alınması, dindən cəmiyyətin birliyi üçün istifadə olunması kimi cəhətlər bu sıradadır. “Din xadimləri moizə və çıxışlarını bu günə yox, gələcəyə hesablamalıdır”, - QMİ sədri şeyxülislam Allahşükür Paşazadə qeyd edib. Bundan əlavə, dinin gələcəyinin din xadimlərinin əlində olduğu vurğulanıb və daim öz üzərlərində çalışmaları tövsiyə edilib. Bunun üçün hər bir şəraitin yaradıldığı vurğulanıb.

Belə ki, din xadimlərinin kurslarda iştirakını təmin edən xüsusi bina tikilib. Bu birmərtəbəli bina “Təzə Pir” məscidi”nin Nabat xanım Aşurbəyli küçəsinə baxan hissəsində yerləşir.

Eyni vaxtda həm əhli-sünnə, həm də əhli-şiədən olan 50 din xadiminin kursda iştirakı təmin edilir. Onlar gündə 3 dəfə yeməklə, yataqxana ilə təmin olunurlar. İxtisasartırma kurslarının 21 gün davam etməsi nəzərdə tutulur. Kurs başa çatdıqda din xadimlərinə sertifikatlar veriləcək. QMİ-nin nəzarətində olan məscidlərin bütün heyətinin ixtisasartırma kurslarından keçməsi hədəfə alınıb. Bundan sonra isə din xadimlərinin hər 3 ildən bir ixtisasartırma kurslarına cəlb olunmaları qərara alınıb. İxtisasartırma kurslarında ilk dərslər mayın 14-də başlanır.

Dindən müsəlmanlar arasında təfriqə salmaq üçün istifadə olunması xüsusi tənqid atəşinə tutulub. “Suriyada islam, din adına “cihad” etdiyini düşünərək bu döyüşlərə qatılmaq nə qədər məntiqidir?” deyə QMİ sədri bu iştirakı  daxili təfriqə adlandırıb.  Eyni zamanda din xadimlərinə dini zəmindəki təfriqəçiliyi aradan qaldırmaq tövsiyəsi verilib. “Mən sizləri sabahın din xadimləri kimi görmək istəyirəm”, - A.Paşazadə vurğulayıb.

Din xadimlərinin  gəncləri yad məzbəblərdən qorumalı olmaları xüsusi qeyd edilib. Bunun üçün dini təbliğatın forma, məzmun və mahiyyətində dəyişikliyin aparılmasının vacibliyi xatırladılıb. Gəncləri yad dini cərəyanlardan qorumaq üçün onların arasında profilaktika işlərinin aparılması önə çəkilib. Onları yalnış dini cərəyanların təsirindən ancaq savadlı din xadimlərinin moizə və çıxışlarının qurtara biləcəyi nəzərə çatdırılıb. Dini maarifləndirmənin daha güclü olmasının  zəruriliyi qeyd olunub, bunsuz hansısa nəticəyə malik olmağın inandırıcı görünmədiyi ifadə edilib.

Din xadimlərinin vahid geyim formasına keçməsi məsələsi də müzakirə obyekti olub və müsbət qarşılanıb.

Daha bir məsələ kimi Bakı İslam Universitetinin (BİU) diplomlarının ölkə daxilində tanınmaması olub. 2009-cu ildən BİU-ya qəbul ümumtest üsulu ilə aparılsa da bu diplomlar tanınmır. Unuversiteti bitirən gənclər magistr, doktorontura mərhələsində diplomların tanınmaması üzündən təhsillərini davam etdirə bilmirlər.

PA-nın milli münasibətlər və miltikulturazlim şöbəsinin müdiri Kamal Abdulla bu məsələ ilə məşğul olacağına söz verib.-05C-