Media-icmal 04.03.2016

Ölkənin iqtisadi həyatı, sosial problemləri, regional münasibətlər medianın aparıcı mövzusudur. 

“Azərbaycan” qəzeti RF baş nazirinin müavini D.Roqozinin Azərbaycana səfəri, Formula-1” yarışları ilə bağlı Azərbaycana gələcək şəxslərin viza prosedurunun sadələşdirilməsi haqda yazır. “Cənub Qaz Dəhlizi”  mövzusu qəzetin aparıcı mövzusu olaraq qalır

“Cənub Qaz Dəhlizi” yeni ixrac marşrutu açmaqla və Azərbaycanı ilk dəfə Avropa ilə birbaşa birləşdirməklə enerji təhlükəsizliyində böyük rol oynayacaq, ərazisindən keçdiyi bütün ölkələrə bir sıra faydalar gətirəcək”. Qəzet bu layihəni belə dəyərləndirir.    

Onda bütün hüquqi yardımlar qanunsuzdur

“Biz oturduğumuz qayığı deşirik”, - Maliyyə Bazarına Nəzarət Palatsının yaradılması üzrə İşçi Qrupun sədri Rüfət Aslanlı Palatanın təşkiliə bağlı Milli Məclisdəki çıxışında deyib. “Azadlıq” qəzeti  yazır ki, R.Aslanlının çıxışında hədəfi banklarda dollar borcu olan vətəndaşlara hüquqi yardım göstərən “Antikollektor” ofisi olub.

R.Aslanlı bu ofisi vətəndaşları banklara olan borclarını qaytarmamağa təşviq etməkdə suçlayıb. “Banklara olan borclar qaytarılmalıdır və kredit götürülbsə  ödənməlidir”. R.Aslanlının yekun fikri bundan ibarət olub.

Adı çəkilən ofisin rəhbəri, tanınmış bank eksperti Əkrəm Həsənov R.Aslanlının iradlarını əsassız adlandırıb. “Biz insanlara kreditləri qaytarmayın demirik, onu necə qaytarmağı izah edirik”. Bu mövqeyi də Əkrəm Həsənov bildirib. Ə.Həsənova görə, əhali kreditləri qanuni əsasda və imkanı daxilində qaytarmalıdır. Bu iki şərt aparıcı məsələdir.

“Əgər “Antikollektor”la bağlı hüquqi xidmət qanunsuzdursa, o zaman bütün hüquqi xidmətlər qanunsuz sayılmalıdır, burada, sadəcə, bankların maraqlarına toxunan məsələ var deyə onlar birləşib hücuma keçmək istyəirlər. Bir də nə Nəzarət Palatası, nə İşçi Qrupun rəhbəri rəsmi dövlət stasusu almamış hansı əsasla insanların hüquqla qorunan haqlarına qarşı çıxır”. Ə.Həsənov R.Aslanlının mövqeyini belə dəyərləndirib.

“İctmai asayişin qorunmasına “könüllü”lərin cəlb edilməsi ölkədə kriminogen durumun ağırlaşması ilə bağlıdır”. Hüquqşünas E.Qəmbər “Exo”  qəzetinə açıqlamasında  bu mövqeyi ifadə edib.

“İqtisadiyyatdakı istənilən çökmə və insanların həyat şəraitinin ağırlaşması həmişə kriminogen durumun pisləşməsilə müşayiət edilir. Demək olar ki, mətbuatda gündəlik qətl, intihar, oğurluq hadisələri haqda informasiyalar bu sahədə heç də durumun yaxşı olmasının göstəricisi sayıla bilməz”, - E.Qəmbər fikrini davam etdirib. Həm də bu könüllülərin mühafizə işinə cəlb edilməsində səlahiyyətlərindən sui-istifadə etmək kimi real riskin olduğunu da nəzərə çatdırır.  

Ekspert Kamil Səlimov isə könüllülərin fəaliyyətini rəsmiləşdirməyə çoxdan ehtiyacın olduğunu söyləməklə bu addımı bəyəndiyini ifadə edib və prezident sərəncamını təqdir etdiyini deyib.

“Bu, Rusiya ilə Azərbaycan arasında ikitərəfli əlaqələri strateji tərəfdaşlıq kimi xarakterizə edirik”. “Bizim Yol” qəzeti RF baş nazirinin müavini D.Roqozinin Azərbaycana səfəri ilə bağlı araşdırma-  yazısında bu dəyərləndirməni dövlət başçısı İlham Əliyevin verdiyini deyir.

Araşdırmaya görə, D.Roqozin də İ.Əliyevin dəyərləndirməsilə razı olduğunu deyib və bənzər fikir ifadə edib.

“Rusiya baş nazirinin müavini, hərbi sənayeni kurasiya edən D.Roqozinin Bakıya Azərbaycandan alınan silahların pullarının ödənilməsinin gecikməsilə bağlı gəlməsi haqda Rusiya mətbuatında yazılanlar əsassızdır”. Qəzetə görə, bu mövqeyi  rusiyalı ekspert Oleq Kuznetsov ifadə edib.

Ekspertin fikrincə, D.Roqozinin səfəri dövlət başçısı İlahm Əliyevlə RF prezidenti V.Putin arasındakı telefon danışıqları zamanı razılaşdırılmış məsələdir.

Test qalacaq

“Test sistemi qalacaq”. Tələbə Qəbulu üzrə Dövlət Komissiyasının sədri Məleykə Abbaszadə bu mövqeyilə bir neçə gün ölkə mətbuatında test üsülunun qalıb-qalmaması ilə bağlı  müzakirələrə “Yeni Müsavat” qəzetinə açıqlamasında  yekun vurub.

“Qəbul imtahanları ilə bağlı əsas istiqamətdə hansısa islahatların aparılmasına ehtiyac yoxdur”. TQDK sədri bu mövqeyilə test üsülunun qorunub saxlanmasına müsbət mövqe nümayiş etdirib.

Qurum sədri bu yöndə imtahanların aparılmasında texniki və s. baxımdan təkmilləşdirmənin daim davam edəcəyini deyib. “Mərkəzləşdirilmiş imtahanlar indi necə şəffaf, insan faktorundan azad təşkil edilirsə gələcəkdə də elə olacaq, insan faktoru imtahanların nəticələrinə təsir  göstərməyəcək”. TQDK sədi bununla da test imtahanlarının keçirilməsində mahiyyətin nədən ibarət olmasını  ortaya qoymaqla həm də onun əvəz olunmazlığına toxunub.