Media-icmal 07.09.20

Pandemiyaya qarşı psixoloji mübarizə, dövlət idarəçiliynin optimallaşdırılması, ictimai nəqliyyatda gediş haqlarının arta bilməsi ehtimalı, taksi xidməti sahəsində vahid tarif üzrə konsepsiyanın qəbul olunmamasının səbəbləri, taksi qiymətlərinin bahalaşa bilməsi qayğıları və s. medianın aparıcı mövzuları sırasındadır.

 “Azərbaycan qəzeti”  “İnsanları optimizm xilas edəcək” sərlövhəli məqalədə koronavirus pandemiyasına qarşı psixoloji mübarizəni dəyərləndirir.

Müəllif deyir ki, bəşəriyyət 2020-ci ildə koronavirus pandemiyası ilə mübarizə aparır, yarım ildən çox zaman müddətində COVID-19 bəlasının hələlik tibbi çarəsi tapılmayıb: “Amma Ümumdünya Səhiyyə Təşkilatının, mütəxəssislərin gəldiyi qənaət odur ki, maska taxmaqla, sosial məsafə saxlamaqla, gigiyena qaydalarına əməl etməklə koronavirusdan qorunmaq mümkündür”.

Yazı müəllifi vurğulayır ki, pandemiyanın insan psixologiyasında yaratdığı fəsadlardan qorunmaq o qədər də asan deyil, bir tərəfdən, virusa yoluxmaq qorxusu, digər tərəfdən, tətbiq ediln karantin rejimi, müəyyən məhdudiyyətlər psixoloji gərginliyi artırır.

Müəllif deyir ki, mütəxəssislər normadan artıq psixoloji təsirin depressiya ilə nəticələnəcəyini bildirir və psixoloji təzyiqin, stresin də elə xəstəlik qədər təhlükəli olduğunu söyləyirlər: “Çünki stres immunitetin aşağı düşməsinə səbəb olaraq viruslara asanlıqla yoluxmağa, xəstəliyi ağır keçirməyə zəmin yaradır. Xəstəlikdən sağalsaq belə onun qorxusunun yaratdığı depressiyanın təsirindən uzun müddət çıxmaq mümkün olmur” deyə səbəbi izah edir.  

Müəllifə görə, stresə davamlılığı artırmaq üçün kifayət qədər yuxu, sağlam qidalanma, müntəzəm fiziki aktivlik, gəzintilər və pozitiv insanlarla ünsiyyət kimi bir sıra üsullar mövcuddur.

Məqalə müəllifi hesab edir ki, bir-birimizə dəstək olmaqla çətin anları  pozitiv düşüncə ilə darmadağın etmək olar, çünki bütün xəstəliklərin yaranma kökündə psixologiya dayanır.

“Yenisabah.az” saytı “Deputatlar iki rayonun ləğvindən danışdı: “Bürokratiya, süründürməçilik...” sərlövhəli məqalədə deputatlarla dövlət idarəçiliyinin optimallaşdırılmasını müzakirə edir. 

Deputatların deməsinə görə, Azərbaycanda dövlət idarəçiliyinin optimallaşdırılması, şəffaflaşdırılması, operativlik və səmərəliliyinin yüksəldilməsi həyata keçirilən islahatların mühüm tərkib hissəsidir.

Deputatların fikrincə, hazırda dövlət orqanlarının fəaliyyətindəki operativlik, ictimai rəyə, vətəndaşların problemlərinə həssas yanaşma, bürokratik əngəllərə, korrupsiya, rüşvətxorluq və s. qarşı kəskin mübarizə, yeni idarəetmə fəlsəfəsi ictimai rəydə daha çox rəğbət qazanır: “Bütün bunlar göstərir ki, qarşıdakı dövrdə də yerli və mərkəzi icra orqanlarının fəaliyyətinin optimallaşdırılması ilə bağlı tədbirlər davam etdiriləcək”.

Deputatlar vuğulayırlar ki, Gəncə şəhərinin Nizami və Kəpəz rayonlarının inzibati ərazi bölgüsünün ləğv olunması təşəbbüsü ölkənin ikinci böyük şəhərində idarəetmənin keyfiyyətinin yüksəldilməsi və vətəndaş məmnunluğunun təmin edilməsi üçündür: “Əhalisinin sayına görə Gəncə şəhərinə yaxın olan Sumqayıtın nümunəsi göstərir ki, idarəçiliyin bir mərkəzdən icrası daha səmərəli və optimal mexanizmdir”.

Deputatlara görə, bunun nəticəsində vətəndaşların müraciətlərinə baxış sadələşdiriləcək, poblemlər daha çevik həll olunacaq, idarəetmə sistemində çoxpilləlilik, paralellik, təkrarçılıq, süründürməçilik və s. aradan aradan qaldırılacaq.

Deputatlar hesab edirlər ki, böyük idarəetmə aparatının ləğvi həm də büdcə vəsaitlərinin sərfiyyatını azaldacaq.

“Sfera.az” isə “Avtobuslarda gediş haqqı 40-50 qəpik olacaq-açıqlama” (https://sfera.az/avtobuslarda-gedis-haqqi-40-50-qepik-olacaq-aiqlama/) sərlövhəli məqalədə gediş haqlarının arta bilməsinin mümkünlüyünü  ekspertlərlə müzakirə edirlər.

Ekspertlərə görə, ictimai nəqliyyatda növbəti qiymət artımı 40-50 qəpik ətrafında ola bilər: “Əgər vahid taksi dispetçeri yaradılsa və vahid qiymət tətbiq edilsə, bu, ictimai nəqliyyatda da gediş haqqına öz təsirini göstərəcək:

Amma ekspertlər hesab edirlər ki, Tarif Şurası qiymət artımını əsaslandırmalıdır və bunun üçün də şərtlər dəyişməli; yanacağın qiymətində ciddi artım, avtobuslarla daşınan sərnişinlərin sayı az olmalıdır (ancaq oturacaq sayı qədər): “Lakin hazırda bizdə ictimai nəqliyyatda “mehriban olmaq” məsələsi hökm sürür. Qısası, bu tip əsaslar olmadan Tarif Şurası qiymət artımı edə bilməz. Əgər taksi qiymətləri artsa, bütün tələb ictimai nəqliyyata yönələcək. Amma ictimai nəqliyyat istiqamətində də hələ də yekunlaşmayan, həll edilməsi gərəkən problemlər mövcuddur”.

Ekspertlər hesab edirlər ki, BNA taksi xidmətləri sahəsində olduğu kimi, bu sahədə də keyfiyyətin artırılması istiqamətində standartların tətbiqi, leqallaşmanın aparılması, dövriyyənin şəffaflığı, sürücü və müştərilərin təhlükəsizliyinin təmin edilməsi lazımdır. İctimai nəqliyyatda növbəti qiymət artımı 40-50 qəpik ətrafında ola bilər. Qiymətlər indiki kimi 30% artırlsa bu, kifayət qədər dövriyyə deməkdir. Lakin bu qeyd edilənlər hazırki dövr üçün heç də uyğun olmaz”.

“Yeniavaz.com” saytı isə “Taksi qiymətlərini bahalaşdırmaq olmaz”-Vahid Əhmədov” sərlövhəli məqalədə müəllif taksi xidməti sahəsində baş verən hadisələrlə bağlı deputat Vahid Əhmədovla söhbətləşir.

V.Əhmədov “Bakı Nəqliyyat Agentliyinin (BNA) keçmiş şöbə müdiri Hikmət Babayevin “taksidən yalnız imkanlı adamlar istifdə etməlidir” fikrİ ilə razı olmadığını,  bu xidmətin hamıya  aid olduğunu vurğulayır.

Deputat son günlərin əsas mövzularından biri olan vahid tarif və xidmətin keyfiyyət məsələsinə də toxunub. V.Əhmədovun fikrincə, taksi xidmətinin bir neçə problemi var: “Birincisi, taksilərdə xidmət səviyyəsi çox aşağıdır. Xidmət yüksək səviyyədə olmalıdır ki, insanlar bundan razı qalsınlar. İkincisi, tariflər elə hazırlanmalıdır ki, nə sürücülər, nə də vətəndaşlar bundan əziyyət çəksinlər. Yəni, tarifi yüksək məbləğdə qəbul etmək olmaz. Üçüncüsü, ölkəyə kifayət qədər taksilər gətirilib. Taksi fəaliyyətinə yaramayan taksilər dövriyyədən çıxarılmalı, ölkəyə gətirilən taksilər uyğun qiymətlərlə fəaliyyət göstərməlidir”.

Deputat bu xüsusda daha bir problemə də fikir bildirib: “Avtomobili taksi fəaliyyətinə uyğun olmayan şəxslərin iş məsələsi də həll olunmalıdır. Nəzərə almaq lazımdır ki, indi pandemiya dövrüdür, neftin qiyməti aşağı düşür, işsizlik artır və s. Bu mənada işsiz adam qalmamalıdır. Belə qərarlar dəqiq hazırlanmalı və ölkədəki vətəndaşların durumu nəzərə alınmalıdır”.