Media-icmal 18.02.20

Seçki saxtakarlığına görə mümkün cəzalar, təhsilin əmək bazarına uyğunlaşdırılması, vətəndaşların sosial qayğıları  və s. məsələlər ölkə mediasının aparıcı mövzuları sırasındadır. 

“Modern.az”da  “Seçki saxtakarlığına yol verənlərin işi prokurorluğa göndəriləcək” sərlövhəli məqalədə seçki pozuntularına görə cəzalardan danışılır.

Hüquqşünas Əliməmməd Nuriyev saxtakarlığa yol verilən dairələrin işinin prokurorluğa veriləcəyini bildirib : “Əgər seçki dairələrinin nəticələri saxtakarlığa yol verildiyi üçün ləğv edilirsə, bu məsələlərin araşdırılması prokurorluq orqanlarına verilməlidir. Prokurorluq da konkret olaraq müəyyənləşdirəcək ki, kim hansı əməli törədib”.

Hüquqşünasın deməsinə görə, burada cərimə cəzası var və bu cəzanın məbləği 1500 manatdan 7000 manata kimi kimi nəzərdə tutulur.  

Ə.Nuriyev seçki hüququnun pozulması, saxtakarlığa yol verilməsi ilə bağlı azadlıqdan məhrumetmə cəzasının da tətbiq olunacağını deyib, səsvermənin nəticələrini saxtalaşdıran şəxslərin 3 ilədək, səlahiyyətdən sui-istifadəyə görə isə 7 ilədək azadlıqdan məhrumetmə cəzası verilə bilər.

MSK katibi Mikayıl Rəhimov da deyib ki,  səsvermədə qanun pozuntusuna yol verilibsə mütləq şəkildə bu məsələ prokurorluqda araşdırılacaq.

Xatırladaq ki, MSK 33 saylı Xətai birinci, 35 saylı Xətai üçüncü, 74 saylı Lənkəran kənd və 80 saylı İmişli-Beyləqan seçki dairələrinin nəticələrini ləğv edib.

“Bizimyolşinfo”da isə “Deputatlığa namizədlər yenidən etiraz aksiyası keçiriblər sərlövhəli məqalədə fevralın 9-da keçirilmiş növbədənkənar parlament seçkilərinin nəticələrilə bağlı bəzi deputatlığa namizədlərin mövqeyini işıqlandırır.

Müəllifin deməsinə görə, deputatlığa namizədliyi qeydə alınan bir qrup namizəd fevralın 17-də Mərkəzi Seçki Komissiyasının (MSK) binası qarşısında etiraz aksiyası keçirib.

Yazı müəllifi deyir ki, deputatlığa namizədlər Xalid Bağırov və Bəxtiyar Hacıyevin sözlərinə görə, seçki dairəsində səsvermə ciddi qanun pozuntuları şəratində keçib.

Müəllif əlavə edir ki, hər iki namizəd saxtalaşdırmalar haqqında şikayətlərinə cavab tələb ediblər, polis dəstələri isə deputatlığa namizədlərdən və jurnalistlərdən ibarət qrupu MSK binasından uzaqlaşdıraraq onların binaya girməsinə imkan verməyib.

“Bizim tələblərimiz ədalətlidir və MSK şikayətlərimizə cavab vermək məcburiyyətindədir",- deputatlığa namizəd Xalid Bağırov jurnalistlərə bildirib.

Xatırladaq ki, MSK növbəti iclasında daha bir neçə dairədə nəticələri yoxlanılması üçün DSK-lara göndərib. Belə ki, 86 saylı İsmayıllı, 66 saylı Biləsuvar, 10 saylı Binəqədi üçüncü, 9 saylı Binəqədi ikinci seçki dairələrində saxtalaşdırmalar haqqında şikayətlərin yoxlanılması üçün DSK-lara göndərilməsi haqqında qərar qəbul edib.

 “Kurikulum və Baloniya sistemindən imtina etməliyik” sərlövhəli məqalədə isə ali məktəblərdə ixtisasların əmək bazarına uyğunlaşdırılması müzakirəyə çıxarılır.

Məqalədə vurğulanır ki, “Məşğulluq Strategiyasının həyata keçirilməsinə dair 2020-2025-ci illər üçün Tədbirlər Planı”nda bu məsələ əksini tapır.  məktəblərdə ixtisasların əmək bazarına uyğunlaşdırılması əksini tapıb.

Müəllifin deməsinə görə, aidiyyatı nazirilklər 2020-21-ci illərdə təhsil müəssisələrinə tələbə qəbulunda nəzərdə tutulan ixtisasların əmək bazarının tələblərinə uyğunluğunun təmin edilməsi üçün təkliflər hazırlamalıdır.

Müəllif əlavə edir ki, hazırda əmək bazarında elə ixtisaslar var ki, günün tələbinə cavab vermir, həm də istənilən halda tələbata cavab verməyən ixtisasların mövcudluğu ən böyük problemdir.

Təhsil Nazirliyi yanında İctimai Şuranın sədri,  professor  Şahlar Əsgərov “modern.az”a  deyib ki, Azərbaycan əmək bazarının xarici dövlətlərin əmək bazarına adekvat deyil: “...Əgər gedib Britaniyanın əmək bazarını öyrənib gəlib burada tətbiq etsək heç bir nəticə olmayacaq. Əmək bazarımızı özümüz tapmalı, proyektləşdirməliyik”.

Ş.Əsgərov xarici təhsilin Azərbaycana tətbiqini uğurlu hesab etmir, həm də  xeyri olmadığı üçün Kurikulum və Baloniya sistemini götürməyi təklif edir.

İctimai Şura sədri deyir ki, nefti oktanlı benzinə çevirmək texnologiyası var, 95 və daha yüksək oktanlı benzini xaricdən almamaq da mümkündür.

Onun sözlərinə görə, Azərbaycanda meyvə qurudan zavod yoxdur, səbəbi də budur ki, mütəxəssis yoxdur, ona görə də belə ixtisasların yaranmasına ehtiyac var.

“Marja.az”da isə “Kredit şərtləri ağır olduğundan vətəndaşlar yararsız avtomobillər alırlar" sərlövhəli məqalə oxumaq olar.

Müəllif  belə yararsız avtomobillərin alınması səbəblərinə  Ekologiya və Təbii Sərvətlər Nazirliyinin Dövlət Ekspertiza İdarəsinin rəisi Mirsalam Qəmbərovla söhbətində aydınlıq gətirir.

Onun sözlərinə görə, Azərbaycanda atmosferə atılan zərərli maddələrin böyük hissəsi avtomobillərin payına düşür və bu mənada xüsusilə Abşeron yarımadasında vəziyyət daha acınacaqlıdır.

İdarə rəisinin deməsinə görə, ölkədə istifadədə olan avtomobillərin əksəriyyəti köhnəlib: “Onlar atmosferə daha çox zərərli qaz buraxır. Artıq köhnə avtomobillərdən imtina edib elektrik və hibrid avtomobillərə keçməyin vaxtı çatıb”.

Avtomobil bazarı üzrə ekspert Eldəniz Cəfərov isə deyir ki, ölkədə istismarda olan 1 milyon 500 minə yaxın avtomobilin böyük əksəriyyəti istismar dövrünü başa vurub.

Onun fikrincə, bu avtomobillər yol hərəkəti təhlükəsizliyinin təmin edilməsi, ətraf mühitin mühafizəsi baxımından yararsızdır və vətəndaşların yeni avtomobillər alması üçün imkanlar genişləndirilməlidir.

Ekspert hesab edir ki, avtomobil kreditlərinin şərtləri olduqca ağırdır.

Onun sözlərinə görə, banklar yeni avtomobil almaq istəyən şəxslərdən 40 faiz ilkin ödəniş tələb edirlər, krediti isə illik 15-17 faizlə təklif edirlər: “Ona görə də vətəndaşlarımız məcbur qalaraq xarici ölkələrdən yararsız avtomobillər gətirirlər”.

E.Cəfərovun sözlərinə görə, ilkin ödəniş 20 faizə, kreditin illik faiz dərəcəsi isə 9-10 faizə endirilsə vətəndaşlar daha çox yeni avtomobillər almağa can atarlar.