Media-icmal 28.11.19

Dövlət başçısının reytinqi, xaricdə təhsil, və azərbaycanlı və erməni jurnalsitlərin qarşılıqlı səfərləri ətrafında müzakirələr və s. məsələlər medianın aparıcı mövzuları sırasındadır.

Prezidentin reytinqi

“Azərbaycan” qəzeti “Xalqın güvəni artır, reytinq də, nüfuz da yüksəlir” sərlövhəli məqalədə dövlət başçısı İlham Əliyevə ictimai rəğbət və dəstəyin artmasını dəyərləndirir.

Müəllif deyir ki, Azərbaycanın 2003-cü ildən başlayan sürətli inkişafının, uğurları və davamlı yüksəlişinin müəllifi prezident İlham Əliyevdir, məhz onun uzaqgörən, qətiyyətli və prinsipial siyasəti nəticəsində son 16 ildə dövlət və cəmiyyət həyatının bütün sahələrində fundamental dəyişikliklər baş verib.

Üstəlik, müəllif  əlavə edir ki, qısa zaman kəsiyində Azərbaycan tarixinin ən qüdrətli dövlətinə çevrilib.

Müəllif vurğulayır ki, dövlət başçısı bu uğurların qazanılmasının əsasında  məhz ölkədəki sağlam ictimai-siyasi mühitin, xalqla iqtidarın birliyinin dayanmasını xüsusi olaraq diqqətə çatdırır.

Yazı müəllifinə görə,  bu səbəbdən də prezident xalqa, xalq da öz liderinə güvənir.

Müəllifə görə, dövlət başçısının vətəndaşlarla birgə təması, sosial-iqtisadi və yeni kadr islahatları xalqın prezidentə etimadını daha da artırıb.

“Bu günlərdə Sosial Tədqiqatlar Mərkəzinin (STM) apardığı monitorinqin nəticələrinə görə,  vətəndaşların 77,5 faizi prezidentə inam və etimadın daha da artdığını, 18,1 faiz respondent isə həmişəki sabit inam və etibarın qorunub saxlandığını bildiriblər. Tədqiqatlar göstərir ki, islahatların dərinləşməsi və geniş miqyas alması ilə prezidentə olan ictimai rəğbətin və dəstəyin artması arasında dərin bağlılıq var. Göründüyü kimi, əhali "Azərbaycanda dövlət siyasətinin mərkəzində insan amili dayanır” prinsipinin reallıqda təzahürünü təsdiqləyir”,-  müəllif bildirir.

Müəllifin deməsinə görə, prezidentə etimad beynəlxalq müstəvidəki uğurlar və daxili siyasətdəki islahatların dərinləşməsi və davamlılığı fonunda güclənir və hər il Dünya Bankı tərəfindən yayılan “Doing Business” hesabatında Azərbaycan bir neçə pillə irəli gedir.

Müəllif deyir ki, Naxçıvan istisna olmaqla ölkənin bütün bölgələrində respondentlərin 85,1 faizi prezident İlham Əliyevin son bir ildə gördüyü işləri müsbət qiymətləndirdiyini bildiriblər.

Yazının sonunda isə oxuyuruq: “Dövlət başçısının qlobal, genişmiqyaslı və çoxşaxəli iqtisadi siyasəti ölkəmizin müstəqilliyinin, iqtisadi tərəqqisinin təmin edilməsinə yönəlib və görünən odur ki, cənab İlham Əliyev Azərbaycana daha böyük zəfərlər qazandıracaq”.

Təhsil, yoxsa fəlakət

“Modern.az”da isə təhsil şirkətlərinin aldatdığı tələbələr –xaricdə gecələməyə yer tapmır, 5-6 ilini 1-ci kursda keçirirlər...” sərlövhəli məqalə oxumaq olar.

Müəllif nəyin hesabına olursa- olsun xaricdə təhsil almağın yaratdığı problemlər barədə təhsil eksperti Etibar Əliyevlə söhbətləşir.

Müəllifin deməsinə görə, Azərbaycan valideynləri övladlarının xaricdə təhsil almasını daha çox istəyirlər, hətta bu səbəbdir ki “təki xaric olsun deyərək, ağına-bozuna baxmadan, heç bir araşdırma aparmadan bir attestat tələbilə övladlarını qərib ölkələrə göndərirlər.

Müəllif isə vurğulayır ki, xaricdə təhsil şirkətlərinin “bir attestat”la qəbul etdikləri tələbələrin sonrakı taleyi isə bir çox hallarda acınacaqlı olur və Türkiyədəki azərbaycanlı jurnalistlərin verdikləri məlumatları üzücü adlandırır: “Aldanaraq gecələməyə yer tapmayan, 5-6 ilini bakalavriat pilləsinin birinci kursunda keçirən, ailələrini dərdə salan azərbaycanlı gənclər. Bütün bunları isə xaricdə təhsil adı ilə fəaliyyət göstərən, əslində valideynləri aldadaraq pullarını alan, övladlarının gələcəyini məhv edən dələduz şirkətlər həyata keçirir”. 

Ekspert Etibar Əliyev “modern.az”a  açqamasında deyir ki, hər bir vətəndaşın təhsil almaq hüququ var, amma bunun üçün edilən seçim doğru olmalıdır: “Çünki burada bir insan teleyindən söhbət gedir. Bəzən gənclərimiz hansı ölkəni, hansı şəhəri, hansı universiteti seçməsinə diqqət yetirmir, bilmir ki, həmin universitet ölkədə tanınır-tanınmır, akkreditasiyadan keçib-keçməyib”.

Ekspert vurğulayır ki, hətta ali məktəb seçimi zamanı onun perspektivi olub-olmaması kimi vacib məsələni belə dəyərləndirmirlər, “yalnız ali təhsili olsun” prinsipindən çıxış edirlər.

E.Əliyev deyir ki, bunun da nəticəsində minlərlə, 10 minlərlə vətəndaş ya diplomunun tanınmaması, ya diplomunun şübhəli olması ilə bağlı işsiz qalır, buna görə də ötmüş 5-6 il bu şəxslərin həyatında itirilmiş dövr sayılır.

Ekspert deyir ki, hazırda Türkiyə, Rusiya, Belarusda Azərbaycan ali təhsilinin mahiyyətini bilmədən oxuyan çoxsaylı tələbələr var: “Bunlar təki xaricdə təhsil alım, yaxud ölkədən çıxım düşüncəsiylə, hansısa ehtimal əsasında həmin ölkələrə üz tutanlardır. Öz ölkəsində çox da mürəkkəb olmayan qəbul prosesilə universitetə qəbul ola bilməyənlər o ölkələrdə, onların dilini bilməyə-bilməyə çox böyük çətinliklərlə üzləşirlər, yaşayış çətinliklərilə üz-üzə qalırlar. Azərbaycanda tanınmayan xarici ali məktəblərə üz tuturlar ki, bu da onların gələcəyi üçün çox perspektivsizdir”.

E.Əliyev hesab edir ki, bəzən valideynlər xaricdə təhsil adıyla, əslində isə övladını orduda xidmətdən yayındırmaq üçün ölkədən çıxarırlar.

Ekspert deyir ki, bu gün xaricdəki universitetə üz tutan Azərbaycan vətəndaşı bəzi hallarda xaricdəki universitetin perspektivsiz olduğunu bilir, amma bəzən əlacsızlıqdan oxuyur ki, bu da təəssüf doğuran məqamdır.

Kiminə dəmir-dümür, kiminə torpaq

“Moderator.az”da isə “Ruslar daim Azərbaycanın vəzifəlilərinə orden, medal,  ermənilərə isə torpaq verib...” sərlövhəli məqalə diqqəti çəkir.

Müəllif bu günlərdə baş tutmuş azərbaycanlı jurnalsitlərin Ermənistan və Qarabağa, erməni jurnalistlərin isə Azərbaycana səfərinin mahiyyətini keçmiş deputat Maksim Musayevlə dəyərləndirir.

“Erməni və azərbaycanlı jurnalistlərin qarşılıqlı səfərləri o  zaman əhəmiyyətli olar ki, onlardan siyasətimizə uyğun, doğru şəkildə istifadə etmək mümkün olsun. Odur ki, Rusiyanın da iştirakı olan jurnalist mübadiləsi layihəsindən də müsbət nəticə gözləmək sadəlöhvlükdür...”. Bu fikri M.Musayev “moderator.az”a açıqlamasında söyləyib.

M.Musayevə görə, indiki şəraitdə işğalşı ölkə və separatçı rejimə yarımgizli səfərlər torpaqların işğaldan azad edilməsi üçün heç bir əhəmiyyət daşımır.

M.Musayevə görə, bu səfərin o halda bir az effekti ola bilərdi ki, erməni jurnalistlərlə  Bakıda, Gəncədə diskussiyalar təşkil ediləydi, o zaman bir az effekti ola bilərdi.

Keçmiş deputata görə, bu qarşılıqlı jurnalist mübadiləsi layihəsinin  müəllifi Azərbaycan olmadığı üçün mexanizmi də Azərbaycanın əlində deyil.

M.Musayev deyir ki, bu, ATƏT-in Minsk Qrupunun, o cümlədən Rusiyanın təşəbbüsü ilə həyata keçirilib.

Keçmiş deputata görə, Rusiya da digərləri kimi, həmişə Azərbaycan tərəfin başını qatmaqla “piyləməklə” məşğul olub.

“Tarixən daim belə olub: ruslar ən yaxşı halda Azərbaycanın vəzifəlilərinə orden, medal, ermənilərə isə torpaq verib. Ona görə də onların iştirakı olan bu layihədən də bir müsbət nəticə gözləmək sadəlöhvlükdür...”, - keçmiş parlament üzvü fikirlərini təəssüf hissi ilə tamamlayıb.