Media-icmal 30.10.20

"Redaktor.az" saytı  "Rusların ermənilərə verdiyi "Krashuka" PUA-ları tuta bilmir - hərbi ekspert" sərlövhəli məqalədə müəllif Ermənistan hərbi qüvvələrinin Rusiya tərəfdən silahlandırılmasını hərbi ekspert Əbuzər Əbilovla dəyərləndirir.

Ekspert deyir ki, Ermənistana göndərilən silah-sursat arasında Rusiya istehsalı olan "Krashuka-4" elektronik sistemləri də var.

Hərbi ekspertin sözlərinə görə, sözügedən "Krashuka"lar sovet dövrünə aid silahlardır.

Ə.Əbilov deyir ki, "Krashuka" radioelektronik mübarizə sistemidir, həmin texnika döyüş ərazisində müəyyən sahələrdə radioelektron mübarizə apara bilən bir qurğudur. Bu qurğu radioelektron texnikaların işinin əngəllənməsi, sisteminin pozulması üçün nəzərdə tutulub.

Hərbi ekspert vurğulayır ki, bu sistem sovet dövüründə yaradılıb, sonradan üzərində modernləşmə işləri aparılıb, lakin əminliklə deyə bilərəm ki, bu "Krashuka"larla döyüş əməliyyatlarında böyük bir uğur qazanılmayıb.

"Rusiya hər nə qədər də qəbul etməsə də, ortada ciddi sübutlar var ki, Rusiya bu qurğudan Suriya və Liviyada da istifadə edib. Türkiyənin "Bayraktar" və digər pilotsuz uçuş aparatları "Krashuka"ları Liviya və Suriyada zərərsiz hala salıb. Bu baxımdan, deyə bilərəm ki, Ermənistana hansı ölkə nə silah verirsə də, üstünlük Azərbaycan Ordusundadır".

"Bizimyolinfo.az" saytı "Politoloq: "Kollektiv Təhlükəsizlik Müqavilə Təşkilatı (KTMT) Ermənistanın müharibə cinayətinin məsuliyyətini daşıyır" sərlövhəli məqalədə müəllif erməni tərəfin mülki əhalini atəşə tutmasını və bunun məsuliyyətini politoloq Nəzakət Məmmədova ilə dəyərləndirir.

Müəllif deyir ki, cəbhə zonasında Azərbaycan əsgərilə mübarizə apara bilməyən ermənilər dinc əhalini raket atəşinə tutmaqda davam edir.

Müəllifin sözlərinə görə, son 1 ay ərzində Ermənistanın dinc əhaliyə qarşı terror qurbanlarının sayı 100-ə yaxındır və onlar arasında çoxlu sayda uşaq var.

Ekspert deyir ki, Ermənistan cəbhədən xeyli uzaqda yerləşən Azərbaycan rayonlarını atəşə tutur, Azərbaycan isə yaşayış məntəqələrini atəşə tutmur. 1992-ci ildən Ermənistan KTMT üzvüdür. Ermənistan çalışır ki, Azərbaycan onun ərazisini vursun və bu müqaviləni imzalayan dövlətləri Azərbaycana qarşı qaldırsın.

Politoloq N.Məmmədova  deyir ki, KTMT hər bir üzvünün məsuliyyətini daşıyır, odur ki, bu qurum buna göz yummamalıdır.

O deyir ki, bu qurumun üzvü olan Ermənistan faktiki olaraq beynəlxalq hüququ pozmaqda davam edir.

Necə ki, KTMT–nin hər hansı üzvünə olan hücum təşkilatın bütün üzvlərinə olan hücum kimi dəyərləndirilir, eləcə də, hər bir üzvünün məsuliyyətini təşkilat daşıyır.

"Müsavat.com" saytı  "Müharibədən sonrakı dövrün iqtisadiyyatı: böyük layihələr, iş yerləri…" sərlövhəli məqalədə müharibə başa çatdıqdan sonra işğaldan azad edilmiş ərazilərdə iqtisadi həyatın canlandırılması dəyərləndirilir.

Müəllif deyir ki, Bakıdan regionlara böyük köç başlanması gölənilir, bu, pandemiya səbəbilə işsizliyin artması, digər tərəfdən isə qeyri-leqal məşğulluğun azalması ilə bağlıdır.

Müəllif vurğulayır ki, elə pandemiya səbəbilə Bakıdan rayonlara qayıdanlar da az olmadı.   

Müəllif deyir ki, digər amil isə işğalda olan torpaqların azad edilməsi, "böyük qayıdış" proqramı çərçivəsndə 1 milyon nəfərdən çox insanın işğaldan azad ediləcək ata-baba yurdlarına dönmələri imkanıdır.

Müəllif deyir ki, dövlətin sıfırdan quracağı infrastruktur, kənd təsərrüfatı, turizm, mədən sənayesi və sair sahələrlə bağlı yaradılacaq imkanlar, həmçinin sahibkarların dəstəklənməsi proqramları, istisna vergi güzəştləri məşğulluq baxımından da əhali üçün cəlbedici olacaq, Azərbaycan xammal ölkəsindən sənaye ölkəsinə çevriləcək.

Deputat V.Bayramov deyir ki, torpaqların işğaldan azad edilməsi, həm aqrar, həm inşaat, həm də turizm sektorlarında çalışan, həm də pandemiya dövründə öz iş yerlərini itirən vətəndaşlarımız üçün yeni imkanlar yaradacaq, bunun üçün sahibkarlara faizsiz kreditlər verilməsi vacibdir.

Deputata görə, böyük qələbədən sonra Azərbaycanda tam fərqli və yeni iqtisadi modelin tətbiqi müşahidə ediləcək.

İqtisadçı-ekspert Natiq Cəfərli də deyir ki, işğal altında olan bölgələrin qaytarılması yeni  aqrar siyasət üçün ciddi stimul yaradacaq.

Onun fikrincə, torpaqların işğaldan azad olunması kifayət qədər böyük iqtisadi motora çevrilə bilər.

Bununla yanaşı, iqtisadi həyatı canlandırmaq üçün böyük aqrar bank yaradılmasına ehtiyac var, artıq dünyada aqrar sahə sənayenin bir qolu kimi inkişaf edir.