Media-icmal 30.11.19

Ölkədə aparılan islahatlar, Azərbaycan-Rusiya münasibətləri, Maliyyə Bazarlarına Nəzarət Palatasının ləğvi ətrafında müzkirələr və s. məsələlər medianın aparıcı mövzuları sırasındadır.

Alternativi olmayan siyasət

“Azərbaycan” qəzeti “Xalq İlham Əliyev siyasətinə alternativ görmür” sərlövhəli məqalədə dövlət başçısının siyasi kursunu dəyərləndirir.  

Müəllifə görə, son 16 ildə Azərbaycanın modernləşməsini, iqtisadi-siyasi həyatının kökündən dəyişməsini, dövlətlə xalqın vahid bir platformada birləşməsini təmin edən dövlət başçısı İlham Əliyevdir.

Müəllif deyir ki, noyabrın 26-da Bakı Dövlət Universitetinin 100 illik yubiley iclasında çıxış edən dövlət başçısı Azərbaycanın nüfuzu yüksəldikcə bunu istəməyən qüvvələrin Cənubi Qafqazın lider dövlətini gözdən salmağa can atdıqlarını bildirir: “Buna görə güclü olmalıyıq, vətənpərvər olmalıyıq, iqtisadiyyatımız daha da güclü olmalıdır və siyasi iradəmiz yerində olmalıdır. Bugünkü hakimiyyətdə bütün bunlar var və hər kəs görür ki, heç kim bizim işimizə müdaxilə edə bilməz”-deyə prezidentin çıxışəndan sitat gətirir.

Müəllif əlavə edir ki, xalq hakimiyyətə, liderinə güvənir, əhalinin mütləq əksəriyyəti İlham Əliyev siyasətini dəstəkləyir, bu siyasətə alternativ görmür.

Müəllif deyir ki, prezidentin uğurlu xarici diplomatiyası, qlobal miqyaslı təşəbbüsləri, layihələri nəticəsində Azərbaycan beynəlxalq nəqliyyat-tranzit qovşağına çevirib, ən mühüm hərbi, humanitar konfrans və forumların keçirildiyi məkan statusu alıb.

Daha sonra müəlif bu il müxtəlif vaxtlarda keçirilmiş tədbirlərdə dövlət başçısının Qarabağ məsələsində mövqe nümayiş etdirməsini ön plana çıxarır. 

Daxili islahatlara gəlincə, müəllif deyir ki, dövlət başçısı bunu vacib sayır: “İslahatlar bizim şüurlu seçimimizdir, Elə fərz edə bilərik ki, nəyə lazımdır bu islahatlar? Onsuz da hər şey yolunda gedir, ölkə inkişaf edir, yeni müəssisələr açılır, abadlıq işləri görülür. Yox, struktur islahatları, siyasi islahatlar, iqtisadi islahatlar lazımdır…”.

Müəllif  deyir ki, dövlət başçısının fikirlərindən bəlli oldu ki, ölkədə həm icra, həm də məhkəmə-hüquq sistemində islahatlar daha da dərinləşəcək.

Məqalə müəllifinə görə, noyabrın 28-də Yeni Azərbaycan Partiyası Siyasi Şurasının parlamentin buraxılması təşəbbüsü və növbədənkənar gerçəkləşəcək seçki ölkədə aparılan genişmiqyaslı islahatların yaratdığı hüquqi, siyasi tələblərlə bağlıdır, qanunverici hakimiyyət islahat sferasından da kənarda qalmamalıdır.

Yazı müəllifi deyir ki, beləliklə, tezliklə ölkədə növbədənkənar parlament seçkiləri keçiriləcək.

Ömrü 3 il olan Palata

“Moderator.az”  da isə “Maliyyə Bazarlarına Nəzarət Palatasının yaradılması heç nə verə bilməzdi” sərlövhəli məqalə oxumaq olar.

Müəllif Maliyyə Bazarlarına Nəzarət Palatasının ləğv olunmasının səbəbləri barədə İqtisadi siyasət, sənaye və sahibkarlıq komitəsinin üzvü deputat Vahid Əhmədovla söhbətləşir. 

Müəllif deyir ki, V.Əhmədov qurumun fəaliyyətinə və ləğvinə münasibət bildirib.

V.Əhmədovun deməsinə görə, millət vəkili əvvəlcədən belə bir palatanın yaradılmasının əleyhinə olduğunu söyləyib: “Maliyyə Bazarlarına Nəzarət Palatasının yaradılması heç nə verə bilməzdi, çünki bu qurumun ciddi səlahiyyətləri yox idi”.

Deputata görə Maliyyə Bazarlarına Nəzarət Palatasının yaradılmasında məqsəd bank sistemini sağlamlaşdırmaq, eləcə də kredit faizlərini aşağı salmaq idi.

“Cənab prezident hətta bank sektoruna yardım etdi. 10 min dollara qədər kreditlərlə bağlı fərman imzalayaraq banklara 620 milyon manata yaxın vəsait ayırdı. Ancaq bank sektorunda ciddi dəyişiklik baş vermədi. Dövlət başçısı da bunu görüb Palatanı ləğv etdi və səlahiyyətlərini Azərbaycan Mərkəzi Bankına qaytardı”, -  deputat vurğuayıb.

V.Əhmədov Milli Məclisin buraxılması barədə də danışıb və bunun təbii hal olduğunu deyib: “Uzun müddət idi ki, bu haqda söhbətlər gedirdi. Milli Məclis qanunverici orqandır və indiki tərkibin səlahiyyət müddəti 2020-ci ilin noyabrında başa çatmalı idi”.

V.Əhmədovun sözlərinə görə, islahatlar çox ciddi və çevik olduğu, hərtərəfli siyasi, iqtisadi və sosial islahatlar apardığı üçün Milli Məclisin buraxılmasına ehtiyac yaranıb.

Onun sözlərinə görə burada söhbət təkcə gənclərin gəlməsindən getmir. O   hesab edir ki, Milli Məclis siyasət meydanıdır.

“Burada gənclərdən başqa digər siyasəti anlayan, başı çıxan, danışığını bilən, beynəlxalq aləmdə tanınan insanlar da olmalıdır. Gənclər də gəlməlidir”, - deputat firkini belə ifadə edib.

Rusiya çox şey istəyir...          

“Redaktor.az”da isə “Rusiya Azərbaycandan çox şey istəyir” - Bakı buna getsə...” sərlövhəli məqalə diqqəti çəkir.

Müəllif Azərbaycan-Rusiya münasibətləri və bu münasibətlərin mahiyyəti barədə politoloq Məhəmməd Əsədullazadə ilə söhbətləşir. 

M.Əsədullazadə “redaktor.az”a açqlamasında deyir ki, Rusiya Azərbaycan əlaqələri yeni müstəviyə keçir və Rusiya-Azərbaycan münasibətlərində “istiləşmə” yaranıb.

“Rusiyanın ölkəmizə gələn il yeni müxtəlif növ silahlar satacağı gözlənilir. Qərblə Rusiya arasında yeni təsir zonalarının yaradılması üçün mübarizə gedir. Moskva Cənubi Qafqazda dominantlığını saxlamaq, mövqeyini möhkəmləndirmək üçün Azərbaycanla əməkdaşlığı yeni mərhələyə qaldırmağa çalışır. Geopolitik qarşıdurmada Kreml Azərbaycanın önəmini artıq qəbul etməkdədir. Ölkəmizi Avrasiya İqtisadi İttifaqında, Kollektiv Təhlükəsizlik Müqaviləsi Təşkilatı və Gömrük İttifaqına üzv olması üçün müəyyən mesajlar verir, çalışır”.

Politoloqa görə, Kreml anlayır ki, Azərbaycanla yüksək əlaqələr regiona nəzarət deməkdir, Ermənistanın mövqeyi isə Rusiyaya ciddi problemlər yaradır.

M.Əsədullazadə deyir ki, rəsmi İrəvan fürsət düşdükcə Moskvadan kənarlaşmağı planlayır. Ermənistanın xəyanətini görsə də, regional ambisiyalarına görə Qarabağ münaqişəsinin nizamlanmasını yubadır.

Politoloq hesab edir ki, rəsmi Bakının Kremllə əməkdaşlığı yüksək səviyyəyə qaldırması, yüksək səviyyədə səfərlər yeni inkişaf dinamizmindən xəbər verir: “Azərbaycanla Rusiya arasında ciddi problemlər yoxdur. Amma Moskva Azərbaycanla bərabərhüquqlu tərəfdaş kimi davranmayıb. Ermənistan üzərindən Azərbaycanla vəkalət müharibəsi aparır. Qarabağın işğalda qalması, məhz bu siyasətin nəticəsidir. Dünyadakı yeni dəyişikliklər fonunda Kreml Azərbaycana dəstək verərsə, geosiyasi qalib Moskva ola bilər”.

M.Əsədullazadə deyir ki, amma ikitərəfli əlaqələrin inkişafı fonunda Kremlin Qarabağ münaqişəsinin həllində Azərbaycanın mövqeyini müdafiə edəcəyi, Ermənistana əraziləri boşaltdıracağı yaxın perspektivdə görünmür. Moskva ilk növbədə Azərbaycanı öz regional təşkilatlarına üzv edib, sonra münaqişənin həllinə ciddi yanaşmasını ortaya qoymaq istəyir”.

M. Əsədullazadəyə görə, Rusiyanın Azərbaycandan istəyi çoxdur, amma Azərbaycanın Rusiyadan tək bir istəyi var. “Bu da Qarabağ münaqişəsində neytrallallığını elan etməsidir. Ancaq Bakı ilə Moskva arasında sıxlaşan bu əlaqələr fonunda, rəsmi Kremlin bunu edib-etməyəcəyi düşündürücü sual olaraq qalır. Ona görə də Azərbaycan Rusiyanın geosiyasi layihələrinə razılıq verməməlidir. Rusiyanın ölkəmizin daxili siyasətinə təsir mexanizmlərinə gəldikdə isə bu, hələ ki davam edir”.