Ölkədə yüksək uşaq ölümü hallarına görə kim günahkardır?

Sosial Hüquqların Müdaifəsi Monitorinq Qrupu sosial hüquqların müdafiəsilə bağlı çərşənbə günü Beynəlxalq Mətbuat Mərkəzində dəyirmi masa keçirib.

Monitorinq Qrupunu 10-a qədər QHT təsis edib. Qrupun koordinatoru Azad İsgəndərli qurumun məqsədinin vətəndaşların sosial hüquqlarının pozulmasını ictimailəşdirmək, qorumaq, onları maarifləndirmək olduğunu bəyan edib. 

Dəyirmi masada sosial hüquqların müdafiəsi adı altında daha çox ölkədəku uşaq ölümlərindən danışılıb. Buna görə yalnız Elmi Tədqiqat Pediatriya İnstitutu və onun direktoru Nəsib Quliyev tənqid hədəfi olub. Kənardan baxanda bu ölümlərə görə sanki ancaq bu qurumun məsuliyyət daşıması təəssüratı yaranıb. 

İnstitutun cərrahı Qafaq Cəfərov N.Quliyevi uşaq ölümlərilə bağlı statistikanı saxtalaşdırmaqda, bu ölümlərlə bağlı ictimaiyyətə hesabat verməməkdə ittiham edib. Səhiyyə naziri Oqtay Şirəliyevin uşaq doğuşu sahəsində hər şeyin normal olması haqda bəyanatını Q.Cəfərov yalan informasiyaların nəticəsi adlandırıb. 

BMT Uşaq Fondunun son hesabatında Azərbaycanın adının dünyada ən çox uşaq ölümü olan Afrika ölkələrilə bir sırada çəkildiyi, BMT Uşaq Fondunun buna görə dünyanın qabaqcıl ölkələrinə bu sahədə bu 68 dövlətə maliyyə vəsaitləri ayırmaq təklifi etdiyi nazirə xatırladılıb. Ölkədə hər 1000 uşağın 36-nın 5 yaşına çatmadan ölməsi, Gürcüstan, Ermənistanda isə bunun 30 və 23 uşaq olması, uşaq ölümünün 70%-nin statistikadan gizlədilməsi əsas gətirilərək durumun qənaətbəxş olmadığına işarə edilib. Ev şəraitində, xəstəxanaya çatmadan yolda doğulub ölən körpələrin statistikasının isə ümumiyyətlə aparılmadığı xatırladılıb.

Bu il ETPİ-də 75 uşaq ölümü baş versə də, N.Quliyevin ancaq 45 ölüm faktınü rəsmiləşdirdiyi deyilib. Bu haqda aidiyyatı qurumlara müraciətlər ünavnlanıb. Uşaq ölümlərinin yüksək olmasının səhiyyə sistemində kadr siyasətinə yenidən baxmaq zərurəti yaratdığı qənaəti ifadə edilib. Yeri gəlmişkən, N.Quliyevin vətəndaşların xaricdə müalicə komissyasının sədri olduğu və bu sahədə də işin yarıtmaz olması iddia edilib. Qrup üzvləri ölkənin 21-22 rayonunda olduqlarını, rayonlarda yeni xəstəxana binaları olsa da, xəstələrə yüksək səviyyədə qulluq edəcək tibbi personal olmadığını qeyd ediblər.   

Qarabağ müharibəsi əlillərinin müalicə və müavinət problemlərinə də toxunulub. Bu kateqoriya insanların preparatlarla təmin olunması sahəsində probelmlər yaşanması vurğulanıb.

Monitorinq Qrupu bu sahədə durumu yaxşılaşdıra bilmək üçün təkliflərini hazırlayaraq aidiyyatı qurumlara ünvanlayacaqlarını nəzərə çatdırıblar.-05C-