ARDNF-nin vəsaitləri barədə deputatların mübahisələri

Milli Məclisin deputatları ARDNF vəsaitlərinin 2%-lə dünya bazarlarına qoyulmasından narazıdır. Fərəc Quliyev bu vəsaitlərin heç olmasa 50%-nin qaytarılmasını istəyib. «Bu vəsaitlərlə gənclərin mənzil şəraitini yaxşılaşdırmaq, 2-3%-lə kredit vermək olar. Həmin vəsaitlərlə Rusiya bazarlarında işləyən azərbaycanlıları qayıtmağa stimullaşdırmaq olar», - deyə o düşünür.

Fəzail Ağamalı kommersiya banklarının verdiyi kreditlərdən də söz açıb. Bildirib ki, bu kreditlərin faiz dərəcəsi çox yüksəkdir: “Faizlərin aşağı salınmasına ciddi ehtiyac var. 5 mln vətəndaş özəl bnkların girovudur. Əgər kommersiya bankları Mərkəzi Bankın tələblərinə riayət etmirsə, Mərkəzi Banka qanunvericiliklə müəyyən olunmuş əlavə səlahiyyətlər verilməlidir ki, həmin banklara təsir edə bilsin və bununla insanlarımızı kommersiya banklarının nəhəng mədəsindən qurtarmış olsun», - deyə o bildirib. Amma o deməyi unudub ki, yüksək faiz dərəcəsi özəl bankların tamahı deyil, maliyyənin əhalidən çıxarılması üçün düşünülmüş siyasətin bir hissəsidir.

Milli Məclis sədrinin müavini Valeh Ələsgərov parlamentin 19 noyabr iclasında, 2015-ci ilin büdcə müzakirələri zamanı çıxış edib. O, deyib ki, neftin ucuzlaşmasının iqtisadiyyatatəsiri və ARDNF vəsaitlərinin qaytarılması barədə spekulyativ söhbətlərə son qoysunlar. Onun sözlərinə görə, neftin ucuzlaşması təbii prosesdir. 2008-ci ilin ortalarında dünya bazarında neft $139 idi, 2009-cu ildə $39-a düşdü. «İqtisadiyyatımız bundan kəskin sarsıntı hiss etmədi. 2014-cü ildə ABŞ hasilatı gündə 1 mln barrelə çatdırdı. Liviya 800 min barrelə yüksəltməli oldu. Bu isə qiymətlərə təsir etdi. Amma bunlar da keçib gedəcək”.

Turan əvvəllər məlumat verib ki, ARDNF 1999-cu ildən yığılan vəsaitlərin 50%-dən çoxunu büdcə transfertləri və başqa məqsədlərə yönəldib. --17D—