ARDNŞ Türkmənistana neft-qaz nəqliyyat infrastrukturu verməyə hazırdır

ARDNŞ Türkmənistana neft-qaz sahəsində layihələrin reallaşdırılması üçün infrastrukturu, neft-qaz boru kəmərlərinin şaxələndirilmiş sistemini və digər imkanları təqdim etməyə hazırdır. Bunu ARDNŞ prezidenti Rövnəq Abdullayev noyabrın 18-də Aşqabadda keçirilən "Türkmənistanın neft və qazı - 2014" konfransında deyib.

"Biz istənilən zaman region ölkələrinə, ilk növbədə, ən yaxın qonşumuza - qardaş Türkmənistana neft-qaz sahəsində layihələrin reallaşdırılması üçün inkişaf etmiş infrastrukturumuzu, neft-qaz boru kəmərlərinin şaxələndirilmiş sistemini, anbarları, terminalları və digər imkanları təqdim etməyə hazırıq", deyə o qeyd edib.

Abdullayevin sözlərinə görə, Xəzər hövzəsindən nəql marşrutlarının şaxələndirilməsi istehlakçıların və region ölkələrinin enerji təhlükəsizliyinin gücləndirilməsində sanballı amil olacaq, nəql xərclərinin azaldılmasını təmi edəcək və bununla da karbohidrogenlərin kommersiya tədarükünü daha rentabelli edəcək.

"Azərbaycan qarşılıqlı sərfəli əməkdaşlıq üçün açıq ölkədir: Sentyabrın 20-də Azərbaycan qazının Türkiyə və Avropaya nəqlini nəzərdə tutan "Cənub Qaz Dəhlizi" layihəsinin təməli qoyuldu. "Cənub Qaz Dəhlizi"nin hissəsi olan və Azərbaycan qazının Türkiyənin bütün ərazisi ilə Avropa sərhədlərinədək nəqlini təmin edəcək Transanadolu qaz kəmərinin (TANAP) ilkin buraxılış qabiliyyəti ildə 16 milyard kubmetr olacaq, gələcəkdə isə bunu 31 milyard kubmetrədək artırmaq imkanı var", deyə ARDNŞ rəhbəri vurğulayıb.

Əvvəllər Türkiyə prezidenti R.T.Ərdoğan Aşqabadda prezident Berdımuhəmmədovla danışıqlardan sonra deyib ki, TANAP türkmən qazını da nəql edə bilər. Yekunda "Türkmənqaz" və "Atagas" qaz alqı-satqısı üzrə çərçivə sazişi imzaladı.

Türkmənistanın resurslarını Avropa bazarına çıxarmaq üçün Xəzərin dibi ilə 300 km-lik qaz kəməri çəkilməlidir.—0--