Daşınmaz əmlakın ilkin qeydiyyatı 20% azalıb

Əmlak Məsələləri Dövlət Komitəsi daşınmaz əmlak hüququnun qeydiyyatı vəziyyəti barədə məlumatı açıqlayıb. Ona əsasən, ilin 8 ayında bazarda aktivliyin ümumi artımına baxmayaraq, daşınmaz əmlakın ilkin qeydiyyatı 20% azalıb. Bu, əsasən mülkiyyətçilərin tikililərin qanuniliyi barədə sənəd vermək çətinliyi ilə bağlıdır. 

Mülkiyyət hüququnun sənədləşməsində daşınmaz əmlakın ilkin qeydiyyatının xüsusi çəkisi yanvar-avqustda 28,8% olub. Rəsmi məlumata görə, ölkədə qanunsuz sayılan 500 min daşınmaz əmlak obyekti var. Yəni onlar müəyyən edilməyən yerlərdə (mühəndis kommunikasiyalarının, avtomobil və dəmir yollarının  mühafizə zolağında) və icazə sənədi olmadan tikilib. 

Bu dövrdə ölkədə 97,3 min obyektə dövlət reyestrindən çıxarış verilib. Bu, 2011-ci ilin eyni dövründəkindən 1,9% çoxdur. 

Daşınmaz əmlakın təkrar bazarında əməliyyat sayı artır. Təkcə bu ilin yanvar avqustunda alqı-satqı və başqa mülkiyyət özgəninkiləşdirilməsi üzrə 69,2 min əməliyyat qeydə alınıb. Bu, ötən ilin eyni dövründən 14,6% çoxdur. 

Əqdlərin sayına görə (36,8 min) torpaq daşınmaz əmlak bazarında ən aktiv alətdir. Yaşayış binalarında mənzillərlə bağlı əməliyyatlar, o cümlədən mənzil fondunun özəlləşdirilməsi (35,8 min əməliyyat) azalıb. Torpaq sahələri üzrə əməliyyatlar 11% artıb, mənzil bazarında bu göstərici 3,2%-dir.

Maraqlıdır ki, ötən illə müqayisədə fərdi və bağ evləri (19,2 min) üzrə əməliyyatlar 2011-ci ilin eyni dövrü ilə müqayisədə 9,4% azalıb. Həmçinin qeyri-yaşayış evləri (-16%), əmlak kompleksləri (-11,3%), çoxmərtəbəli yaşayış evləri (-41%) və çoxillik bitkilərin altındakı sahələrin (-78,5%) qeydiyyatı azalıb.

Əmlak bazarında Bakının xüsusi çəkisi yanvar-avqustda 37,4% olub. Bakı mənzil (68,3%) və qeyri-yaşayış sahələri üzrə əməliyyatların sayında (79,8%) liderdir.

Qeyd edək ki, 2012-ci ilin mayından mülkiyyətçilər təkrar bazarda daşınmaz əmlak hüququnu elektron formada rəsmiləşdirə bilərlər. Amma ƏMDK bu cür müraciətlərin intensivliyi barədə məlumat verməyib. 08D