Ekspert: «FES-in qərarının manata təsiri qaçılmazdır»

ABŞ Federal Ehtiyat Sisteminin (FES)  uçot stavkasını artırması Azərbaycan üçün arzuolunan deyil, iqtisadçı Vüqar Bayramov belə hesab edir.

FES dekabrın 14-də keçirilən iclasda uçot stavkasını 0,5–0,75%  artırıb.

Turan-ın məlumatına görə, V.Bayramov qeyd edib ki, artıq dollara nisbətən dəyərsizləşən Avropa pulu dünya bazarında 1 avro 1.048-dək ucuzlaşıb.

“FES-in qərarından sonra manata təzyiqin artacağı qaçılmazdır. Təbii ki, Mərkəzi Bankın bu ssenariyə necə hazırlaşdığını yaxın günlərdə müşahidə edə biləcəyik”, - o bildirib.

V.Bayramov hesab edir ki, əgər Mərkəzi Bank daha çevik alətlərdən istifadə edib valyuta bazarındakı psixoloji təzyiqləri aradan qaldırmasa manatın ucuzlaşması prosesi daha sürətlənə bilər.

İqtisadçı qeyd edib ki, qlobal neft bazarı da FES-in qərarına reaskiya verdiyi üçün bu, dövlət gəlirlərinə də təsirsiz ötüşmür. Dolların bahalaşması fonunda ABŞ da neft ehtiyatlarını, eləcə də bazara çıxartdığı neftin həcmini artırarsa o zaman “qara qızıl”ın qiymətində daha kəksin azalmalar istisna edilmir.  Bu isə OPEK-in son cəhdləri fonunda da neft ölkələrinin bazarda uyğun qiymət tarazlığı tapmasına imkan verməyəcək.

“Bütövlükdə, FES-in son qərarından sonra neftin qiymətinin necə dəyişməsi birbaşa Amerikanın mövqeyindən asılı olacaq. Söhbət, sadəcə, ABŞ-dan deyil, eyni zamanda Kanadanın hasilatından gedir”, -V.Bayramov vurğulayıb.

O qeyd edib ki, FES 2017-ci ildə də uçot stavkasını artırmağı planlaşdırıb.

“Deməli, Azərbaycan Mərkəzi Bankının liberal məzənnə siyasətinə keçidi sürətləndirəcəyi gözlənilir. Artıq Mərkəzi Bankın manevr imkanları məhdudlaşmaqdadır və bu baxımdan baş bankın sözün həqiqi mənasında meydanı valyuta bazarına təhvil verəcəyi gözləniləndir. Beləcə, FES-in uçot stavkasını artırması Azərbaycanda da dollara tələbi daha da artırmaqla manata təzyiqi gücləndirəcək. Deməli, 2016-cı ilin son ayı da Mərkəzi Bank üçün heç də asan olmayacaq”, - iqtisadçı bildirib.71D