Sudan istifadə qaydaları təsdiq edilib

 Nazirlər Kabineti iyulun 17-də «Sudan istifadə qaydaları”nı təsdiq edib.

“Su təchizatı və tullantı suları haqqında” Azərbaycan Respublikasının Qanununa uyğun olaraq hazırlanan qaydalara görə, su təchizatı və kanalizasiya sistemlərindən  istifadə istehlakçı və xidmət tədarükçüsü arasında alqı-satqı müqaviləsi ilə həyata keçirilir. Tikintisi başa çatmış çoxmənzilli yaşayış binalarının mənzil mülkiyyətçiləri ilə fərdi müqavilələr daxili təchizat sistemi texniki şərtlərə uyğun qurulduqdan sonra bağlanılmalıdır.

Tədarükçü onun təqsiri üzündən baş verən hadisələr istisna olmaqla, su magistral kəmərindən istehlakçının paylayıcı şəbəkəsinə verildikdən sonra suyun keyfiyyətinin dəyişməsinə görə məsuliyyət daşımır.

Texniki su kəməri şəbəkəsi ilə əhatə olunmamış ərazilərdə içməli sudan texnoloji proseslərdə (yaşıllıqların suvarılması, avadanlığın soyudulması, nəqliyyat vasitələrinin yuyulması, beton qarışıqlarının hazırlanması və s.) istifadə edilməsinə yalnız istehlakçının müraciətinə əsasən texniki şərtlərə uyğun olaraq “Sukanal” müəssisəsinin icazəsi ilə yol verilir.

Əhali qrupuna daxil olmayan istehlakçıların istismarında olan su qurğularına 6  ayda bir dəfədən az olmayaraq texniki baxış keçirilir. Xidmət haqqı hər ay ödənilir. Hesab istehlakçıya təqdim edildikdən (göndərildikdən) sonra müvafiq vəsait  1 ay müddətində tam ödənilmədikdə su verilməsi dayandırıla bilər. Qanunsuz  qoşulma halları aşkar edildikdə su təchizatı dayandırılır. Bu halda istehlakçı cərimə ödəməlidir. Cərimənin məbləği Nazirlər Kabinetinin qərarına uyğun müəyyən edilir. İstehlakçı qanunsuz qoşulma ilə əlaqədar tərtib olunmuş akt və onun məzmunu barədə öz mülahizələrini, izahatlarını təqdim etmək, habelə aktı imzalamaqdan imtina etmək hüququna malikdir.

Zədələnmiş suölçən cihazın (hesablama mexanizmlərinin sıradan çıxması, baxış pəncərəsinin sınması, üzərindəki plombların qırılması, texniki nasazlıqlar və s.) təmir olunması, dövlət yoxlamasından keçirilməsi, dəyişdirilməsi (yenisi ilə əvəz edilməsi) və quraşdırılması bu barədə müraciət edildiyi və ya belə halların aşkar olunduğu gündən sonra ən geci 15 iş günü müddətində tədarükçü tərəfindən həyata keçirilir.

Qaydalara əsasən, suölçən cihazın sərfiyyat yükləmə kartı itirildikdə və ya zədələndikdə kartın yenisi ilə əvəzlənməsi (dəyişdirilməsi) istehlakçının vəsaiti hesabına aparılır.

Qaydalarda istehlakçı və xidmət tədarükçüsü arasında münasibətlərin tənzimlənməsinin xüsusi şərtləri də müəyyən edilib.

Bu il aprelin 1-i üçün “Azərsu” ASC əhali qrupundan 1 mln 193,2 min abunəçiyə xidmət göstərir. Bunun 638 mini və ya 53,5%-i  sayğacla təmin olunub. Bakıda mənzillərin 65,6%-i sayğacla təmin edilib. Qeyri-əhali qrupunda (42 265) sayğacla təminat səviyyəsi 83,6%-dir. --08D—